ކުރިން ނުކުރެވުނު ކަމެއް ބާކީ އޮތް 2 އަހަރަކު ނުވާނެ، ވޯޓު ދޭންވީ ބަދަލަކަށް: މޫސަ

ލާމަރުކަޒީ ނިޒާމުގެ ތެރެއިން ކަންކަން ކުރެވޭނެ ކަމަށް ސަރުކާރުން ވަކާލާތު ކުރި ނަމަވެސް، ނިމިދިޔަ 2 އަހަރު ތެރޭގައި ނުކުރެވުނު ކަމެއް ކުރިއަށް އޮތް 2 އަހަރު ތެރޭގައި ވެސް ނުކުރެވޭނެ ކަމަށް އެމްޑީޕީގެ ކުރީގެ ޗެއަރޕާސަން މޫސާ މަނިކު (ރީކޯ މޫސަ) ވިދާޅުވެއްޖެ އެވެ. 

އެމްޑީޕީ އިން ރަށްރަށަށް ކުރަމުންދާ ކެމްޕޭނުގެ ތެރެއިން ރާއްޖެޓީވީއާއި ވާހަކަ ދައްކަވަމުން މޫސަ ވިދާޅުވީ ރާއްޖޭގެ ލާމަރުކަޒީ ނިޒާމު ހިމާޔަތްކުރުމަށާއި ރަށްރަށުގެ ތަރައްޤީ ހުއްޓުމެއް ނެތި ކުރިއަށް ގެންދިއުމަށްޓަކައި ކުރިއަށް އޮތް އިންތިޚާބުގައި އެމްޑީޕީގެ ކެންޑިޑޭޓުން ހޮވަންޖެހޭ ކަމަށެވެ. 

މި ދަތުރުފުޅަކީ ކުރިއަށް އޮތް އިންތިޚާބުތަކަށް އެމްޑީޕީއަށް ވޯޓު ހޯދުމަށާއި، ޚާއްޞަކޮށް ލާމަރުކަޒީ ނިޒާމާއި، ސަރުކާރުން ގެންނަން އުޅޭ ބަދަލުތަކާ މެދު ރައްޔިތުން ހޭލުންތެރިކުރުވުމަށް ކުރާ ދަތުރެއްކަން މޫސަ ފާހަގަކުރެއްވި އެވެ. އޭނާ ވިދާޅުވީ މި ސަރުކާރުން ލާމަރުކަޒީ ނިޒާމުގެ ބޭނުމެއް ނެތް ފަދަ މޭރުމަކުން ވާހަކަދައްކަމުންދާ ކަމަށާއި، ރަށްރަށަށް ކަމެއް ކޮށްދެވޭނީ ސަރުކާރު ކެންޑިޑޭޓުން ހޮވައިގެން ކަމަށް ބުނާ ބުނުމަކީ ބަލައިގަނެވޭނެ ކަމެއް ނޫން ކަމަށެވެ.

ސަރުކާރުގެ ދައުރުގެ ބާކީ އޮތީ އެންމެ ދެ އަހަރުކަން ފާހަގަކުރައްވައި މޫސަ ވިދާޅުވީ، ރާއްޖޭގެ ތާރީޚަށް ބަލާއިރު ކޮންމެ ފަސް އަހަރަކުން ވެރިކަން ބަދަލުވަމުން އަންނަ ކަމަށެވެ. އެހެންކަމުން އެންމެ ދެ އަހަރު ދުވަހަށްޓަކައި ސަރުކާރު ކެންޑިޑޭޓަކު ހޮވުމުގެ ބޭނުމެއް ނެތް ކަމަށާއި، ރައްޔިތުން އިޚުތިޔާރުކުރާ ބަޔަކު ރަށުގެ ވެރިކަމުގައި ތިބުމަކީ ލާމަރުކަޒީ ނިޒާމުގެ އަސްލު ކަމަށް އޭނާ ވިދާޅުވި އެވެ. އަދި އެމްޑީޕީ ސަރުކާރުން ފަށާފައިވާ މަޝްރޫޢުތައް ބަރާބަރަށް ހިންގި ނަމަވެސް ސަރުކާރުގެ ހެޔޮ ނިޔަތް ސާބިތުވާނެ ކަމަށް މޫސަ ވިދާޅުވިއެވެ.

އެހެންވީމާ، ދެ އަހަރު ދުވަހަކަށް ކޮންމެހެން ކަމެއް ކުރާކަށް ބޭނުމެއް ނުވާނެ ނޫންތޯ. ކަމެއް ކުރަން މި ރަށުން ކޮންމެހެން ސަރުކާރު ކެންޑިޑޭޓެއް ހޮވާކަށެއް ނުޖެހޭނެ. ލާމަރުކަޒީ ނިޒާމުގައި ކުރިއަށްދާން ބޭނުންކަމަށްވާނަމަ، ރައްޔިތުންނަށް މިހާތަނަށް އެމް.ޑީ.ޕީ ސަރުކާރުން ފަށާދީފައި ހުރި، މިދިޔަ ފަސް އަހަރު ފަށާދީފައި ހުރި ޕްރޮޖެކްޓުތައް ބަރާބަރަށް ހިންގި ނަމަވެސް ރައްޔިތުންނަށް އޮންނާނީ ވަރަށް ބޮޑަށް ޕްރޫވްކުރެވެން. މި ސަރުކާރުން މި އުޅެނީ ހެޔޮ ނިޔަތުގައި ރާއްޖޭގެ ރައްޔިތުންނަށް ކަމެއް ކޮށްދޭން ކަމަށް. އެކަމެއް ވެސް ނުވޭ.

އެމްޑީޕީގެ ކުރީގެ ޗެއަރޕާސަން މޫސާ މަނިކު (ރީކޯ މޫސަ)

މީގެ އިތުރުން މޫސަ ވަނީ މާލޭގައި އަލުން އެޓޯލްސް މިނިސްޓްރީއެއް ފަދަ މިނިސްޓްރީއެއް އުފައްދައި، ރަށްރަށުގެ ބާރުތައް މާލެއަށް ޖަމާކުރަމުންދާ ކަމަށް ވިދާޅުވެފަ އެވެ. އޭނާ ވިދާޅުވީ މިއީ ލާމަރުކަޒީ ނިޒާމު ފުނޑުފުނޑުކޮށްލުން ކަމަށާއި، މިކަމާ ދޭތެރޭ ރައްޔިތުން ވިސްނައި އެމްޑީޕީގެ ކެންޑިޑޭޓުންނަށް ވޯޓު ދޭންޖެހޭ ކަމަށެވެ.

ޤާނޫނުއަސާސީއަށް ގެންނަން އުޅޭ ބަދަލުތަކާއި ފެންނަ ނުފެންނަ ވޯޓާ ގުޅޭގޮތުން ވާހަކަދައްކަވަމުން މޫސަ ވިދާޅުވީ، ދައުލަތުގެ އެންމެހައި ބާރުތައް ފެށިގެން އަންނަނީ ރައްޔިތުންގެ ކިބައިން ކަމަށް ޤާނޫނުއަސާސީގެ 4 ވަނަ މާއްދާގައި ބުނާއިރު، ސަރުކާރުން މަސައްކަތް ކުރަނީ އެ ބާރުތައް ދުއްވާލުމަށް ކަމަށެވެ. އަދި ދެ އިންތިޚާބު އެއްކޮށްލަން އުޅެނީ ރައްޔިތުންގެ ގާތަށް ކަމަކު ދާންޖެހޭ މިންވަރު މަދުކުރުމުގެ ނިޔަތުގައި ކަމަށްވެސް އޭނާ ވިދާޅުވި އެވެ.

މޫސަ އިތުރަށް ވިދާޅުވީ، މިއަދު ރާއްޖެއަށް އައިސްފައިވާ ތަރައްޤީއާއި، އެކަނިވެރި މައިންނަށްދޭ އެހީއާއި، އާސަންދައާއި، ދަތުރުފަތުރުގެ ނިޒާމަކީ އެމްޑީޕީން ޤާނޫނުއަސާސީއަށް ގެނައި ބަދަލުތަކުގެ ނަތީޖާ ކަމަށެވެ. އެހެންކަމުން، ކުރިއަށް އޮތް ފެންނަ ނުފެންނަ ވޯޓުގައި "ނުފެންނަ" ކަމަށް ވޯޓު ދީގެން ނޫނީ މި ނުރައްކަލުން ސަލާމަތް ނުވެވޭނެ ކަމަށް ވިދާޅުވެ، މޫސަ ވަނީ ރައްޔިތުންނަށް އިލްތިމާސްކުރައްވާފަ އެވެ.