ތ.ގާދިއްފުށިން ސަރުކާރަށް ލިބުނު ބައްޔަށް ފަހު، ބިން ހިއްކުމުގެ މަސައްކަތް ހުއްޓާލައި ތަކެތި ވެސް އަނބުރާ ގެންދަނީ
ތ. ގާދިއްފުށީ ކައުންސިލްގެ ހުރިހާ ގޮނޑިއެއް އެމްޑީޕީން ކާމިޔާބުކުރުމާ ގުޅިގެން، އެ ރަށުގެ ބިން ހިއްކުމުގެ މަޝްރޫއަށް ގެންގޮސްފައިވާ ސާމާނުތައް އަނބުރާ ގެންދަން ފަށައިފި. އެމްޓީސީސީއާ ހަވާލުކޮށްގެން ކުރިއަށްގެންދާ މި މަޝްރޫއުގެ މަސައްކަތް ހުއްޓާލައި ތަކެތި ބަނދަރުމައްޗަށް ޖަމާކުރަމުންދަނީ ސަރުކާރު ހިންގާ ޕާޓީއަށް ނާކާމިޔާބީއާ ކުރިމަތިވުމުން ބިރުދެއްކުމުގެ ގޮތުންކަމަށް އެ ރަށުން މައުލޫމާތު ދީފައިވެ.
ގާދިއްފުށީ ބިންހިއްކަން ގެންދިޔަ ތަކެތި އަނބުރާ ގެންދަނީ | ސޯޝަލް މީޑިއާ
ތ. ގާދިއްފުށިން ނިމިދިޔަ ކައުންސިލް އިންތިޚާބުގައި ސަރުކާރަށް ލިބުނު ބޮޑު ބައްޔަށް ފަހު އެ ރަށް ހިއްކުމަށް ގެންގޮސްފައިވާ ތަކެއްޗާއި، ވަސީލަތްތައް އެ ރަށުން އަނބުރާ ގެންދަން ފަށައިފި އެވެ.
ތ. ގާދިއްފުށި ބިން ހިއްކުމުގެ މަޝްރޫޢުގެ އެއްބަސްވުމުގައި މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީ (އެމް.ޓީ.ސީ.ސީ) އާއެކު ސޮއިކޮށްފައި ވަނީ މި ވެރިކަމުގެ ތެރޭގަ އެވެ. ނިމިދިޔަ އިންތިޚާބާއި ދިމާކޮށް އެތަން ހިއްކުމުގެ މަސައްކަތް ކުރިއަށް ދިޔަ ކަމަށް އެ ރަށުން މި ނޫހަށް މައުލޫމާތު ދިން ފަރާތްތަކުން ވަނީ ބުނެފަ އެވެ.
ތ. ގާދިއްފުށީގައި މިހާރު އޮތީ ޕީއެންސީގެ ކައުންސިލެއް ކަމަށް ވީ ނަމަވެސް ކައުންސިލް އިންތިޚާބުގެ އެއްވެސް ގޮނޑި އެއް އެ ޕާޓީ އަށް ކާމިޔާބު ވެފަ އެއް ނުވެ އެވެ. އާ ކައުންސިލަށް ހޮވުނީ އެމްޑީޕީގެ ކެނޑިޑޭޓުންނެވެ. ކައުންސިލަށް ހޮވުނު މެމްބަރުންނަކީ ކައުންސިލްގެ ރައީސް ކަމަށް މުހައްމަދު މުއާޒް، ދެ މެމްބަރުންނަކީ މުހައްމަދު ހަސަން އަދި ޒުލޭހާ އަހުމަދު އެވެ.
ކައުންސިލަށް ޕީއެންސީ ނުހޮވުމާއި އެކު އެ ތަނުގައި ތިބި މީހުން އަނބުރާ ގެންދިއުމަށް ވެސް މަސައްކަތް ކުރަމުންދާ ކަމަށް އެ ރަށުން މައުލޫމާތު ދިން މީހަކު ވަނީ ބުނެފަ އެވެ. އަދި ބިން ހިއްކުމަށް ރޭގަނޑު މަސައްކަތް ކުރަން ގެންގުޅޭ ލައިޓާއި އެހެނިހެން ސާމާނު ވެސް އަނބުރާ ގެންދިއުމަށް ތައްޔާރުވެފައިވާ ކަމަށް އޭނާ ވަނީ ބުނެފަ އެވެ.
"ފެނިގެން މި ދަނީ ވޯޓަށް ތަކެތި އެރުވިތަން. އެއް ދުވަސްވީ ވޯޓަށް މި ތަކެތި ގެނައީ ވެސް. މިހާރު ނުހޮވުނީމަ އަނބުރާ ގެންދަނީ." އޭނާ ވަނީ ބުނެފަ އެވެ.
އެ ރަށުން މައުލޫމާތި ދިން އިތުރު މީހަކު ބުނީ ޕީއެންސީ ނުހޮވުނު ހިސާބުން އެ ރަށުގައި ހުރި ބިންހިއްކަން ގެންދިޔަ ތަކެތި އަނބުރާ ފޮނުވާލަންވީ ކަމަށް ބުނެ ޕީއެންސީ އިން ބިރު ދައްކާފައިވާ ކަމަށެވެ. އަދި އެ ބިރުދެއްކުމާއި އެއްގޮތަށް ތަކެތި އަނބުރާ ގެންދާ ކަމަށް އޭނާ ވަނީ ބުނެފަ އެވެ. އަނބުރާ ގެންދިއުމަށްޓަކައި ބަނދަރުމައްޗަށް ތަކެތި އެއްކޮށްފައިވާ މަންޒަރު ފެނުނު ކަމަށް އޭނާ ވަނީ ބުނެފަ ެވެ.
ތ. ގާދިއްފުށީގެ ބިން ހިއްކުމުގެ މަޝްރޫޢު ހަވާލުކޮށްފައި ވަނީ މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީ އާއި އެވެ. 110,455,574.40 ރުފިޔާގެ އަގަކަށް ހަވާލުކޮށްފައިވާ މި ކޮންޓްރެކްޓްގެ މުއްދަތަކީ 540 ދުވަހެވެ.
މި މަޝްރޫޢުގެ ދަށުން ކުރުމަށް ހަމަޖެހިފައިވާ މައިގަނޑު މަސައްކަތްތަކަކީ 10 ހެކްޓަރުގެ ބިން ހިއްކުން (390،701 ކޮޑިމީޓަރު ވެލިން)މާއި، 100 މީޓަރުގެ ބޮޑުހިލަ ބްރޭކްވޯޓަރޖެހުމާއި، 704 މީޓަރުގެ ބޮޑުހިލަ ރިވެޓްމަންޓްޖެހުމާއި އަދި 100 މީޓަރުގެ ގްރޮއިން ލުމެވެ.
