"އިންތިޚާބު އެއްކޮށްލުމާއި މެދު ނަގާ ރެފަރެންޑަމް އަކީ ދިވެހިންގެ ހުރިހާ ތަރައްޤީ އެއް ޖަހައިގަންނަން ހިންގާ ޖަރީމާ އެއް"

ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްކޮށްލުމަށް ބާއްވާ ރެފަރެންޑަމް އަކީ ދިވެހިންގެ ހުރިހާ ތަރައްޤީ އެއް ޖަހައިގަންނަން ހިންގާ ޖަރީމާ އެއް ކަމަށް ރައްޔިތުންގެ މަޖިލީހުގެ އަލިފުށީ ދާއިރާގެ ކުރީގެ މެމްބަރު މުހައްމަދު ރަޝީދު ހުސައިން (ބިގޭ)ވިދާޅުވެއްޖެ އެވެ.

އޭނާ އެފަދައިން ވިދާޅުވީ އެމްޑީޕީ ޕިކަޕް ޖަލްސާގައި ވާހަކަދައްކަވަމުންނެވެ.

އޭނާ ވިދާޅުވީ ޕީއެންސީ ފިކުރުގެ ވިސްނުމަކީ އަބަދުވެސް ލާމަރުކަޒީ ނިޒާމައި އިދިކޮޅު އެ ނިޒާމް ފުނޑާލުމަށް މަސައްކަތް ކުރާ ބައެއް ކަމަށެވެ. އެކަން ޕީއެންސީ ފިކުރުގެ ބަޔަކަށް ވެރިކަން ލިބުނު ކޮންމެ ފަހަރަކު ފެންނަމުންދާ ކަމަށް އޭނާ ވިދާޅުވިއެވެ. ބިގޭ ވިދާޅުވީ ރިޔާސީ އިންތިޚާބާއި ރައްޔިތުންގެ މަޖިލިސް އިންތިޚާބު އެކުގައި ބާއްވާ ވަރަށް އަދި ރާއްޖޭގެ ޑިމޮކްރަސީގެ ނިޒާމް ތައްޔާރު ވެފައި ނެތް ކަމަށެވެ.

" މިހާރު މި އޮތް ވެރިކަމުގެ ފިކުރާއި އެކު ކުރެވުނީ ހިތި ތަޖުރިބާ އެއް. ބާރުތައް ނިގުޅައިގަންނަނީ. ލާމަރުކަޒި ނިޒާމް އޮޅާލަނީ. ރައްޔިތުންނަށް ލިބޭ ޚިދުމަތްތައް ނިގުޅައިގަންނަނީ. މިއިީކީ ޖާގަ ދީގެން ވާނެ ކަންކަމެއް ނޫން." އޭނާ ވިދާޅުވި އެވެ.

މި ވެރިކަމުގައި ފުރަތަމަ ދުވަހުން ފެށިގެން އާއްމުންގެ ބާރުވެރިކަން ނަގާލަމުންދާ ކަމަށް އޭނާ ވިދާޅުވި އެވެ. މާޒީވެ ދިޔަ 4 ވެރިކަމުގެ ތެރެއިން 2 ފަހަރު އެމްޑީޕީ އިން ވެރިކަން ކުރި އިރު ހައްގުތައް ކަށަވަރުކޮށްދިނުމަށް އެމްޑީޕީ އިން ވެރިކަން ކުރި އިރު ކޮށްފައިވާ މަސައްކަތްތައް ސާފުކޮށް ފެންނަން ހުންނާނެ ކަމަށް އޭނާ ވިދާޅުވި އެވެ. ޚާއްސަކޮށް ލާމަރުކަޒީ ނިޒާމާއި އެއްގޮތަށް ރައްޔިތުން ބާރުވެރިކޮށްދިނުމަށް ގިނަ މަސައްކަތްތަކެއް ކޮށްފައިވާ ކަމަށް އޭނާ ވަނީ ވިދާޅުވެފަ އެވެ.