މިދިޔަ 20 އަހަރުގެ ތެރޭ ރައްޔިތުންނަށް ލިބުނު މިނިވަންކަން މި ދަނީ ފަހަރަކު ކަމަކުން ގެއްލެމުން، ވަރިހަމަކޮށްލެވޭކަށް ނެތް: ބައުންޓީ

މިދިޔަ 20 އަހަރު ތެރޭގައި ރައްޔިތުންނަށް ލިބުނު މިނިވަންކަން މި ދަނީ ފަހަރަކު ކަމަކުން ގެއްލެމުން، ވަރިހަމަކޮށްލެވޭކަށް ނެތް ކަމަށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ހަރަކާތްތަކުގައި އިސްކޮށް އުޅުއްވި މުހައްމަދު ނާޒިމް (ބައުންޓީ) ވިދާޅުވެއްޖެ އެވެ.

އޭނާ އެފަދައިން ވިދާޅުވީ ރާއްޖެޓީވީ އިން ގެނެސްދޭ ނޫނެކޭ ކެމްޕެއިން ޕްރޮގްރާމްގައި ވާހަކަދައްކަވަމުންނެވެ. ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމަކީ ރައްޔިތުންނަށް ލިބޭނެ ވަރަށް ބޮޑު ދެރަ އެއް ކަމަށް އޭނާ ވަނީ ވިދާޅުވެފަ އެވެ.

ރާއްޖެ އަށް ޑިމޮކްރަސީ އައުމުގެ ކުރިން ވޯޓުލަނީ ކުޑަކަތީބާއި ބޮޑު ކަތީބު ވަށާލައިގެން ތިބެގެން ކަމަށާއި އޭރު ހައްގުތައް ދިން ގޮތަކީ އެއީ ކަމަށް އޭނާ ވިދާޅުވި އެވެ. އެމްޑީޕީ އިން ވޯޓުލުމުގެ ހައްގާއި ރައްޔިތުންނަށް އެހެނިހެން ހައްގުތައް ހޯދައި ދޭން ވަރަށް ބުރަ މަސައްކަތްތަކެއް ކުރަން ޖެހުނުކަން އޭނާ ވަނީ ފާހަގަކުރައްވާފަ އެވެ. އަދި ޑިމޮކްރަސީ ފެށިގެން އައި އިރު ވެސް ވަރަށް ގިނަ ބުރަތަކެއް އުފުލަން ޖެހުނު ކަމަށް އޭނާ ވަނީ ވިދާޅުވެފަ އެވެ.

"ލ.އަތޮޅު ރަށަކަށް އަޅުގަނޑުމެން ދިޔައިން. އެއީ އެ ރަށުގަ އިނީ ޕާޓީގެ 4 ވޯޓު. އެކަމަކު އަޅުގަނޑުމެން އެ ރަށުން ބޭލީ. ތިބި ގެއަށް ގާ އުކާ. އެ ރޭ 7 ގެ ކުރިން ފައިބަން އަންގާ، މިއަދުގެ ކުދިންނަށް އިހުސާސް ވެސް ނުކުރެވޭނެ މި ހައްގުތައް ހޯދަން އަޅުގަނޑުމެން މި ކުރި މަސައްކަތް." އޭނާ ވިދާޅުވި އެވެ.

ވޯޓުލުން ފަދަ އަސާސީ ކަންކަމުގެ މިނިވަންކަން ވެސް މިހާރު މި ސަރުކާރުން ދަނީ ގެއްލުވާލަމުން ކަަމަށް އޭނާ ވަނީ ވިދާޅުވެފަ އެވެ. މިއަދު މިނިވަންކަމާއި އެކު ކަމެއް ކުރެވެނީ ކޮން ކައުންސިލަކަށްތޯ ސުވާލުކޮށްލުން މުހިންމު ކަމަށް އޭނާ ވިދާޅުވި އެވެ. އެއްވެސް ތަނަކަށް މުވައްޒަފެއް ނުނެގޭ ކަމަށާއި، ރައްޔިތުންގެ ހައްގުތަކަށް ސަރުކާރުން އަރައިގަންނަމުންދާ ކަމަށް އޭނާ ވިދާޅުވި އެވެ. އިންތިޚާބުތައް އެއްކޮށްލައިފި ނަމަ އަނެއްކާ ވެސް ފެންނާނީ ރައްޔިތުންގެ ބާރު އެއްކޮށް ގެއްލޭ މަންޒަރުކަމަށް ފާހަގަކުރައްވައި ދެ އިންތިޚާބު އެއްކޮށްލަން ނޫނެކޭ ބުނުމަށް އޭނާ ވަނީ ގޮވާލައްވާފަ އެވެ.