ވ.އަތޮޅުން ލޯންޗު ބަންޑުން ޖަހާލި ހާދިސާގައި ގެއްލުނު ދެމީހުން ހޯދުމަށް ޑައިވް ކޮށްގެން އެކަނި ވެސް 253,662.6 އަކަ މީޓަރަށް ވުރެ ބޮޑު ސަރަހައްދެއް ވަނީ ބަލާފައި، އަދިވެސް ނުފެނޭ!
28 މާރިޗު 2026 | ހޮނިހިރު 07:52ކެޔޮދޫ ކައިރިން ދަތުރުކުރި ލޯންޗެއް ބަންޑުންޖަހާލައި ގެއްލުނު އިންޑިއާގެ ދެ މީހުން ހޯދުމަށް ކަނޑާއި، ވައިގެ މަގުން އަދި ކަނޑުއަޑިން ބޮޑު ސަރަހައްދެއް ބަލާފައިވީ ނަމަވެސް، މިހާތަނަށް އެމީހުން ފެނިފައެއް ނުވޭ. ހަތް މީހުންނާއެކު ދަތުރުކުރި މި އުޅަނދުން ކަނޑުވި މީހުންގެ ތެރެއިން ފަސް މީހަކު ސަލާމަތްކޮށްފައިވާއިރު، ގެއްލުނު މީހުން ހޯދުމުގެ މަސައްކަތް އެމްއެންޑީއެފް ކޯސްޓްގާޑުން މެދުކަނޑާނުލައި ދަނީ ކުރަމުން.
ވ. ކެޔޮދޫ ކައިރިން ދަތުރުކުރި ލޯންޗު ބަންޑުން ޖަހާލި ސަރަހައްދު. ގެއްލުނު ދެމީހުން ހޯދުމަށް ކަނޑާއި ވައިގެ މަގުން ބޮޑު ސަރަހައްދެއް ވަނީ ބަލާފައި. | އެމްއެންޑީއެފް
ވ. ކެޔޮދޫ ކައިރިން ދަތުރުކުރި ލޯންޗުން ގެއްލުނު ދެ މީހުން ހޯދުމަށް ބޮޑު ސަރަހައްދެއް ބަލާފައިވާ ކަމަށާއި، އަދިވެސް ނުފެންނަ ކަމަށް އެމްއެންޑީއެފުން ބުނެފި އެވެ.
އެމްއެންޑީއެފުން ބުނީ، ކޯސްޓްގާޑުން ފެށި ޚާއްސަ އޮޕަރޭޝަންގައި ގެއްލުނު ދެ މީހުން ހޯދުމަށް ވަރަށް ބޮޑު ސަރަހައްދެއް ބަލާފައިވާ ކަމަށާއި، ގެއްލުނު މީހުން ހޯދުމުގެ މަސައްކަތް މެދުކަނޑާނުލާ ކުރިއަށްދާ ކަަމަށެވެ.
މާރިޗު 20 ވަނަ ދުވަހުގެ ދަންވަރު 00:40 ހާއިރު ކެޔޮދޫގެ ހުޅަނގު ދެކުނުން ގާތްގަނޑަކަށް 2 ނޯޓިކަލް މޭލު ބޭރުން ހިނގި މި ހާދިސާގައި ގެއްލުނު ދެ މީހުން ހޯދުމަށް ވައިގެ މަގުން 2,544 އަކަ ނޯޓިކަލް މޭލަށް ވުރެ ބޮޑު ސަރަހައްދެއް ވަނީ ބަލާފަ އެވެ. އަދި ކަނޑުގެ ސަތަހައިން 269 އަކަ ނޯޓިކަލް މޭލަށް ވުރެ ބޮޑު ސަރަހައްދެއް ބަލާފައިވާއިރު، ކަނޑު އަޑިން (ޑައިވް ކޮށްގެން) 253,662.6 އަކަ މީޓަރަށް ވުރެ ބޮޑު ސަރަހައްދެއް ބަލާފައިވާ ކަމަށް އެމްއެންޑީއެފުން ބުނެ އެވެ.
މީގެ އިތުރުން އެމްއެންޑީއެފުން ބުނީ، މިކަމާ ގުޅޭ އެއްވެސް މައުލޫމާތެއް ނުވަތަ ނިޝާނެއް ފެނިއްޖެނަމަ ލަސްނުކޮށް ރިޕޯޓު ކޮށްދިނުމަށް އެދޭ ކަަމަށެވެ.
މި ހާދިސާ ހިނގިއިރު އިނގިރޭސި ވިލާތާއި ރަޝިއާގެ ދެ އަންހެނުންނާއި އިންޑިއާގެ ފަސް މީހުންނާއެކު ޖުމްލަ ހަތް މީހުން ތިއްބެވެ. މި ހާދިސާގައި ގެއްލިފައިވަނީ އިންޑިއާގެ ދެ މީހުންނެވެ. ބާކީ ތިބި މީހުން ކަނޑުވެފައި ތިއްބާ ވަނީ ސަލާމަތްކޮށްފަ އެވެ. އަދި މި ހާދިސާގައި އަނިޔާވި ތިން މީހަކަށް ވ. އަތޮޅު ހޮސްޕިޓަލުގައި ފަރުވާ ވެސް ދީފައިވެ އެވެ.
