މަނަދޫ ވޯޓު ފޮއްޓަށް އެހެން ދާއިރާއެއްގެ މީހަކު ވޯޓުލާފައިވާ މައްސަލަ ޖެހި، ރަށު ރައްޔިތުން އިހުތިޖާޖަށް
މަނަދޫ ކައުންސިލްގެ ރައީސް ކަމަށް މިހާރު އިންތިޚާބުވެފައިވާ އަލީ ޒާފިރު ވިދާޅުވީ، މަނަދޫ ޕްރީ ސްކޫލުގައި ބެހެއްޓިފައިވާ ވޯޓު ފޮއްޓަށް، ލިސްޓުގައި ތިބި މީހުންގެ އަދަދަށް ވުރެ އިތުރަށް އެއް ވޯޓު ލާފައިވާ ކަމަށް.
މަނަދޫގައި ކުރަމުން އަންނަ އިހުތިޖާޖުގެ ތެރެއިން. | ރާއްޖެ އެމްވީ
ހޮނިހިރު ދުވަހު ކުރިއަށް ދިޔަ ލޯކަލް ކައުންސިލް އިންތިޚާބުގައި ނ.މަނަދޫގެ ވޯޓު ފޮއްޓަށް، އެހެން ދާއިރާއެއްގެ މީހަކު ވޯޓު ލާފައިވާ މައްސަލަ ދިމާވެ ރަށު ރައްޔިތުން އިހުތިޖާޖު ކުރަން ފަށައިފި އެވެ.
ރާއްޖެ އެމްވީ އަށް މައުލޫމާތު ދެއްވަމުން މަނަދޫ ކައުންސިލްގެ ރައީސް ކަމަށް މިހާރު އިންތިޚާބުވެފައިވާ އަލީ ޒާފިރު ވިދާޅުވީ، މަނަދޫ ޕްރީ ސްކޫލުގައި ބެހެއްޓިފައިވާ ވޯޓު ފޮއްޓަށް، ލިސްޓުގައި ތިބި މީހުންގެ އަދަދަށް ވުރެ އިތުރަށް އެއް ވޯޓު ލާފައިވާ ކަމަށެވެ. އެކަމުގެ މައްސަލަ ދިމާވެފައިވާއިރު، އެ މައްސަލަ ހައްލު ނުކޮށް ހޯމަ ދުވަހު ވޯޓު ފޮށި ގެންދަން އުޅޭ ކަމުގެ މައުލޫމާތު ލިބުމާ އެކު، މަނަދޫގެ ގިނަ އަދަދެއްގެ ރައްޔިތުން އަންނަނީ އިހުތިޖާޖު ކުރަމުން ކަމަށް ވެސް އޭނާ ވިދާޅުވި އެވެ.
ޒާފިރު ވިދާޅުވީ މިވަގުތުގެ ނަތީޖާ އަށް ބަލާއިރު، އަންހެނުންގެ ތަރައްޤީ އަށް މަސައްކަތް ކުރާ ކޮމެޓީގެ އެއް ގޮނޑީގައި އުޅެނީ އެއް ވޯޓުގެ ތަފާތެއް ކަމަށެވެ. އެގޮތުން އެއް ވޯޓުން ޕީއެންސީގެ ކެންޑިޑޭޓް ކުރީގައި އޮތްއިރު، އެ ވޯޓު ފޮއްޓަށް އެއް ވޯޓު އިތުރަށް ލާފައިވުމަކީ އިންތިޚާބުގެ ނަތީޖާ އަށް އަސަރު ކުރާނެ ކަމެއް ކަމަށް އޭނާ ވިދާޅުވި އެވެ. ނަމަވެސް، އިލެކްޝަންސް ކޮމިޝަން އިން އެކަމަށް ޙައްލެއް ގެނެސްފައި ނުވާ ކަމަށް އޭނާ ފާހަގަ ކުރި އެވެ.
އެކި އެކި މަސްދަރު ތަކުން ރާއްޖެ އެމްވީ އަށް މައުލޫމާތު ލިބިފައިވާ ގޮތުގައި މަނަދޫގެ ވޯޓު ފޮއްޓަށް އިތުރަށް އެއް ވޯޓު ލާފައި ވަނީ ޕީއެންސީގެ ކެމްޕެއިން މެނޭޖަރެވެ. ނަމަވެސް، އޭނާ އަކީ މަނަދޫ އަށް ނިސްބަތްވާ މީހެއް ނޫން ކަމަށް ވެސް މައުލޫމާތު ލިބިފައިވެ އެވެ. އެކަމާ ނުރުހުން ފާޅު ކުރުމުގެ ގޮތުން މަނަދޫގެ ރައްޔިތުން އަންނަނީ އަތޮޅު ކައުންސިލް އިދާރާއާ ދިމާލުގައި އިހުތިޖާޖު ކުރަމުންނެވެ.
ހޮނިހިރު ދުވަހު ކުރިއަށް ގެންދިޔަ ލޯކަލް ކައުންސިލް ތަކުގެ އިންތިޚާބާއި، އަންހެނުންގެ ތަރައްޤީ އަށް މަސައްކަތް ކުރާ ކޮމެޓީގެ އިންތިޚާބު އަދި ރައްޔިތުންގެ ޚިޔާލު ހޯދުމުގެ އާންމު ވޯޓުގައި ސަރުކާރަށް ވަނީ ބޮޑު ނާކާމިޔާބަކާ ކުރިމަތިލާން ޖެހިފަ އެވެ. އެގޮތުން ރާއްޖޭގެ އެކި ކަންކޮޅު ތަކުން ގިނަ ގޮނޑިތައް ކާމިޔާބު ކޮށްފައި ވަނީ އެމްޑީޕީ އިންނެވެ.
