ކާރިސާ ތަކުގެ ބޭނުން ހިފައިގެން ބާރުތައް ޖަމާކުރަން މަސައްކަތްކުރާ ސަރުކާރެއް ދިވެހި ރައްޔިތުން ބޭނުމެއް ނޫން: އެމްޑީޕީ
ތެލުގެ އަގު އުފުލި އިގްތިސާދީ ގޮންޖެހުންތައް ކުރިމަތިވަމުންދާ ދަނޑިވަޅެއްގައި، ސަރުކާރުން ކަންކަން ސިއްރުކޮށް ބާރުތައް މަރުކަޒުކުރަން މަސައްކަތްކުރާތީ އެމްޑީޕީން ކަންބޮޑުވުން ފާޅުކޮށްފި. ރައީސް މުއިއްޒު ދެއްވި ޔަގީންކަމާ ޚިލާފަށް ތެލުގެ އަގު ބޮޑުވެ، އެހީއަށް އެދި އިންޑިއާގައި ދެންނެވުމަކީ ހާލަތުގެ ނުރައްކާތެރިކަން ހާމަވާ ކަމެއް ކަމަށް އެ ޕާޓީން ބުނޭ. އެހެންކަމުން ކާރިސާތަކުގެ ބޭނުން ހިފައިގެން ސިޔާސީ މަންފާ ހޯދުމުގެ ބަދަލުގައި، ދެފުށް ފެންނަ ސިޔާސަތުތަކެއް އިސްކުރުމަށް އެމްޑީޕީން ވަނީ ގޮވާލާފަ.
އެމްޑީޕީ އިން ބޭއްވި އެއްވުމެއްގެ ތެރެއިން | ނިޝާން އަލީ / މިހާރު
ދިވެހި ރައްޔިތުން ބޭނުންވަނީ ކުރިމަތިވާ ކާރިސާތަކަށް ހައްލު ހޯދައިދޭނެ ސަރުކާރެއް ކަމަށާއި، ކާރިސާތަކުގެ ބޭނުން ހިފައިގެން ބާރުތައް ޖަމާކުރަން މަސައްކަތްކުރާ ސަރުކާރެއް ނޫން ކަމަށް އިދިކޮޅު މައި ޕާޓީ އެމްޑިޕީ އިން ބުނެފި އެވެ.
މެދުއިރުމަތީގައި ހިނގަމުންދާ ހަނގުރާމަ އިތުރަށް ވަރުގަދަވެ ރާއްޖެ އަށް ކުރާނެ އަސަރާއި ގުޅޭގޮތުން ސަރުކާރުން ސައްހަ މައުލޫމާތު ފޯރުކޮށްނުދޭތީ ކަންބޮޑުވުން ފާޅުކޮށް އެމްޑީޕީ އިން ވަނީ އަންގާރަ ދުވަހު ނޫސް ބަޔާނެއް ނެރެފަ އެވެ.
އެ ޕާޓީން ބުނީ މި ހަނގުރާމައިގެ ސަބަބުން ދުނިޔޭގެ ތެލުގެ ބާޒާރަށާއި، ފަތުރުވެރިކަމުގެ އިތުރުން ރާއްޖޭގެ އިގްތިސާދަށް ނޭދެވޭ ބޮޑެތި އަސަރުތަކެއް ކުރާނެ ކަމަށެވެ.
އެމްޑީޕީން ނެރުނު ބަޔާނުގައި ބުނެފައިވަނީ، ތެލުގެ އަގު އުފުލުމުގެ ސަބަބުން ކުރިމަތިވެދާނެ އިގްތިސާދީ ގޮންޖެހުންތަކަށް ތައްޔާރުވުމުގެ ބަދަލުގައި، ރައީސް ޑރ. މުހައްމަދު މުއިއްޒު އިސްކަން ދެއްވަނީ އަވަސް އަރުވާލައިގެން ގާނޫނުއަސާސީ އިސްލާހުކޮށް، ބާރުތައް މަރުކަޒު ކުރުމަށް ކަމަށެވެ. މިއީ ގައުމުގެ ހާލަތަށް ބަލާއިރު ނުހަނު ކަންބޮޑުވާ ކަމެއްގެ ގޮތުގައި އެ ޕާޓީން ވަނީ ސިފަކޮށްފަ އެވެ.
މީގެ އިތުރުން، މިދިޔަ ހަފުތާގައި ރައީސް މުއިއްޒު ވަނީ ތެލުގެ މައްސަލާގައި ކަންބޮޑުވާންޖެހޭ އެއްވެސް ކަމެއް ނެތް ކަމަށް ވިދާޅުވެ ރައްޔިތުންގެ ހިތްހަމަޖައްސައިދޭން މަސައްކަތް ކުރައްވާ ފައެވެ. ނަމަވެސް އެމަނިކުފާނު އެހެން ވިދާޅުވިތާ 48 ގަޑިއިރު ނުވަނީސް ތެލުގެ އަގު 20 އިންސައްތަ އަށް ބޮޑުކޮށްފައިވާކަން އެމްޑީޕީން ފާހަގަކުރެ އެވެ. އަދި އޭގެ ފަހުން ތެލުގެ އެހީތެރިކަމަށް އެދި އިންޑިއާ ސަރުކާރުގައި ރަސްމީކޮށް ދިވެހި ސަރުކާރުން ދެންނެވުމަކީ، ރައީސް ކުރިން ދެއްވި ޔަގީންކަމާ މެދު ސުވާލު އުފެދޭ އަދި ހާލަތުގެ ނުރައްކާތެރިކަން ހާމަވާ ކަމެއް ކަމަށްވެސް އެ ޕާޓީން ބުނެފައިވެ އެވެ.
މި ދަނޑިވަޅުގައި އިންޑިއާ ސަރުކާރާއި އެ ގައުމުގެ ރައްޔިތުން ރާއްޖެއަށް ފޯރުކޮށްދެމުންދާ އެހީތެރިކަމަށްޓަކައި އެމްޑީޕީން ވަނީ އެ ގައުމަށް ޝުކުރު އަދާކޮށްފަ އެވެ. އެމްޑީޕީން ބުނީ ސަރަހައްދުގެ އެހެން ގައުމުތަކުން ތެލުގެ ކާރިސާ އިން އަރައިގަތުމަށް ސިޔާސަތުތައް އެކުލަވާލަމުންދާއިރު، ދިވެހި ސަރުކާރުން ކަންކަން ސިއްރުކޮށް، ކަމާބެހޭ ފަރާތްތަކާ މަޝްވަރާ ނުކުރުމަކީ ބަލައިގަނެވޭނެ ކަމެއް ނޫން ކަމަށެވެ.
ރައީސް މުއިއްޒުގެ ސަރުކާރުގެ ދެފުށް ނުފެންނަ ސިޔާސަތުތަކުގެ ސަބަބުން ގައުމުގެ އިގްތިސާދަށް ކުރާނެ އަސަރުތަކާ މެދު އެ ޕާޓީން ވަނީ ތަކުރާރުކޮށް ކަންބޮޑުވުން ފާޅުކޮށްފަ އެވެ.
