ވޯޓުގެ ސުވާލު އޮތީ މަޖިލީހުގެ އުމުރު ކުރުވާކަން ރައްޔިތުންނަށް ވަންހަނާވާ ގޮތަށް، މައްސަލަ ސުޕްރީމް ކޯޓަށް ހުށަހަޅައިފި!
ސުވާލުގެ އިބާރާތް އޮތީ ޤާނޫނުއަސާސީއަށް ގެނައި 8 ވަނަ އިސްލާޙު ތަސްދީޤު ކުރަން ފެނޭތޯ ނުވަތަ ނޫންތޯ، އެ އިސްލާޙުގައި ރައްޔިތުންގެ ފެންނަ ނުފެންނަ ވޯޓު ނަގަން ޖެހޭ ކަންކަމާ ނުގުޅޭ ގިނަ ތަފްސީލުތަކެއްވެސް ހިމެނޭ. ސުވާލު މިހާރު އޮތްގޮތުން ރައްޔިތުންނަށް ވޯޓު ލެވެނީ ކޮން ކަމަކަށްކަންވެސް އަދި ނަތީޖާވެސް ސާފު ނުވާނެ.
ގާނޫނީ ވަކީލު އައިކް އަހުމަދު އީސާ އަދި އަލީ ހުސައިން | ރާއްޖެ އެމްވީ
ރިޔާސީ އިންތިޚާބާއި މަޖިލިސް އިންތިޚާބު އެއް ދުވަހެއްގައި ބޭއްވުމަށް ފެނޭތޯ ނަގާ ރިފަރެންޑަމް ވޯޓުގައި ރައްޔިތުންނާ ކުރެވޭ ސުވާލު އޮތީ މިހާރު ހިނގަމުންދާ މަޖިލީހުގެ ދައުރު ކުރުކޮށްލާކަން، ރައްޔިތުންނަށް ވަންހަނާވާ ގޮތަށްކަމަށްވާތީ އެ މައްސަލަ ސުޕްރީމް ކޯޓަށް ހުށަހަޅައިފިއެވެ.
ރިފަރެންޑަމް ވޯޓާ ގުޅޭގޮތުން ދެ މައްސަލައެއް ސުޕްރީމް ކޯޓަށް ހުށަހަޅާފައިވާއިރު، ފުރަތަމަ މައްސަލައާ ގުޅޭ މައުލޫމާތު ދެއްވަމުން ޤާނޫނީ ވަކީލު އައިކް އަހުމަދު އީސާ ވިދާޅުވީ، އެ މައްސަލައަކީ އޭނާ އަދި ވަކީލު އިބްރާހިމް ޝިޔާމް ހުށަހެޅުއްވި މައްސަލައެއް ކަމަށެވެ. އެއީ ސަރުކާރަށް އަމިއްލައަށް ފެންނަ ގޮތަކަށް ކަންކަން ނިންމައި، ބޮޑެތި ޤާނޫނީ މައްސަލަތައް ހިމެނޭގޮތަށް ރިފަރެންޑަމްއެއް ނަގަން އުޅޭތީކަން އޭނާ ފާހަގަ ކުރެއްވިއެވެ.
އޭނާ ވިދާޅުވި ގޮތުގައި ސުޕްރީމް ކޯޓަށް ހުށަހަޅާފައިވާ އެ މައްސަލައަކީ ރިފަރެންޑަމްގެ ސުވާލާ ގުޅޭގޮތުން ހުށަހަޅާފައިވާ މައްސަލައެކެވެ. އެގޮތުން އެއީ ޤާނޫނުއަސާސީގެ ރޫޚާ ޚިލާފަށް ބައްޓަންވެފައިވާ ސުވާލެއްކަން އައިކް ފާހަގަ ކުރެއްވިއެވެ. ސަބަބަކީ އެ ސުވާލުގައި އޮންނަ އިބާރާތުގެ ސަބަބުން ނުކުންނަ ނަތީޖާ އޮޅޭގޮތަށް ސުވާލު ބައްޓަންވެފައިވާތީއެވެ.
އައިކް ވިދާޅުވީ، ސުވާލުގެ އިބާރާތް އޮތީ ޤާނޫނުއަސާސީއަށް ގެނައި 8 ވަނަ އިސްލާޙު ތަސްދީޤު ކުރަން ފެނޭތޯ ނުވަތަ ނޫންތޯ ކަމަށާއި، އެ އިސްލާޙުގައި ރައްޔިތުންގެ ފެންނަ ނުފެންނަ ވޯޓު ނަގަން ޖެހޭ ކަންކަމާ ނުގުޅޭ ގިނަ ތަފްސީލުތަކެއްވެސް ހިމެނޭކަމަށެވެ. އަދި ވިދާޅުވީ، ހަގީގަތުގައި ސުވާލު ކުރަންޖެހޭނީ މަޖިލީހުގެ ދައުރު ކުރުކުރަން ރައްޔިތުން އެއްބަސްވޭތޯ ނުވަތަ ނޫންތޯ ކަމަށެވެ.
މި މައްސަލަ ހުށަނާޅާ ފަރުޖެހުނީސް، މި މައްސަލަ ހުށަހަޅަން ޖެހުނީ ސަރުކާރާއި ދައުލަތުގައި މިކަންކަން ކުރަންތިބި މީހުންގެ ކޮލިޓީ ދަށްވީމަ، ޤާނޫނުއަސާސީއާ ތައާރުޒު ނުވާގޮތަކަށް މިކަން ކުރެވުނީސް، ނަމަވެސް ސިޔާސީ މަންފާ ނަގަން ރައްޔިތުންނަށް އޮޅުވާލައްވަމުން ގެންދަވަނީ،ވަކީލު އައިކް އަހުމަދު އީސާ
މި ސުވާލު މިހާރު އޮތްގޮތުން ރައްޔިތުންނަށް ވޯޓު ލެވެނީ ކޮން ކަމަކަށްކަންވެސް އަދި ނަތީޖާވެސް ސާފު ނުވާނެ ކަމަށާއި، އެކަމުގެ ސަބަބުން ޤައުމަށް ދިމާވެދާނެ ގެއްލުންތައްވެސް ބޮޑުވާނެކަމަށް އޭނާ ވިދާޅުވިއެވެ.
