ފުރަތަމަ އޯޑީއައި އިންޑިއާއިން ކާމިޔާބުކޮށްފި

އިންޑިއާ އާއި އޮސްޓްރޭލިއާ ދެމެދު ކުރިޔަށްދާ ފަސް މެޗުގެ ސީރިސްގެ ފުރަތަމަ މެޗު އިންޑިއާއިން ކާމިޔާބުކޮށްފިއެވެ.

އިންޑިއާގެ ޗެންނާއިގައި ކުރިޔަށްދިޔަ މި ސީރީސްގެ ފުރަތަމަ މެޗު އިންޑިއާއިން ކާމިޔާބުކުރީ 26 ލަނޑުންނެވެ. މި މެޗުގައި ވިއްސާރަވުމުގެ ސަބަބުން ފުރަތަމަ އިނިންގްސްގައި އޮސްޓްރޭލިއާއިން ބެޓު ކުރަން ޖެހުނު އޯވަރުގެ އަދަދު 21 އަށް ތިރިކުރެވުނެވެ. އަދި އެ ޓީމު މެޗުން މޮޅުވާން ހަދަން ޖެހޭ ލަނޑުގެ އަދަދު 164 އަށް ތިރިކުރެވުނެވެ.

އިންޑިއާއިން ޓޮސް ދިމާވެގެން ކުޅެންއަރާ 50 އޯވަރުގެ ތެރޭގައި ވަނީ ހަތް ކުޅުންތެރިން ނުބައިވެގެން 281 ލަނޑު ހަދާފައެވެ. މި އިނިންގްސްގައި އިންޑިއާއިން އެންމެ ރަނގަޅަށް ބެޓް ކޮށްފައި ވަނީ 66 ބޯޅައިން 83 ލަނޑު ހެދި ހަރުދިކް ޕަންޑްޔާއެވެ. އޭނާގެ ފަހަތުން ދެން އެންމެ ރަނގަޅަށް ބެޓް ކުރީ 88 ބޯޅައިން 79 ލަނޑު ހެދި މަހިންދްރާ ސިންގް ދޯނީއެވެ.

ޖަވާބުގައި ކުޅެން އަރާ އޮސްޓްރޭލިއާއިން ވަނީ 21 އޯވަރުގެ ތެރޭގައި ނުވަ ކުޅުންތެރިން ނުބައިވެގެން 137 ލަނޑު ހަދާފައެވެ. މި އިނިންގްސްގައި އޮސްޓްރޭލިއާއިން އެންމެ ރަނގަޅަށް ބެޓް ކުރީ 18 ބޯޅައިން 39 ލަނޑު ހެދި ގްލެން މެކްސްވެލްއެވެ. އޭނާގެ ފަހަތުން ދެން އެންމެ ރަނގަޅަށް ބެޓް ކުރީ 25 ބޯޅައިން 32 ލަނޑު ހެދި ޖޭމްސް ފޯލްނާއެވެ.

މި ސީރީސްގެ ދެވަނަ މެޗު ކުޅުމަށް ހަމަޖެހިފައި ވަނީ ބުރާސްފަތި ދުވަހު ކޮލްކަތާގައެވެ.