އެމްއޭސީއެލް ގައި ޑޮލަރު ހުންނާތީ މި ސަރުކާރުން މަޝްރޫއުތައް ހަވާލު ކުރަނީ އެތައް ގުނައެއް އަގުބޮޑުކޮށްފަ: އާޒިމް
އެމްޓީސީސީގެ ގާބިލުކަން ހުރި މަޝްރޫއުތައް އެމްއޭސީއެލްއާ ހަވާލުކުރަނީ އެ ކުންފުނީގައި ހުރި ޑޮލަރު ބޭނުންކޮށްގެން ނަހަމަ ގޮތުގައި މުއާމަލާތްތައް ހިންގުމަށް ކަމަށް މާލެ ސިޓީގެ މޭޔަރު އާދަމް އާޒިމް ވިދާޅުވެއްޖެ. ރަސްމާލެ މަޝްރޫއަށް ބޮޑު ހޭދައެއް ކޮށްފައިވާއިރު، ސަރުކާރުން ދައުލަތުގެ ފައިސާ އިސްރާފުކޮށް ކަންކަން ހާމަކަން ބޮޑު ގޮތެއްގައި ކުރިއަށް ނުގެންދާ ކަމަށް އޭނާ ވިދާޅުވި. އަދި ގައުމުގެ އިގްތިސާދީ ހާލަތާއި ކަންކަން ހިނގާ ގޮތް ރައީސުލްޖުމްހޫރިއްޔާއަށް އެނގިވަޑައިނުގަންނަވާ ކަމަށް ވިދާޅުވެ އާޒިމް ވަނީ ސަރުކާރަށް ވަރަށް ބޮޑަށް ފާޑުވިދާޅުވެފަ.
އައްޑޫ ހުޅުދޫ ދާއިރާގެ "އަފިރިންގެ ޖަގަހަ" ހުޅުވުމުގެ ރަސްމިއްޔާތު | އެމްޑީޕީ ސެކްރިޓޭރިއެޓް
މި ސަރުކާރުން މޯލްޑިވްސް އެއަރޕޯޓްސް ކޮމްޕެނީ ލިމިޓެޑް އާ ބިން ހިއްކުމުގެ މަޝްރޫއުތައް ފަދަ މަޝްރޫއުތައް ހަވާލު ކުރަނީ އެތައް ގުނައެއް އަގުބޮޑު ކޮށް ކަމަށާ އެއީ އެ ކުންފުނީގައި ޑޮލަރު ހުންނާތީ ކަމަށް މާލެ ސިޓީގެ މޭޔަރު އާދަމް އާޒިމް ވިދާޅުވެއްޖެ އެވެ.
އައްޑޫ ހުޅުދޫ ދާއިރާގެ "އަފިރިންގެ ޖަގަހަ" ހުޅުވުމުގެ ރަސްމިއްޔާތުގައި ވާހަކަ ދައްކަވަމުން އާޒިމް ވިދާޅުވީ މި ސަރުކާރުން ކޮންމެ ކަމެއް ވެސް ކުރަނީ އަމިއްލަ ޖީބަށް ބޮޑުވާ ގޮތަށް ކަމަށެވެ.
އެގޮތުން މަޝްރޫއުތައް ކުރިއަށް ގެންދިއުމުގެ ގާބިލުކަން އެމްޓީސީސީ ގައި ވެސް އެބަހުރި ކަމަށާއި ނަމަވެސް އެމްއޭސީއެލް އާ ބިން ހިއްކުމުގެ މަޝްރޫއުތައް މާ ބޮޑު އަގުގައި ހަވާލު ކޮށްގެން އުޅެނީ އެ ކުންފުނީގައި ޑޮލަރު ހުންނާތީ ކަމަށް އާޒިމް ވިދާޅުވި އެވެ.
އަޅުގަނޑުމެންގެ ބޭންކުގަ ޑޮލަރު ނެތީމަ ބިން ހިއްކައިގެން އެކި ގޮތްތޮތަަށް ވިޔާނުދާ ކަންތައްތައް ކުރުމުގެ ބޭނުމުގައި އެމްއޭސީއެލްގެ ދަށަށް ހުރިހާ ޕްރޮޖެކްޓެއް އެ ގެންދަނީ. އެމްޓީސީސީ ގެ ގާބިލުކަން ހުއްޓާ. ބިން ހިއްކުމުގެ ޕްރޮޖެކްޓްތައް ވެސް އެމްއޭސީއެލް ގެ ދަށަށް އެ ގެންދަނީ އެމްއޭސީއެލް ގަ ޑޮލަރު ހުންނާނެތީ. އެތަނުން ޑައިރެކްޓް ކޮށް، ބޭރު ފަރާތްތަކަށް ޕޭ ކުރެވޭނެތީ. މި ނޫން އެއްވެސް ކަމެއް ކުރާކަށް ނޫން. މުޅިން މަކަރާ ހީލަތުން މި ކަންތައްތައް ކުރަނީ.މާލެ ސިޓީގެ މޭޔަރު އާދަމް އާޒިމް
އާޒިމް ވިދާޅުވީ ރަސްމާލެ ހިއްކުމުގެ މަޝްރޫއަކީ 35 މިލިއަން ޑޮލަރަށް އެމްޓީސީސީ އާ ހަވާލު ކޮށްގެން ނިންމެން އޮތް މަޝްރޫއެއް ކަމަށެވެ. ނަމަވެސް މިއަދު މި ސަރުކާރުން އެ މަޝްރޫއު އަށް 200 މިލިއަނެއް ހާ ޑޮލަރު ޚަރަދު ކޮށްފައިވާ ކަމަށާއި ރައްޔިތުންގެ ފައިސާ އިން މި ސަރުކާރުން މުޅިން ވެސް ކުރަނީ އިސްރާފު ކަމަށެވެ.
މިއަދު މި ސަރުކާރުން މި ގޮތަށް އަމަލު ކުރަނީ ކޮން ބޭނުމަކު ތޯ ވެސް ބަލަން ޖެހޭ ކަމަށް އާޒިމް ވިދާޅުވި އެވެ. އަދި ވިދާޅުވީ މި ސަރުކާރު އައި ފަހުން މި ގައުމަށް ތަރައްގީ އެއް ނާންނަ ކަމަށެވެ. ނަމަވެސް ދައުލަތުން 36 ބިލިއަން ރުފިޔާ ހުސް ކޮށްލާފައިވާ ކަމަށާއި މި ފައިސާ ޚަރަދު ކުރީ ކޮން ކަމަކަށް ކަން އެނގޭނެ މީހަކު ވެސް ނެތް ކަމަށް މޭޔަރު ވިދާޅުވި އެވެ.
އާޒިމް ވިދާޅުވީ މިއަދު ގައުމާ ހަވާލުވެ ހުރި ރައީސް ޑރ. މުހައްމަދު މުއިއްޒަށް ގައުމުގެ އެއްވެސް ކަމެއް އެނގިވަޑައިނުގަންނަވާ ކަމަށެވެ. އަތުގަ އޮތީ ކޮން އެއްޗެއް ކަން އެމަނިކުފާނަށް އެނގިވަޑައި ނުގަންނަވާއިރު އެސްޓީއޯ ގަ ހުރީ ކިހާ ތެލެއް ކަމެއް، ކިހާ ގޭހެއް ކަން ވެސް އެމަނިކުފާނަށް އެނގިވަޑައިނުގަންނަވާ ކަމަށް އާޒިމް ވިދާޅުވި އެވެ. އަދި ބޭރުން މި ތަކެތި ލިބެނީ ކޮން އަގެއްގައި ކަން ވެސް އެމަނިކުފާނަށް އެނގިވަޑައިނުގަންނަވާ ކަމަށް އާޒިމް ވިދާޅުވި އެވެ.
އާޒިމް ވަނީ މިގޮތަށް ކަންތައް ކުރާ ވެރިއަކަށް އިތުރު ބާރެއް ރައްޔިތުން ދޭން ޖެހޭ ސަބަބެއް ފެނިވަޑައިނުގަންނަވާ ކަމަށް ވެސް ވިދާޅުވެފަ އެވެ.
