2 ދުވަސް ކުރިން މަގާމުން ވަކިކުރި ސަލްމާގެ ވަޒީފާ އިއާދަކޮށްދީފި
ޖެނީވާގައި ހުންނަވާ ރާއްޖޭގެ ދާއިމީ މަންދޫބު ޑރ. ސަލްމާ ރަޝީދު މަގާމުން ވަކިކުރުމަށްފަހު، އެ ނިންމުން ބާތިލުކޮށް އޭނާގެ ވަޒީފާ ސަރުކާރުން އަލުން އިއާދަކޮށްފި. މި ބަދަލު އައިސްފައި ވަނީ ސަރުކާރާ ދެކޮޅަށް ވާހަކަދެއްކެވި ކަމަށް ބުނާ އޯޑިއޯއެއްގެ މައްސަލައިގައި ސަފީރު މުހައްމަދު ހުސައިން ޝަރީފާއި ސަލްމާ މަގާމުން ވަކިކުރިތާ ދެ ދުވަސް ފަހުން. ނަމަވެސް، ސަލްމާގެ ވަޒީފާ އިއާދަކުރި ނަމަވެސް މުހައްމަދު ހުސައިން ޝަރީފުގެ މަގާމާ މެދު ސަރުކާރުން އަދި ވަކި ގޮތެއް ނިންމާފައެއް ނުވޭ.
އދ. ހިއުމަން ރައިޓްސް ކައުންސިލްގެ ބައްދަލުވުމުގައި ރާއްޖޭގެ ފަރާތުން އދ. ގެ އޮފީހަށް ކަނޑައަޅާފައި ހުންނަވާ ދާއިމީ މަންދޫބު ސަލްމާ ރަޝީދު ބައިވެރި ވަނީ | ސޯޝަލް މީޑިއާ
މީގެ 2 ދުވަސް ކުރިން މަގާމުން ވަކިކުރި، ޖެނީވާ އަށް ރާއްޖެއިން ކަނޑައަޅުއްވާފައި ހުންނަވާ ދާއިމީ މަންދޫބު ޑރ. ސަލްމާ ރަޝީދުގެ ވަޒީފާ އިއާދަކޮށްދީފި އެވެ.
ސަލްމާގެ އިތުރުން ޔޫއޭއީގައި ރާއްޖެ ތަމްސީލްކުރައްވާ ދިވެހި ސަފީރު މުހައްމަދު ހުސައިން ޝަރީފު (މުންދު) ވެސް މަގާމުން ވަކިކުރި އެވެ. މި ދެބޭފުޅުން މަގާމުން ވަކިކުރީ ހޯމަ ދުވަހު އެވެ. މި ދެ ބޭފުޅުން މަގާމުން ވަކިކޮށްފައި މިވަނީ، ސަރުކާރު ހިންގާ ޕީއެންސީއަށް ވޯޓު ނުދިނުމަށް ހިތްވަރުދީ ރައްޔިތުންގެ މަޖިލީހުގެ މާފަންނު މެދު ދާއިރާގެ މެންބަރު އަސްމާ ރަޝީދު ވާހަކަދައްކަވާ އޯޑިއޯއެއްގެ މައްސަލަ ފެންމަތިވެފައި ވަނިކޮށެވެ. މިހާރު މަޤާމުން ވަކިކޮށްފައިވާ މުންދުއަކީ އަސްމާގެ ދަރިކަލުންނެވެ. މީގެ އިތުރުން ސަލްމާއަކީ އަސްމާގެ ކޮއްކޮ އެވެ.
ރާއްޖެއެމްވީއަށް އެނގިފައިވާ ގޮތުގައި ސަލްމާ މަގާމުން ވަކިކުރިކަމުގެ ޗިޓް ބާތިލް ކުރުމަށް ވަނީ ނިންމާފަ އެވެ. ނަމަވެސް މުންދު ގެ މަގާމު އިއާދަކޮށްފައި ނުވެ އެވެ. މިކަމާއި ގުޅިގެ ސަރުކާރުން މިހާތަނަށް އެއްވެސް އެއްޗެއް ބުނެފައި ނުވެ އެވެ.
ސަލްމާއާއި މުންދު މަގާމުން ވަކިކުރި ހަބަރާއެކު ފިޝަރީޒް މިނިސްޓްރީގެ ސްޓޭޓް މިނިސްޓަރު އާމިނަތު ހުސައިން ޝަރީފް ވެސް މަގާމުން ވަކިކުރި ހަބަރުތައް ފެންމަތިވި އެވެ. އޭނާ އަކީ އަސްމާގެ އާއިލާ މެންބަރެކެވެ. ނަމަވެސް އޭނާ މަގާމުން ވަކިނުކުރާ ކަމަށް ވަނީ މައުލޫމާތު ލިބިފަ އެވެ.
ނިމިގެން ދިޔަ ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބުގެ އިތުރުން ރިޔާސީ އިންތިހާބާއި މަޖިލިސް އިންތިހާބު އެއްކޮށްލަން ސަރުކާރުން ނެގި ފެންނަ ނުފެންނަ ވޯޓުން ސަރުކާރަށް ވަނީ ބޮޑު ބައްޔަކާއި ކުރިމަތިލާން ޖެހިފަ އެވެ. އެއާއެކު ސަރުކާރުގެ ސިޔާސީ އިސް މަގާމުތަކުގައި ތިބި ފަރާތްތައް ދަނީ މަގާމުން ވަކިކުރަމުންނެވެ.
