ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމަށް ސަރުކާރުން ދައްކަނީ ފެން ނުހިފޭ ވާހަކަތަކެއް: މައުރޫފް
ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމުން އިންވެސްޓަރުންނަށް ފުރުސަތުތައް ފަހިވާނެ ކަމަށް ސަރުކާރުން ބުނާ ބުނުމަކީ ހަމަޖެހޭ ވާހަކަ އެއް ނޫން ކަމަށް މައުރޫފް ވަނީ ވިދާޅުވެފަ.
ޤާނޫނީ ވަކީލް އަދި އިދިކޮޅު އެމްޑީޕީގެ ލީގަލް ޑިރެކްޓަރ އަހުމަދު މައުރޫފް | ރާއްޖެ އެމްވީ
ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމަށް ސަރުކާރުން ދައްކަނީ ފެން ނުހިފޭ ވާހަކަތަކެއް ކަމަށް ޤާނޫނީ ވަކީލް އަދި އިދިކޮޅު އެމްޑީޕީގެ ލީގަލް ޑިރެކްޓަރ އަހުމަދު މައުރޫފް ވިދާޅުވެއްޖެ އެވެ.
އޭނާ އެފަދައިން ވިދާޅުވީ ރާއްޖެޓީވީގެ ނޫނެކޭ ކެމްޕެއިން ޕްރޮގްރާމްގައި ވާހަކަދައްކަވަމުންނެވެ.
މައުރޫފް ވިދާޅުވީ ރިޔާސީ އިންތިޚާބާއި ރައްޔިތުންގެ މަޖިލިސް އިންތިޚާބު އެއްކޮށްލުމާ ގުޅޭ ގޮތުން ނަގާ ޚިޔާލު ހޯދުމުގެ ވޯޓާ ގުޅިގެން ދެ އިންތިޚާބު އެއްކޮށްލުމުން ލިބޭ ފައިދާތަކުގެ ވާހަކަ ސަރުކާރުން ދައްކާ އިރު އޭގެ ތެރޭގައި ހަމަ ނުޖެހޭ ވާހަކަތައް ވެސް ހުރި ކަމަށެވެ. އެގޮތުން ދެ އިންތިޚާބު އެއްކޮށްލުމަކީ އިންވެސްޓަރުންނަށް އޮތް މާހައުލު އިތުރަށް ފަހިވެގެންދާ ކަމެއް ކަމަށް ބުނަމުންދާތީ އެކަމަށް މައުރޫފް ވަނީ ފާޑު ވިދާޅުވެފަ އެވެ.
"އަޅުގަނޑު ދުވަހަކު ވެސް އަޑެއް ނާހަން އިންވެސްޓަރަކު ބުނި އަޑެއް އިންތިޚާބުތައް ގިނަވީމަ ތިމަންނަ އިންވެސްޓް ކުރާ ހިތެއް ނެތީއޭ. އެެހްނވީމަ މިހެން ގޮސް ފެން ނުހިފޭ ވާހަކަތަކެއް ހުރީ." މައުރޫފް ވިދާޅުވި އެވެ.
މައުރޫފް ވަނީ ސަރުކާރުން މަސައްކަތް ކުރަނީ މި ފެންނަ ނުފެންނަ ވޯޓު މަތިން އާއްމުން ފޫހިކޮށްލުމަށް ކަމަށެވެ. ވޯޓު ގަޑުބަޑުކޮށް މަސްހުނި ކުރުމުގެ ވިސްނުން ސަރުކާރުން ގެންގުޅޭ ކަމަށް މައުރޫފް ވަނީ ވިދާޅުވެފަ އެވެ. ރައްޔިތުންނަށް ފަހުމު ނުވާ ގޮތަށް އިންތިޚާބުތައް ބާއްވަން މަސައްކަތް ކުރުމަކީ ނުބައި ނިޔަތެއްގައި ކަންކަން ކުރާކަން ހާމަވާ ކަމެއް ކަމަށް އޭނާ ވަނީ ވިދާޅުވެފަ އެވެ.
