ރައީސް މުއިއްޒު އަށް ޣަފޫރު: "ގޯނީގަ މިހާރު އެއްޗެއް ނެތް. ދެނެއް އެއަށް އެއްޗެއް އަޅައިގެން ނުހިފެހެއްޓޭނެ."
5 އެޕްރީލު 2026 | އާދީއްތަ 21:00ރާއްޖޭގައި ޤާނޫނީ ބާރުވެރިކަމާއި އިޖުތިމާއީ އަދާލަތު ޤާއިމުވެފައި އޮތުމަކީ ރައްޔިތުންގެ އެދުމެއް ކަމަށް ޣަފޫރު ވިދާޅުވި. އަދި ރައްޔިތުންގެ ބާރުތައް ގެއްލޭ ކޮންމެ ހިނދެއްގައި، އާންމު ރައްޔިތުން އެކަމާ ދެކޮޅަށް ބަސްބުނަމުން ދާނެކަން އޭނާ ފާހަގަކުރެއްވި.
އެމްޑީޕީގެ ޗެއަރޕަރސަން ޣަފޫރު ރާއްޖެޓީވީގެ ފަލަސުރުހީ ޕްރޮގްރާންގައި ވާހަކަދައްކަވަނީ | ރާއްޖެ އެމްވީ
ރައްޔިތުންގެ ވިންދާއި އެއްގޮތަށް ކަންކަން އިސްލާހުކުރައްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވި ނަމަވެސް މިހާރު ގައުމުގެ ކަންކަން ވަނީ ވަރަށް ގޯސްވެފައި ކަމަށާއި އެކަންކަން ރަނގަޅު ކުރަން ވަރަށް އުނދަނގޫ ވާނެ ކަމަށް އެމްޑީޕީގެ ވަގުތީ ޗެއަރޕަރސަން އަބްދުލް ޣަފޫރު މޫސާ ވިދާޅުވެއްޖެ އެވެ.
އޭނާ އެފަދައިން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ.
އެކްސްގައި ކުރެއްވި ޕޯސްޓެއްގައި ރައީސް މުއިއްޒު ވަނީ ހޮނިހިރު ދުވަހު ބޭއްވި ލޯކަލް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބާއި، ރައްޔިތުންގެ ޚިޔާލު ހޯދުމުގެ ޢާންމު ވޯޓުގެ ނަތީޖާ އަށް އިޙްތިރާމާ އެކު ބަލައިގަންނަ ކަމަށެވެ. އަދި ސަރުކާރުން ރަނގަޅުކުރަންޖެހޭ ކަންކަން، ރައްޔިތުންގެ ވިންދާ އެއްގޮތަށް ރަނގަޅުކުރުމަށް ކުރަން ޖެހޭ މަސައްކަތްތައް މާތްالله ގެ ވާގިފުޅާއެކު ކުރިއަށް ގެންދަވާނެ ކަމަށް ވިދާޅުވި އެވެ.
އެކަމަށް އިޝާރާތް ކުރައްވައި ޣަފޫރު ވިދާޅުވީ، ގައުމުގެ ކަންކަން އިސްލާހު ކުރާ ނަމަ އިސްލާހުކޮށްފައި ނުކުރާނެ އެއްވެސް ކަމެއް ނެތް ކަމަށެވެ. އެހާވެސް ބޮޑަށް ގައުމުގެ ރައީސް މުއިއްޒުގެ އުމުރަށް ވުރެ އެ މަނިކުފާނު ވެވަޑައިގަންނަވާފައިވާ ވައުދުތައް ގިނަ ކަމަށް އޭނާ ވިދާޅުވި އެވެ. ދައުލަތް ހިންގަން ދީފައިވާ ފައިސާ އަށް ވެސް ރައީސް މުއިއްޒު ގެންދަވަނީ ޚިޔާނާތްތެރިވެ ވަޑައިގަންނަވަޑަމުން ކަމަށް ވެސް އޭނާ ވިދާޅުވި އެވެ.
"ރައްޔިތުންގެ ޓެކްސް ފައިސާ މިއީ. ރައްޔިތުން ތަހައްމަލް ކުރާނީ ވެސް ވަކި ވަރަކަށް. ކައުންސިލް އިންތިޚާބަކީ އާއިލާތަކަށް ބެހެ އިންތިޚާބެއް އެކަމަކު މި އިންތިޚާބުގައި ނިކުމެ މި ބުނީ ނޫނެކޭ. މިހާވަރު ވީމަ އަމިއްލަ އަށް އިސްތިއުފާދީފަ ގެއަށް ވަޑައިގަންނަވާ ހިސާބަށް މި ދިޔައީ. ގޯނީގަ މިހާރު އެއްޗެއް ނެތް. ދެނެއް އެއަށް އެއްޗެއް އަޅައިގެން ނުހިފެހެއްޓޭނެ." ޣަފޫރު ވިދާޅުވި އެވެ.
މީގެ އިތުރުން، ރައްޔިތުން ބޭނުން ވަނީ ރާއްޖޭގައި ޤާނޫނުގެ ބާރުވެރިކަން ހިނގާ ރާއްޖެ އެއް ކަމްށާއި، އިޖުތިމާއީ އަދާލަތު ގާއިމްވެފައި އޮތުން ކަމަށް ވެސް އޭނާ ވިދާޅުވި އެވެ. ޣަފޫރު ވަނީ ރައްޔިތުންގެ ބާރު ގެއްލޭ ކޮންމެ ފަހަރަކު ރައްޔިތުންގެ ބަސް ރައްޔިތުން ދާނީ އިއްވަމުން ކަމަށާއި އެއީ ރައްޔިތުން ވަރަށް ބޮޑަށް ވިސްނަން ޖެހޭ ކަމެއް ކަމަށް ޣަފޫރު ވަނީ ވިދަޅުވެފަ އެވެ.
