ޕީއެސްއެމްގެ އިސްވެރިން ބައްދަލުކުރާނެ ގަޑިއެއް ދިނުމުން އެމްޑީޕީ އިން އިހުތިޖާޖު ނިންމާލައިފި
ޕީއެސްއެމްގެ ޚަބަރާއި ކޮންޓެންޓް ވަކި ފަރާތަކަށް ޖެހިފައިވާ ކަމަށް ބުނެ އެމްޑީޕީން ކުރި އިހުތިޖާޖު ނިންމާލީ، އެ ޕާޓީގެ ކަންބޮޑުވުންތަކާ ގުޅޭގޮތުން އަންގާރަ ދުވަހު ބައްދަލުކުރާނެ ކަމުގެ ޔަގީންކަން ދިނުމުން. ރިޔާސީ އިންތިހާބާއި މަޖިލިސް އިންތިހާބު އެއްކޮށްލުމާ ގުޅޭގޮތުން ޕީއެސްއެމް އިން ގެނެސްދޭ ޕްރޮގްރާމްތަކުގައި ހަމައެކަނި ސަރުކާރުގެ ފިކުރު ފަތުރަމުންދާތީ އެމްޑީޕީން ވަނީ ބޮޑެތި ފާޑުކިޔުންތަކެއް އަމާޒުކޮށްފަ. މި އިހުތިޖާޖުގެ ތެރެއިން ޕީއެސްއެމްގެ އިސްވެރިންނާ ބައްދަލުކުރަން އެދުމުން ފުރަތަމަ އެކަމަށް އިންކާރުކޮށް، ފުލުހުން މެދުވެރިކޮށް އެމްޑީޕީގެ ޓީމު ނެރެން ވެސް މަސައްކަތް ކުރި.
ޕީއެސްއެމްގެ ވެރިންނާއި ބައްދަލުކުރަން ދިޔަ މީހުންނަށް ފުލުހުން ހުރަސް އަޅަނީ. | ރާއްޖެ އެމްވީ
ޕީއެސްއެމްގެ އިސްވެރިން ބައްދަލުކުރާނެ ގަޑިއެއް ދިނުމުން އެމްޑީޕީ އިން އިހުތިޖާޖު ނިންމާލައިފި އެވެ.
އެމްޑީޕީ އިން ޕީއެސްއެމް ކައިރީގައި އިހުތިޖާޖު ކުރީ ޕީއެސްއެމްގެ ޚަބަރާއި ކޮންޓެންޓް ގެނެސްދިނުމުގައި ވަކި ފަރާތަކަށް ޖެހިފައިވާ ކަމަށް ބުނެ އެކަމުގެ ކަންބޮޑުވުން ފާޅުކުރުމުގެ ގޮތުންނެވެ. މެންދުރު 1 ޖެހި އިރު އެމްޑީޕީ އިން ދިއުމުން ވެރިއެއް ނެތް ކަމަށް ބުނެ ރިސެޕްޝަނުން ވަނީ ދޮގު މައުލޫމާތު ދީފަ އެވެ. ނަމަވެސް އެމްޑީޕީގެ ޓީމު އެތަނުގައި ތިއްބާ ޕީއެސްއެމްގެ ޑެޕިއުޓީ މެނޭޖިންގ ޑިރެކްޓަރު ވަނީ ސައިކަލުގެ ވަގުވަގަށް އެތަނުން ނުކުމެގެން ގޮސްފަ އެވެ.
ޕީއެސްއެމްގެ އެމްޑީ ކަމަށް ދާދި ފަހުން އައްޔަން ކުރެއްވި ޝަކީބު މިވަގުތު ހުންނެވި އުމްރާގެ އަޅުކަމުގަ އެވެ. އެމްޑީޕީއިން ވަނީ އިސްވެރިންނާއި ބައްދަލުކުރަން ޑިމާންޑް ކޮށް ޕީއެސްއެމްގެ ރިސެޕްޝަނުން ނުކުތުމަށް ދެކޮޅު ހަދާފަ އެވެ. އޭގެ ފަހުން ފުލުހުން އެތަނަށް ގެނެސް ފުލުހުން ލައްވާ ގަދަކަމުން އެތަނުން ނެރެން އުޅުނެވެ.
ނަމަވެސް އެމްޑީޕީ އިން ދެކޮޅު ހަދާ އިހުތިޖާޖު ކުރުމުން، ޕީއެސްއެމްއިން ވަނީ އެމްޑީޕީ އާއި އަންގާރަ ދުވަހުގެ މެންްދުރު 2:30 ގައި ބައްދަލު ކުރާނެ ކަމަށް ބުނެފަ އެވެ. ނަމަވެސް ޕީއެސްއެމްއިން ބައްދަލުކުރާނީ ކޮން ބައެއްކަމެއް ނުބުނެ އެވެ.
ރިޔާސީ އިންތިހާބާއި މަޖިލިސް އިންތިހާބު އެއްކޮށްލާ، ފެންނަ ނުފެންނަ ވޯޓާއި ގުޅިގެން ޕީއެސްއެމް އިން އަންނަނީ ސަރުކާރުން ބޭނުންވާ ގޮތަށް ފެންނަ ކަމަށާއި ފެންނަ ކަމަށް ފާހަގަ ލުމަށް އާންމުންނަށް މައުލޫމާތުދީ ޕްރޮގްރާމު ގެންނަމުންނެވެ. ނަމަވެސް ނުފެންނަންވީ ސަބަބެއް ވެސް އަދި އެކަމާއި ގުޅޭ އެއްވެސް މައުލޫމާތެއް ބްރޯޑްކާސްޓް ނުކުރެ އެވެ.
