އިހުތިޖާޖުގައި ތިބި މީހުންނަށް ރޯދަ ވީއްލަން ފެން ދޭން ފުލުހުން ހުރަސް އަޅައިފި
ޕީއެސްއެމްގެ ވެރިންނާ ބައްދަލުކުރުމަށް އެމްޑީޕީގެ ވަފުދުން އެތަނަށް ދިއުމުން، އެތަނުގައި ތިބި މީހުން ރޯދަވީއްލަން ފެން ފޯރުކޮށްދިނުމަށް ފުލުހުން ހުރަސްއަޅައިފި. މިއަދު މެންދުރުން ފެށިގެން އެމްޑީޕީގެ ޓީމުން ޕީއެސްއެމްގައި މަޑުކޮށްގެން ތިބީ އެ މުއައްސަސާގެ ޚަބަރުތައް ވަކި ފަރާތަކަށް ޖެހިފައިވާ ކަމަށް ބުނެ ކަންބޮޑުވުން ފާޅުކުރުމަށް. ނަމަވެސް، ޕީއެސްއެމްގެ ވެރިން ބައްދަލުކުރަން ދެކޮޅު ހަދާފައިވާއިރު، ފުލުހުން ވަނީ ގަދަކަމުން އެ މީހުން އެތަނުން ނެރުމަށް މަސައްކަތް ކޮށްފައި.
ޕީއެސްއެމްގެ ރިސެޕްޝަނު ތެރޭގައި ތިބި މީހުން ބައިތިއްބާފައި އެތެރެއިންނާއި ބޭރުން ފުލުހުން ދޮރު ބަންދުކޮށްގެން. | ރާއްޖެ އެމްވީ
ރިޔާސީ އިންތިހާބާއި މަޖިލިސް އިންތިހާބު އެއްކޮށްލަން ނަގާ ފެންނަ ނުފެންނަ ވޯޓާއި ގުޅިގެން ސަރުކާރުން ބޭނުންވާ ގޮތަށް އެކަނި ދައުލަތުގެ މީޑިއާ ޕީއެސްއެމްއިން ޕްރޮގްރާމާއި ހަބަރު ގެނެސްދޭތީ އެތަނުގެ ވެރިންނާއި ބައްދަލުކުރަން ގޮސް ތިބި އެމްޑީޕީގެ ޓީމް ރޯދަ ވީއްލަން ފެންދިނުމަށް އެތަނުގައި ތިބި ފުލުހުން ހުރަސް އަޅައިފި އެވެ.
އެމްޑީޕީގެ ޓީމުން ޕީއެސްއެމްގެ ވެރިންނާއި ބައްދަލުކުރަން ދިޔައީ ހޯމަ ދުވަހުގެ މެންދުރު 1 ޖެހި އިރު އެވެ. ނަމަވެސް ޕީއެސްއެމްގެ އިސް ވެރިން ވަނީ އެމްޑީޕީގެ ޓީމާއި ބައްދަލުކުރަން ދެކޮޅު ހަދާފަ އެވެ. ޕީއެސްއެމްގެ ރިސެޕްޝަނުގައި އެމްޑީޕީގެ ޓީމުން މަޑުކޮށްގެން ތިބީ ވެރިންނާއި ބައްދަލުކޮށް ކަންކަން ހައްލުކުރުމަށް މަޝްވަރާ ކުރުމަށެވެ. ނަމަވެސް ޕީއެސްއެމްގެ ވެރިން އަންގައިގެން އެތަނަށް ފުލުހުން ފޮނުވާ ގަދަކަމުން އެތަނުން މީހުން ބޭރު ކުރުމަށް ދަނީ މަސައްކަތް ކުރަމުންނެވެ.
އަދި ބަންގި ގޮވުމުން އެތާ އެތެރޭގައި ތިބި މީހުން ރޯދަ ވީއްލަން ފެން ދޭން ވެސް ފުލުހުން ވަނީ ދެކޮޅު ހަދާފަ އެވެ. ޕީއެސްއެމް ކައިރީގައި ހަރަކާތްތެރިވަމުން އަންނަ ރާއްޖެޓީވީގެ ނޫސްވެރިޔާ ބުނީ، ބަންގި ގޮވުމުން އެތެރޭގައި ތިބި މީހުންނަށް ފެން ދޭން ބޭރުން ފެން ވައްދަން އުޅުމުން ފުލުހުން އެކަމަށް ދެކޮޅު ހެދި ކަމަށެވެ. އަދި ފެން ވައްދަަދޭން އެދުމުން ވެސް ނުވެއްދޭނެކަމަށް ބުނެ ދޮރު ބަންދުކޮށްފައިވާ ކަމަށާއި، އެންމެފަހުން ފެން ބައްދަން ޖެހުނީ ގަދަކަމުން ދޮރު ހުޅުވާލައިގެން ކަމަށް ނޫސްވެރިޔާ ބުންޏެވެ.
ޕީއެސްއެމްއަށް އެމްޑީޕީގެ މެންބަރުން ބައްދަލުކުރަން ގޮސް ތިއްބާ އެތަނުގެ ޑީއެމްޑީ މުހައްމަދު އަބްދުﷲ ޔާމީން ވަނީ އިމާރާތުން ނުކުމެގެން ގޮސްފަ އެވެ. ނަމަވެސް ރިސެޕްޝަނުގައި ވެރިންނާއި ބައްދަލުކުރުމަށް މެންދުރު އެދުމުން ރިސެޕްޝަނުގައި އިން މުވައްޒަފު ވަނީ މިއަދަކީ ބަންދު ދުވަހެއް ކަމަށާއި، އެއްވެސް ވެރިއެއް ނެތް ކަމަށް ބުނެ ދޮގު ހަދާފަ އެވެ.
