ޕީއެންސީ ކެންޑިޑޭޓަށް ލާފައިވާ ވަގު ވޯޓު ބާތިލްކުރުމުން، ނަތީޖާ އެއްވަރުވެ އަލުން ގުނުމުން މީދޫ ކައުންސިލް ރައީސްގެ ގޮނޑި ސަރުކާރަށް ގެއްލިއްޖެ
ދ. މީދޫ ކައުންސިލްގެ ރައީސް ހޮވުމަށް ބޭއްވި އިންތިހާބުގެ ވޯޓުފޮށި އަލުން ގުނިއިރު، ޕީއެންސީގެ ކެންޑިޑޭޓަށް ލިބުނު ވޯޓެއް ބާތިލުވުމާ ގުޅިގެން އެމްޑީއޭގެ ކެންޑިޑޭޓް މުހައްމަދު ޝާހިދު އެ ގޮނޑި ކާމިޔާބު ކުރައްވައިފި. މި ބަދަލާއެކު ޝާހިދު އިންތިހާބު ކާމިޔާބު ކުރެއްވީ އެންމެ ވޯޓެއްގެ ތަފާތުން. މިފަހަރުގެ ލޯކަލް ކައުންސިލް އިންތިހާބުގެ މެޖޯރިޓީއާއި ސިޓީތަކުގެ މޭޔަރުކަން ވެސް ހޯދާފައިވަނީ އިދިކޮޅު އެމްޑީޕީން. މީގެއިތުރުން، އިންތިހާބުތައް އެއްކޮށްލުމާ މެދު ރައްޔިތުންގެ މެދުގައި ނެގި ވޯޓުން ވެސް ސަރުކާރަށް ވަނީ ނާކާމިޔާބީއާ ކުރިމަތިލާން ޖެހިފަ.
މިދިޔަ ހޮނިހިރު ދުވަހު ބޭއްވި ކައުންސިލް އިންތިހާބުގެ ވޯޓު ގުނުމުގެ ތެރެއިން. | އިލެކްޝަންސް ކޮމިޝަން
ދ. މީދޫ ކައުންސިލްގެ ރައީސްގެ މަގާމަށް ވާދަކުރި ޕީއެންސީ އަދި އެމްޑީއޭ ކެންޑިޑޭޓަށް ލިބުނު ވޯޓު އެއްވަރުވެފައި ވަނިކޮށް، މައްސަލަ ޖެހިގެން މީދޫ 2 ނަންބަރު ވޯޓުފޮށި އަލުން ގުނިއިރު ޕީއެންސީގެ ކެންޑިޑޭޓަށް ލިބުނު ވޯޓެއް ބާތިލުވެ، ކައުންސިލް ރައީސްގެ މަގާމު އެމްޑީއޭގެ ކެންޑިޑޭޓަށް ޔަގީން ވެއްޖެ އެވެ.
މީދޫ ކައުންސިލްގެ ރައީސްގެ މަގާމަށް ވާދަކުރި ޕީއެންސީގެ ސުހާ އިބްރާހިމް އާއި އެމްޑީއޭގެ މުހައްމަދު ޝާހިދަށް ކުރިން ލިބުނީ 392 ވޯޓެވެ. އެހެންނަމަވެސް ހުކުރު ދުވަހު މީދޫ ދެ ނަންބަރު ވޯޓުފޮށި އަލުން ގުނިއިރު ސުހާ އަށް ލިބުނު ވޯޓެއް ބާތިލުވުމުން އޭނާ އަށް ލިބުނު ވޯޓު ވަނީ 391 އަށް މަދުވެފަ އެވެ. އެއާއެކު ޝާހިދު ވަނީ އެއް ވޯޓުގެ ތަފާތަކުން ކައުންސިލް ރައީސްގެ މަގާމު ހޯއްދަވާފަ އެވެ.
މީދޫ ދެ ނަންބަރު ވޯޓުފޮށި އަލުން ގުނަން ދިމާވީ ޕީއެންސީ ކެންޑިޑޭޓަށް ލާފައިވާ ވަގު ވޯޓެއް ބާތިލު ކުރުމުން ނަތީޖާ އެއްވަރުވުމުގެ ސަބަބުންނެވެ. މީދޫ ދެ ނަންބަރު ވޯޓުފޮށީގައި ކުރިން ޕީއެންސީގެ ވޯޓެއް ކަމަށް ގުނި ވޯޓެއް މިއަދު އަލުން ގުނައި ބާތިލު ކަމަށް ކަނޑައަޅާފައި ވަނީ އެ ވޯޓު ކަރުދާހުގައި ދެފަހަރު ރަނގަޅު ފާހަގަ ޖަހާފައިވާތީ އެވެ.
ދ. މީދޫގެ ކައުންސިލްގެ ދެ ގޮނޑި އަދި ޑަބްލިއުޑީސީ އެއް ގޮނޑި ކާމިޔާބުކުރީ ޕީއެންސީ އިންނެވެ. އެމްޑީޕީ އިން ވަނީ ޑަބްލިއުޑީސީގެ އެއް ގޮނޑި ކާމިޔާބުކޮށްފަ އެވެ.
މިދިޔަ ހޮނިހިރު ދުވަހު ބޭއްވި ލޯކަލް ކައުންސިލްތަކުގެ އިންތިހާބުގައި ގިނަ ގޮނޑި ކާމިޔާބު ކުރީ އިދިކޮޅު މޯލްޑިވިއަން ޑިމޮކްރެޓިކް ޕާޓީ އެމްޑީޕީ އިންނެވެ. ގިނަ ކައުންސިލްތަކުގެ ރައީސްގެ މަގާމަށް ވެސް އައީ އެމްޑީޕީގެ ކެންޑިޑޭޓުންނެވެ. އަދި ރާއްޖޭގެ ފަސް ސިޓީގެ މޭޔަރުގެ މަގާމާއި ސިޓީ ކައުންސިލްތަކުގެ މެޖޯރިޓީ ވެސް ލިބުނީ އެމްޑީޕީ އަށެވެ.
ރައްޔިތުންގެ މަޖިލީހުގެ އިންތިހާބާއި ރިޔާސީ އިންތިހާބު އެއްކޮށްލަން ފެނޭތޯ ނެގި ވޯޓުގައި ވެސް ސަރުކާރުން ވަނީ ބަލިވެފަ އެވެ. ވޯޓު ދިން މީހުންގެ ތެރެއިން 68 ޕަސެންޓު މީހުން ބުނެފައި ވަނީ ދެ އިންތިހާބު އެއްކުރަން ނުފެންނަ ކަމަށެވެ. ދެ އިންތިހާބު އެއްކޮށްލުމަށް ސަރުކާރުން ބޮޑެތި ކެމްޕެއިން ތަށް ކުރި އިރު، ސަރުކަރާ އެއްކޮޅަށް ލިބިފައިވާ ވޯޓު ވެރިކަންކުރާ ޕީއެންސީގެ ޖުމްލަ މެމްބަރުންގެ އަދަދަދަށްވުރެ ވެސް މަދެވެ. މި އިންތިހާބުގެ ނަތީޖާއިން ސާފުވަނީ ސަރުކާރުގެ ސިޔާސަތުތަކާއި މެދު ރައްޔިތުން ނުރުހުން ފާޅުކޮށްފައިވާ މިންވަރުކަމަށް ގިނަ ބަޔަކު ދަނީ ބުނަމުންނެވެ.
