ފެނަކައިގެ ޑީއެމްޑީ އާރިފް މަގާމުން އިސްތިއުފާ ދެއްވައިފި
އިންތިޚާބުތަކުން ސަރުކާރު ހިންގާ ޕީއެންސީއަށް ލިބުނު ނާކާމިޔާބީއާ ގުޅިގެން، ފެނަކަ އާއި އެހެނިހެން ސަރުކާރު ކުންފުނިތަކުގެ އިސްވެރިންނާއި ބައެއް ސަފީރުން މަގާމުން ވަކިކޮށް ނުވަތަ އިސްތިއުފާ ދެއްވަން ވަނީ ފައްޓަވާފަ. މީގެ ތެރޭގައި މާފަންނު މެދު ދާއިރާގެ މެންބަރު އަސްމާ ރަޝީދުގެ އާއިލީ ބޭފުޅުން ހިމެނޭހެން، ސަރުކާރަށް ތާއީދު ނުކުރުމަށް ބާރުއެޅި ކަމުގެ ތުހުމަތު ކުރެވޭ ފަރާތްތައް ވެސް ހިމެނޭ. ސަރުކާރުގެ އިސް މަގާމުތަކަށް މި ބަދަލުތައް ގެންނަމުންދާއިރު، ބައެއް ބޭފުޅުން ވަކިކުރި ސަބަބު ރަސްމީކޮށް ހާމަކޮށްފައެއް ނުވޭ.
ފެނަކައިގެ ޑީއެމްޑީ އާރިފް (ވ) އަދި ސީއެފްއޯ ސަނޫން (ކ). | ފެނަކަ
ފެނަކަ ކޯޕަރޭޝަންގެ ޑެޕިއުޓީ މެނޭޖިން ޑިރެކްޓަރު މުހައްމަދު އާރިފް ކުއްލި ގޮތަކަށް މަގާމުން އިސްތިއުފާ ދެއްވައިފި އެވެ.
އާރިފް މަގާމުން އިސްތިއުފާ ދެއްވާފައި މިވަނީ، ހޮނިހިރު ދުވަހު ބޭއްވި އިންތިހާބުތަކުން ސަރުކާރު ހިންގާ ޕީއެންސީއަށް ލިބުނު ބޮޑު ނާކާމިޔާބީއާ ގުޅިގެން ސަރުކާރުގެ އިސް މަގާމުތަކުގައި ތިބި އެކި ފަރާތްތައް މަގާމުން ވަކިކޮށް ނުވަތަ އަމިއްލައަށް އިސްތިއުފަ ދެއްވަމުން ދާ ދަނޑިވަޅެއްގަ އެވެ.
އާރިފް އިސްތިއުފާ ދެެއްވި އިރު، ފެނަކައިގެ އިސް ދެ ވެރިއަކު ބުދަ ދުވަހު ވަނީ މަގާމުން ވަކިކޮށްފަ އެވެ. މަގާމުން ވަކިކުރީ ޗީފް ފައިނޭންޝަލް އޮފިސަރު (ސީއެފްއޯ) މުހައްމަދު ޖިހާދާއި، ޗީފް ރިސޯސަސް އޮފިސަރު އަބްދުﷲ ސަނޫނެވެ. މީގެ ކުރިން ވެސް ސިޔާސީ އިސް ފަރާތްތައް މަގާމުން ވަކިކުރި އިރު ސަރުކާރުން ސަބަބެއް ހާމަކޮށްފައި ނުވާ އިރު، ފެނަކައިގެ އިސް ވެރިން ވަކިކުރި ސަބަބެއް އެ ކުންފުނިން ވެސް އަދި ސަރުކާރުން ވެސް ހާމަކޮށްފައި ނުވެ އެވެ.
މީގެ އިތުރުން ފެނަކައިގެ މެނޭޖިން ޑިރެކްޓަރު މުހައްމަދު ނަޖާހު ވެސް ހޯމަ ދުވަހު ވަނީ މަގާމުން ވަކިކޮށްފަ އެވެ. މީގެ އިތުރުން އެމްޕީއެލްގެ މެނޭޖިން ޑިރެކްޓަރު މުހައްމަދު ރިޝްވާން ވެސް ވަނީ ރައީސް މުއިއްޒުގެ އެދިވަޑައިގަތުމަކަށް ހޯމަ ދުވަހުގެ ރޭގެ ވަގުތެއްގައި މަގާމުން އިސްތިއުފާ ދެއްވާފަ އެވެ. މި ބަދަލުތަކުގެ ތެރެއިން އެގްރޯނެޓުގެ މެނޭޖިން ޑިރެކްޓަރު ހުސައިން ދީދީ އާއި އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު އިބްރާހިމް ޝާހިދު ވެސް ހޯމަ ދުވަހު ވަނީ މަގާމުން ވަކިކޮށްފަ އެވެ.
މީގެ އިތުރުން ޔޫއޭއީގައި ރާއްޖެ ތަމްސީލްކުރައްވާ ދިވެހި ސަފީރު މުހައްމަދު ހުސައިން ޝަރީފު (މުންދު) އާއި، ޖެނީވާ އަށް ރާއްޖެއިން ކަނޑައަޅުއްވާފައިވާ ދާއިމީ މަންދޫބު ޑރ. ސަލްމާ ރަޝީދު ވަނީ މަގާމުން ވަކިކޮށްފަ އެވެ. މުހައްމަދު ހުސެއިން ޝަރީފަކީ ރައްޔިތުންގެ މަޖިލީހުގެ މާފަންނު މެދު ދާއިރާގެ ޕީއެންސީ މެންބަރު އަސްމާ ރަޝީދުގެ ދަރިކަލުންނެވެ. އަދި ޑރ. ސަލްމާއަކީ އަސްމާގެ ކޮއްކޯފުޅެވެ.
މި ދެ ބޭފުޅުން މަގާމުން ވަކިކޮށްފައި މިވަނީ، ސަރުކާރު ހިންގާ ޕީއެންސީއަށް ވޯޓު ނުދިނުމަށް ހިތްވަރުދީ ރައްޔިތުންގެ މަޖިލީހުގެ މާފަންނު މެދު ދާއިރާގެ މެންބަރު އަސްމާ ރަޝީދު ވާހަކަދައްކަވާ އޯޑިއޯއެއްގެ މައްސަލަ ފެންމަތިވެފައި ވަނިކޮށެވެ.
