އައް ނަޞްރުގެ ފަރިތަކުރުން ތަކުގައި ރޮނާލްޑޯ ބައިވެރިވާން ފަށައިފި

އަނިޔާގެ ސަބަބުން ކުޅުމާ ދުރުގައި ހުރި ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ، އޭނާ ކުޅެމުން އަންނަ ސައުދީ ޕްރޯ ލީގުގެ އައް ނަޞްރުގެ ފަރިތަކުރުން ތަކުގައި ބައިވެރިވާން ފަށައިފި އެވެ.

ރޮނާލްޑޯ އަށް އަނިޔާވެފައި ވަނީ ފެބްރުވަރީ މަހުގެ 26 ވަނަ ދުވަހު އައް ނަޞްރުން ކުޅުނު މެޗުގަ އެވެ. އެ މެޗުގައި ރޮނާލްޑޯ އަށް އަނިޔާވި ނަމަވެސް، އޭގެ ފަހުން އަލް ފައިޙާއާ ދެކޮޅަށް ކުޅުނު މެޗުގައި އޭނާ ކުޅުނެވެ. ނަމަވެސް، އޭގެ ފަހުން ނިއޯމްއާ ދެކޮޅަށް ކުޅުނު މެޗާއި، އަލް ޚަލީޖާ ދެކޮޅަށް ކުޅުނު މެޗުގައި ރޮނާލްޑޯ ކުޅެފައި ނުވެ އެވެ.

އަނިޔާ އިން މުޅިން ރަނގަޅު ނުވުމުގެ ސަބަބުން، ޕޯޗުގަލް އިން ކުޅެން އޮތް ދެ މެޗަށް އެކުލަވާލި ސްކޮޑުގައި ވެސް ރޮނާލްޑޯ ނުހިމަނަ އެވެ. އެގޮތުން އެމެރިކާ އާއި މެކްސިކޯއާ ދެކޮޅަށް ކުޅެން އެކުލަވާލި ސްކޮޑުގައި ރޮނާލްޑޯ ނުހިމަނަ އެވެ. އެކަމާ ގުޅޭ ގޮތުން ޕޯޗުގަލްގެ ކޯޗު ރޮބާޓޯ މާޓިނޭޒް ބުނެފައި ވަނީ، ސްކޮޑުގައި ރޮނާލްޑޯ ނުހިމެނީ އެންމެ ރަނގަޅަށް ރިކަވަރީ ނުވާތީ ކަމަށާއި، ނަމަވެސް ފީފާ ވޯލްޑް ކަޕަށް ރޮނާލްޑޯ ފިޓުވާނެ ކަމަށެވެ. 

އެންމެ ފަހުން އައް ނަޞްރުން ކުރިއަށް ގެންދިޔަ ފަރިތަކުރުން ތަކުގައި ރޮނާލްޑޯ ވަނީ ބައިވެރިވެފަ އެވެ. އެހެންކަމުން ދެން އެންމެ އަވަހަށް އައް ނަޞްރު ކުޅޭ މެޗުގައި ރޮނާލްޑޯ ފެނުމުގެ ފުރުސަތު ވަރަށް ބޮޑު ކަމަށް ރިޕޯޓުތައް ބުނެ އެވެ. ރޮނާލްޑޯ އަންނަނީ މި ސީޒަންގައި އައް ނަޞްރުގައި މޮޅު ކުޅުމެއް ވެސް ދައްކަމުންނެވެ. އެގޮތުން މި ސީޒަންގައި އައް ނަޞްރަށް މިހާތަނަށް ކުޅެދިން 25 މެޗުގައި ރޮނާލްޑޯ ވަނީ 22 ލަނޑު ޖަހައިފަ އެވެ. 

ޕޯޗުގަލްގެ ޤައުމީ ޓީމުގައި ވެސް އެންމެ މުހިންމު އެއް ކުޅުންތެރިޔަކީ ރޮނާާލްޑޯ ކަމަށްވާއިރު، ޤައުމީ ޓީމުގައި ވެސް އޭނާ އަންނަނީ މޮޅު ކުޅުމެއް ދައްކަމުންނެވެ. އެންމެ ފަހުން ޕޯޗުގަލްގެ ޤައުމީ ޓީމާ އެކު ރޮނާލްޑޯ ކުޅެފައި ވަނީ 2025 ވަނަ އަހަރުގެ ނޮވެމްބަރު މަހު ފީފާ ވޯލްޑް ކަޕް ކޮލިފިކޭޝަންގައި އަޔަލެންޑާ ދެކޮޅަށް ކުޅުނު މެޗުގަ އެވެ. އެ މެޗުގައި ރޮނާލްޑޯ ލަނޑު ވެސް ޖަހާފައިވާއިރު، އޭގެ ފަހުން އާމޭނިއާ އާ ދެކޮޅަށް ކުޅުނު މެޗުގައި ރޮނާލްޑޯ ނުކުޅެ އެވެ.