އިންގްލޭންޑުން ފުރަތަމަ އޯޑީއައި ކާމިޔާބުކޮށްފި

އިންގްލޭންޑާއި ވެސްޓް އިންޑީސްއާ ދެމެދު ކުރިޔަށްދާ ފަސް މެޗުގެ އޯޑީއައި ސީރީސްގައި ކުޅުނު ފުރަތަމަ މެޗު އިންގްލޭންޑްއިން ކާމިޔަބުކޮށްފިއެވެ.

މެންޗެސްޓަރ ގައި ހުންނަ އޯލްޑް ޓްރެފޯޑް ސްޓޭޑިއަމްގައި ކުޅުނު މި މެޗު އިންގްލޭންޑްއިން ކާމިޔާބު ކޮށްފައިވަނީ ހަތް ވިކެޓުންނެވެ.

މި މެޗުގައި ޓޮސް ދިމާވެގެން ކުޅެން އަރާ ވެސްޓް އިންޑީސްއިން ވަނީ 42 އޯވަރުގެ ތެރޭގައި 9 ކުޅުންތެރިން ނުބައިވެގެން 204 ލަނޑު ހަދާފައެވެ. އަދި މި އިނިންގްސްގައި އެ ޓީމުންވަނީ 9 ވިކެޓް ނަގާފައެވެ. ވެސްޓް އިންޑީސްއިން މި އިނިންގްސްގައި އެންމެ ރަނގަޅަށް ބެޓް ކުރީ 33 ބޯޅައިން 41 ލަނޑު ހެދި އެ ޓީމުގެ ކެޕްޓަން ޖޭސަން ހޯލްޑާއެވެ. އަދި އޭނާގެ ފަހަތުން ދެން އެންމެ ރަނގަޅަށް ބެޓް ކުރީ 27 ބޯޅައިން 37 ލަނޑު ހެދި ކްރިސް ގޭލްއެވެ.

ޖަވާބުގައި ކުޅެން އަރާ އިންގްލޭންޑުންވަނީ 31 އޯވަރުގެ ތެރޭގައި ތިން ކުޅުންތެރިން ނުބައިވެގެން 210 ލަނޑު ހަދާފައެވެ. މި އިނިންގްސްގައި އެ ޓީމުން ވަނީ 3 ވިކެޓް ނަގާފައެވެ. އިންގްލޭންޑުން މި އިނިންގްސްގައި އެންމެ ރަނގަޅަށް ބެޓް ކުރީ 97 ބޯޅައިން 100 ލަނޑު ހެދި ޖޮނީ ބެއަސްޓޯއެވެ. މިއީ އޯޑީއައި މެޗެއްގައި އޭނާ ފުރިހަމަ ކުރި ފުރަތަމަ ސެންޗަރީއެވެ. އޭނާގެ ފަހަތުން ދެން އެންމެ ރަނގަޅަށް ބެޓް ކުރީ 53 ބޯޅައިން 54 ލަނޑު ހެދި ޖޯ ރޫޓްއެވެ.

ވެސްޓް އިންޑީސް މި އޯޑީއައިގެ ފުރަތަމަ މެޗުން ބަލިވުމާއެކު 2019 ވަނަ އަހަރު އޮންނަ އައިސީސީ ކްރިކެޓް ވާރލްޑްކަޕަށް ކޮލިފައިވުމުގެ ފުރުސަތު ވަނީ ގެއްލިފައެވެ. އެގޮތުން ކްރިކެޓްގެ ދުނިޔޭގެ ޗެމްޕިއަންކަން ދެ ފަހަރު ހޯދި ވެސްޓް އިންޑީސްއަށް 78 ޕޮއިންޓް ލިބިފައިވީ ނަމަވެސް މި މެޗުން ބަލިވުމާއެކު އެ ޓީމަށް އޮޓަމެޓިކް ކޮލިފިކޭޝަންގެ ޖާގަ ވަނީ ގެއްލިފައެވެ. ވެސްޓް އިންޑީސްގެ ބަދަލުގައި މި ޖާގަ ލިބިފައިވަނީ ސްރީ ލަންކާއަށެވެ.

މި ސީރީސްގެ ދެވަނަ މެޗު އޮންނާނީ ބުރާސްފަތި ދުވަހު ވެސްޓް ބްރިޖްފޯޑްގައެވެ.