55 މެންބަރުންގެ ސޮޔާއެކު އެމްޑީޕީގެ ޗެއާޕަރސަން ކަމުން ޣަފޫރު ވަކިކުރަން ހުށަހަޅައިފި
އެމްޑީޕީގެ ވަގުތީ ޗެއާޕަރސަން އަބްދުއްޣަފޫރު މޫސާ މަގާމުން ވަކިކުރަން ހުށަހެޅީ، ޕާޓީގެ އަސާސީ ގަވާއިދާ ޚިލާފަށް އިސް މަގާމުތަކުން މީހުން ވަކިކޮށް، ޕާޓީގެ މަސްލަހަތު ހިމާޔަތްކުރުމަށް އޭނާ ނުކުޅެދިފައިވާ ކަމަށް ބުނެ. މި މައްސަލައިގައި ފާހަގަކޮށްފައިވާ ގޮތުގައި، ޣަފޫރު ނިންމުންތައް ނިންމަވަނީ އެހެން ފަރާތްތަކުގެ ނުފޫޒުގެ ދަށުން ކަމަށްވާތީ، މީގެ ސަބަބުން ޕާޓީ ބައިބައިވެ އާންމު މެންބަރުންގެ އިތުބާރު ގެއްލުމުގެ ބިރު އެބައޮތް. އެހެންކަމުން ޕާޓީގެ ކުރިމަގަށްޓަކައި މިނިވަންކަމާއެކު މަސައްކަތްކުރާނެ ފަރާތަކާ ޗެއާޕަރސަންގެ މަސްއޫލިއްޔަތު ހަވާލުކުރުން މުހިންމު ކަމަށް 55 މެންބަރުންގެ ސޮއިކޮށް ހުށަހެޅި މައްސަލައިގައި ބަޔާންކޮށްފައިވޭ.
އެމްޑީޕީގެ ވަގުތީ ޗެއަރޕާސަން އަބްދުލްޣަފޫރު މުސާ (ގަޕޯ) | ރާއްޖެ އެމްވީ
މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ 55 މެންބަރުންގެ ސޮޔާއެކު އެ ޕާޓީގެ ވަގުތީ ޗެއާޕަރސަން، ހަނިމާދޫ ދާއިރާގެ މެންބަރު އަބްދުއްޣަފޫރު މޫސާ އެ މަގާމުން ވަކި ކުރަން ހުށަހަޅައިފި އެވެ.
އަންގާރަ ދުވަހު ހުށަހަޅާފައިވާ އެ މައްސަލައިގައި ބުނެފައި ވަނީ އެމްޑީޕީ ގެ ގައުމީ މަޖިލީހުން އެ ޕާޓީގެ ވަގުތީ ޗެއާޕަރސަން ކަމުގެ މަގާމު ޣަފޫރު އާ ހަވާލު ކުރީ ސަރުކާރުން ހިންގަމުންދާ ބޮޑެތި ޖަރީމާތަކާ ޚުދުމުހުތާރު ނިޒާމަކަށް މުޅި ދައުލަތް އެކުގައި ފުރޮޅާލުމަށް ކުރަމުންދާ މަސައްކަތް ހުއްޓުވުމަށް ޕާޓީ އިން ކުރަން ޖެހޭ މަސައްކަތް އިންތިޒާމު ކުރުމަށް ކަމަށެވެ.
މި ވަގުތަކީ ދުނިޔޭގެ ބޮޑު ހަނގުރާމަ އެއް ކުރަމުންދާ ވަގުތަކަށް ވެފައި، އެކަމާ ގުޅިގެން ސަރުކާރުން ގެންގުޅޭ ސިޔާސަތުތަކަކީ ރާއްޖެއާ ދިވެހިންނަށް ދަތިތަކާ ކުރިމަތިލާންޖެހޭ ގޮތަށް އަމަލުކުރަމުންދާ ސިޔާސަތުތަކަށް ވީއިރު އެތައް ބައިވަރު ދިވެހީން އެމްޑީޕީގެ ކިބައިން އެދެމުން އަދި އުއްމީދު ކުރަމުން ދިޔައީ މި ރާއްޖެ ސަލާމަތުގެ އައްސޭރިއަށް ގެންދާނެ ކަމަށް ކަމަށް ވެސް މައްސަލައިގައި ވެ އެވެ.
ރައްޔިތުންގެ އެ އުއްމީދާ އެއްގޮތަށް އެކަންކަން ހާސިލުކުރެވޭނީ ޕާޓީގެ މަސްލަހަތު ހިފަހައްޓައި ޕާޓީ އަށް ތާއީދު އިތުރުކޮށް، އާންމު މެންބަރުން ޕާޓީގެ ލީޑަރުންގެ ގޮތުގައި ބަލާ އެއްވެސް ބޭފުޅަކު ބާކީ ނުކޮށް، އާންމު މެންބަރުންގެ އިހުސާސްތައް ދެނެގަނެގެން ޗެއާޕަރސަންގެ މަސްއޫލިއްޔަތު އަދާ ކޮށްގެން ކަމަށް ވެސް އެ މައްސަލައިގައި ވެ އެވެ. މައްސަލައިގައި ބުނީ އެހެން ނަމަވެސް ފެންނަމުން ދަނީ ވަގުތީ ޗެއާޕަރސަންގެ މަސްއޫލިއްޔަތު އަދާކުރެއްވުމުގައި ނިންމަންޖެހޭ ނިންމުންތައް ނިންމެވުމުގައި އެހެން ފަރާތްތަކުން އަންގަވާ ގޮތްގޮތަށް ނިންމުންތައް ނިންމަމުން ގެންދާ މަންޒަރު ކަމަށެވެ.
ޚާއްސަކޮށް ޕާޓީގެ އަސާސީ ގަވާއިދާ ކަނޑައެޅިގެން ޚިލާފަށް އަމަލު ކުރަން ފަށާފައިވާ ކަމަށް ވެސް ބުނެފައި ވެ އެވެ. އެގޮތުން ޕާޓީގެ ޗެއާޕަރސަންގެ ނައިބު އިބްރާހިމް ވަހީދު އެ މަގާމުން ވަކިކުރިކަމަށް އެންގުން ހިމެނޭ ކަމަށާއި ޕާޓީގެ ލީގަލް ޑިރެކްޓަރު އަހުމަދު މައުރޫފް ވެސް ކުއްލިގޮތަކަށް އެ މަގާމުން ވަކި ކޮށްފައިވާ ކަމަށާއި އޭނާ ވަކި ކުރި އެއްވެސް ސަބަބެއް ވެސް އަންގާފައި ނުވާ ކަމަށް ވެސް މައްސަލައިގައި ވެ އެވެ.
އެ މައްސަލައިގައި ބުނީ މި ވަގުތަކީ ނިމިދިޔަ އިންތިޚާބާ ގުޅޭ ގޮންނާއި އެހެނިހެން ކަންކަމާ ގުޅިގެން ވެސް ޕާޓީގެ ފަރާތުން ދައުލަތުގެ އެކިއެކި މުއައްސަސާތަކަށް މައްސަލަތައް ހުށަހެޅި އެ މައްސަލަތަކާ ގުޅޭ ގޮތުން އެތައް މަސައްކަތެއް ކުރެވެމުންދާ ވަގުތެއް ކަމަށެވެ. އަދި މިފަދަ ވަގުތެއްގައި ކުއްލި ގޮތަކަށް ޕާޓީގެ ލީގަލް ޑިރެކްޓަރު އެއްވެސް ސަބަބެއް އެންގުމަކާ ނުލައި ވަކިކުރުމަކީ ޕާޓީގެ މެންބަރުންގެ މެދުގައި ހިތް ނުތަނަވަސްކަން އުފެދޭނެ ކަމެއް ކަމަށެވެ.
މި އެންމެހައި ކަންކަމުގެ ސަބަބުން ރައްޔިތުންގެ މެދުގައި އެމްޑީޕީ އަށް އިތުރުވާން ފަށާފައިވާ ތާއީދާއި އިތުބާރު ގެއްލުމުގެ ފުރުސަތު އިތުރުވެފައިވާ އިރު، ޕާޓީގެ އާންމު މެންބަރުންގެ މެދުގައި ފިތުނަވެރިކަން އުފެދި ޕާޓީ ބައިބައި ވުމަށް މަގުފަހި ވެގެން ދާނެ ކަމަށް ވެސް ފާހަގަކޮށްފައި ވެ އެވެ. މި ދަނޑިވަޅުގައި ވަގުތީ ޗެއާޕަރސަން ޣަފޫރު ވަނީ ޕާޓީ އާ މެންބަރުންގެ މަސްލަހަތު ހިމާޔަތް ކުރަން ނުކުޅެދިފައި ކަމަށާއި މިވަގުތަށް އެންމެ ރަނގަޅު ގޮތަކީ އޭނާ އެ މަގާމުން އެއްފަރާތްވެ، މިނިވަންކަމާއި އިންސާފުރެވިކަމާއެކު މެންބަރުންގެ މަސްލަހަތު ހިމާޔަތް ކޮށް ޕާޓީ އަށް އޮތް ތާއީދާއި އިތުބާރު އިތުރުކުރުމަށް މަސައްކަތް ކުރާނެ ފަރާތަކާ އެ މަގާމު ހަވާލު ކުރުން ކަމަށް ވެސް މައްސަލައިގައި ވެ އެވެ.
އެހެންކަމުން 55 މެންބަރުންގެ ސޮޔާއެކު ހުށަހަޅާފައި ވަނީ އެ ޕާޓީގެ ވަގުތީ ޗެއާޕަރސަން، ހަނިމާދޫ ދާއިރާގެ މެންބަރު އަބްދުއްޣަފޫރު މޫސާ އެ މަގާމުން ވަކި ކުރުމަށެވެ.
