އަލަށް އިންތިހާބުވި ކައުންސިލަރުން ހުވާކުރުން އަންނަ މަހުގެ 17 ގައި ބޭއްވުމަށް ނިންމައިފި
މިހާރު ތިއްބެވި ކައުންސިލަރުންގެ ދައުރު މެއި 17 އަށް ހަމަވާތީ، އަލަށް އިންތިޚާބުވި މެންބަރުން ހުވާކުރުމުގެ ރަސްމިއްޔާތު އެ ދުވަހު ބޭއްވުމަށް އެލްޖީއޭ އިން ވަނީ ތާވަލުކޮށްފަ. މި ރަސްމިއްޔާތުގައި ކައުންސިލަރުން ހުވާކުރުމުގެ އިތުރުން، އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ މެންބަރުން އިގުރާރުގައި ސޮއިކުރުން ވެސް އޮންނާނެ.
އަތޮޅު ކައުންސިލްތައް އުވުމުން، މާލޭގައި ހުންނަ ލޯކަލް ގަވަމަންޓް މިނިސްޓްރީ އިން އަތޮޅު އޮފީސްތައް ހިންގާ ގޮތަށް ވަނީ ނިންމާފައި | އެލްޖީއޭ
ލޯކަލް ކައުންސިލް އިންތިޚާބުގައި އަލަށް އިންތިޚާބުވި ކައުންސިލަރުން މަގާމުގެ ހުވާކުރުމުގެ ރަސްމިއްޔާތު އަންނަ މެއި މަހުގެ 17 ވަނަ ދުވަހު ބޭއްވުމަށް ނިންމާފައިވާ ކަމަށް ލޯކަލް ގަވަމަންޓް އޮތޯރިޓީ (އެލްޖީއޭ) އިން ބުރާސްފަތި ދުވަހު ހާމަކޮށްފި އެވެ.
އެލްޖީއޭގެ އޮފިޝަލަކު ވިދާޅުވީ، ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގައިވާ ގޮތުގެ މަތިން ކައުންސިލަރުންގެ ދައުރަކީ ފަސް އަހަރު ދުވަސް ކަމަށެވެ. މިހާރު މަގާމުތަކުގައި ތިއްބެވި ކައުންސިލަރުންގެ ދައުރު އަންނަ މެއި މަހުގެ 17 ވަނަ ދުވަހަށް ހަމަވާނެތީ، އިންތިޚާބީ ކައުންސިލަރުން ހުވާކުރުމުގެ ރަސްމިއްޔާތު އަންނަ މަހުގެ 17 ވާ އާދިއްތަ ދުވަހު ބޭއްވުމަށް ވަނީ ތާވަލުކޮށްފަ އެވެ.
މި ރަސްމިއްޔާތުގެ އެޖެންޑާއާ ގުޅޭގޮތުން މައުލޫމާތު ދެއްވަމުން އޮފިޝަލް ވިދާޅުވީ، އެ ދުވަހުގެ ރަސްމިއްޔާތުގައި މައިގަނޑު ދެ ކަމެއް ކުރިއަށްދާނެ ކަމަށެވެ. އެގޮތުން އެންމެ ފުރަތަމަ އޮންނާނީ އަލަށް އިންތިޚާބުވި ކައުންސިލަރުން މަގާމުގެ ހުވާކުރުން ކަމަށާއި، އޭގެ ފަހުން އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ މެންބަރުން އިގުރާރުގައި ސޮއިކުރުން އޮންނާނެ ކަމަށް އޭނާ ވިދާޅުވި އެވެ.
ހުވާކުރުމުގެ ރަސްމިއްޔާތު ބާއްވާނެ ވަގުތުތަކާ ގުޅޭގޮތުން އެލްޖީއޭ އިން ބުނީ، ރަސްމިއްޔާތު ބާއްވާނެ ސީދާ ގަޑިތައް ކަނޑައަޅާނީ ފަނޑިޔާރުންނާއި ކައުންސިލްތަކާ މަޝްވަރާކުރުމަށްފަހު ކަމަށެވެ. ކައުންސިލަރުންނަށް ހުވާލައިދެއްވާނީ އެ ރަށެއްގެ ނުވަތަ އެ ދާއިރާއެއްގެ ފަނޑިޔާރުންނެވެ.
މިދިޔަ ހޮނިހިރު ދުވަހު ބޭއްވި ލޯކަލް ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިޚާބުގައި ޖުމްލަ 681 ކައުންސިލަރުންނާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް 681 މެންބަރުން ވަނީ އިންތިޚާބުކޮށްފަ އެވެ. މިއީ ރާއްޖޭގެ ލާމަރުކަޒީ ނިޒާމުގެ ދަށުން ކައުންސިލަރުންގެ ދައުރު ފަސް އަހަރަށް ބަދަލުކުރި ފަހުން ބޭއްވި ފުރަތަމަ އިންތިޚާބެވެ.
