ރައީސް މުއިއްޒު އުޅުއްވަނީ ވެރިކަން ދިގުދަންމާލަން، ރެފަރެންޑަމަށް ނޫނެކޭ ނުބުނާނަމަ ދެން ވާދަވެރި ރިޔާސީ އިންތިޚާބުތަކެއް ރާއްޖޭގައި ނޯންނާނެ: މައުރޫފް
މައުރޫފް ވިދާޅުވީ، ރެފަރެންޑަމް ވޯޓުގައި ނޫނެކޭ ބުނުމަކީ ވަރަށް މުހިއްމު ކަމެއް ކަމަށާއި، އެއީ ރައީސް ޑރ މުޙައްމަދު މުއިއްޒުގެ ވެރިކަން 20 އަހަރަށް ދަންމާލުމަށްޓަކައި ރޭވިގެން ކުރެވޭ މަސައްކަތަށް ނޫނެކޭ ބުނުން ކަމަށް.
ކެންދޫ ދާއިރާގެ މެމްބަރު މައުރޫފް ޒާކިރު | ރާއްޖެ އެމްވީ
ރައީސް ޑރ މުޙައްމަދު މުއިއްޒު އުޅުއްވަނީ ހީލަތްތެރި ރޭވުމެއްގެ ތެރެއިން ރާއްޖޭގެ ވެރިކަން ދިގުދަންމާލުމަށް ކަމަށާއި، ރެފަރެންޑަމް ވޯޓުގައި ނޫނެކޭ ނުބުނެއްޖެނަމަ، ދެން ވާދަވެރި ރިޔާސީ އިންތިޚާބުތަކެއް ރާއްޖޭގައި ނުބޭއްވޭނެކަމަށް ކެންދޫ ދާއިރާގެ މެމްބަރު މައުރޫފް ޒާކިރު ވިދާޅުވެއްޖެއެވެ.
މައުރޫފް އެފަދައިން ވިދާޅުވީ ރާއްޖެޓީވީން ގެނެސްދޭ ނޫނެކޭ ކެމްޕޭން ޕްރޮގްރާމްގައި ވާހަކަ ދައްކަވަމުންނެވެ.
މައުރޫފް ވިދާޅުވީ، ރެފަރެންޑަމް ވޯޓުގައި ނޫނެކޭ ބުނުމަކީ ވަރަށް މުހިއްމު ކަމެއް ކަމަށާއި، އެއީ ރައީސް ޑރ މުޙައްމަދު މުއިއްޒުގެ ވެރިކަން 20 އަހަރަށް ދަންމާލުމަށްޓަކައި ރޭވިގެން ކުރެވޭ މަސައްކަތަށް ނޫނެކޭ ބުނުން ކަމަށެވެ. އަދި ވިދާޅުވީ، މި އިންތިޚާބުގައި ރައްޔިތުން ނޫނެކޭ ނުބުނާނަމަ، ދެން ވާދަވެރި ރިޔާސީ އިންތިޚާބުތަކެއް މި ޤައުމުގައި ނުބާއްވާނެކަމަށްވެސް މައުރޫފް ވިދާޅުވިއެވެ.
އަޅުގަނޑު ހަމަ ދިވެހި ރައްޔިތުންގެ ކިބައިން ވަރަށް ބޮޑަށް އެދެނީ ވާދަވެރި އިންތިޚާބަކާ ނުލައި އެކަނި މާއެކަނި ވާދަކޮށްގެން ފެންނަ ނުފެންނަ ވޯޓަކުން ރިޔާސީ ދައުރު 20 އަހަރަށް ދަންމާލަން ނޫނެކޭ ރައްޔިތުން ބުނަން ޖެހެއޭ، އެ ފުރުސަތޭ މިއީ، އެހެންނޫނީ ދެން ވާދަވެރި ރިޔާސީ އިންތިޚާބުތަކެއް މި ރާއްޖޭގައި ނޯންނާނެ، މިއީ ޙުދުމުހުތާރު ވެރިކަމެއް ރާއްޖޭގައި ވިއްސަކަށް އަހަރު ކުރުމަށް ކުރަމުންދާ މަސައްކަތެއް، ހުރިހާ ރައްޔިތުން ފެންނަ ނުފެންނަ ވޯޓުގައި ނޫނެކޭ ބުނެ ރައީސް މުއިއްޒު ބަލިކުރަން ޖެހޭކެންދޫ ދާއިރާގެ މެމްބަރު މައުރޫފް ޒާކިރު
މައުރޫފް އިތުރަށް ވިދާޅުވީ، ރިޔާސީ އިންތިޚާބާއި މަޖިލިސް އިންތިޚާބު އެއް ދުވަހެއްގައި ބާއްވަން ރެފަރެންޑަމް ވޯޓުން ފާސްވެއްޖެނަމަ މަޖިލީހުގެ މިހާރު ހިނގަމުންދާ ދައުރުގެ 6 މަސް އުނިވެގެންދާ ކަމަށާއި، އެ 6 މަހަށްވާ ފައިސާވެސް މެމްބަރުންނަށް ލިބޭގޮތަށް ހަމަޖެހިފައިވާކަމަށް ޕީއެންސީގެ މެމްބަރުން ވިދާޅުވަމުންދާކަމަށެވެ. އެގޮތުން އެ ފައިސާ ރައީސުލްޖުމްހޫރިއްޔާ ދެއްވާނެކަމަށް ހުދު ޕީއެންސީ މެމްބަރުން ވިދާޅުވަމުން ގެންދަވާކަމަށްވެސް މައުރޫފް ވިދާޅުވިއެވެ.
އަޅުގަނޑުމެންނާ ދިމާއަށް ޕޯޑިއަމްތަކުގައި ބުނަމުންދަނީ ހަމަސް ދުވަހުގެ މުސާރަ ގެއްލިދާނެތީއޭ އުޅެނީ، ހަގީގަތަކީ އެބޭފުޅުން އެބޭފުޅުންނަށް ނިންމާފައި އޮތީ 6 މަސް ދުވަހުގެ މުސާރަވެސް ދޭގޮތަށް، ދައުލަތުގެ ބަޖެޓުން މި ފައިސާ ދޭގޮތަށް އެ ކުރުކޮށްލަނީ، އެގޮތަށް އެތިބަ 80 މެމްބަރުން އެއްބަސްވެގެން އެ ތިބީ، އަޅުގަނޑުމެންނަށް އެނގޭތީ މި ދަންނަވަނީކެންދޫ ދާއިރާގެ މެމްބަރު މައުރޫފް ޒާކިރު
މައުރޫފް ވަނީ އޭޕްރީލް 4 ގައި އޮންނަ ރެފަރެންޑަމްގައި ވީހާވެސް ގިނަ ރައްޔިތުން ނުކުމެ ވޯޓުލައި، ރެފަރެންޑަމަށް ނޫނެކޭ ބުނުމަށް އެދިވަޑައިގެންފައެވެ. މައުރޫފް ވިދާޅުވި ގޮތުގައި މިއީ ރައްޔިތުން ކޮންމެހެންވެސް ބޭނުން ހިފަންޖެހޭ ފުރުސަތެކެވެ.
