ފެންނަ ނުފެންނަ ވޯޓުގެ މައުލޫމާތާއި ވޯޓުލާންޖެހޭ ސަބަބު އާންމުންނަށް ކިޔައި ދޭން ޖެހޭނެ ކަމަށް އިލެކްޝަނުން ގަބޫލެއް ނުކުރޭ: ނިޔާޒު
އިންތިޚާބުތައް އެއްކޮށްލުމާ ގުޅޭގޮތުން ނަގާ ފެންނަ ނުފެންނަ ވޯޓަށް ރައްޔިތުން ހޭލުންތެރިކުރުވުމަށް އެމްޑީޕީން ބާއްވާ ހަރަކާތްތަކުގައި ބައިވެރިވުމަށް އިލެކްޝަންސް ކޮމިޝަނަށް އެ ޕާޓީން ދައުވަތު ދީފައިވޭ. މި ވޯޓާ ގުޅޭ މައުލޫމާތު އާންމުންނަށް އެނގިފައި ނުވާތީ އެމްޑީޕީން ކަންބޮޑުވުން ފާޅުކޮށްފައިވާއިރު، ވަކި ގޮތަކަށް ވޯޓު ދޭންވީ ސަބަބުތައް ކިޔައިދިނުމަކީ ކޮމިޝަނުގެ ޒިންމާއެއް ކަމަށް އެ ފަރާތުން ގަބޫލުނުކުރާ ކަމަށް އަލީ ނިޔާޒު ވިދާޅުވި.
ހުޅުމާލެ ދާއިރާގެ ކުރީގެ މެންބަރު އަލީ ނިޔާޒު ރާއްޖެޓީވީ އަށް އިންޓަރވިއު ދެއްވަނީ. | ރާއްޖެ އެމްވީ
ރިޔާސީ އިންތިހާބާއި މަޖިލިސް އިންތިހާބު އެއްކޮށްލުމަށް ފެނޭތޯ ނަގާ ވޯޓުގެ މައުލޫމާތާއި ވޯޓުލާންޖެހޭ ސަބަބުން އާންމުންނަށް ކިޔައި ދޭން ޖެހޭނެ ކަމަށް އިލެކްޝަންސް ކޮމިޝަނުން ގަބޫލު ނުކުރާ ކަމަށް ހުޅުމާލެ ދާއިރާގެ ކުރީގެ މެންބަރު އަލީ ނިޔާޒު ވިދާޅުވެއްޖެ އެވެ.
ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްކޮށްލުމާ ގުޅޭގޮތުން ނަގާ ފެންނަ ނުފެންނަ ވޯޓު ނުވަތަ ރެފަރެންޑަމްއާ ގުޅިގެން ހުރި ކަންބޮޑުވުންތައް ހިއްސާކުރުމަށް އިދިކޮޅު މައި ޕާޓީ، އެމްޑީޕީން އިލެކްޝަންސް ކޮމިޝަނުގެ މެންބަރުންނާ ބައްދަލުކުރުމަށްފަހު ރާއްޖެޓީވީއަށް މައުލޫމާތު ދެއްވަމުން ހުޅުމާލޭ ދާއިރާގެ ކުރީގެ މެންބަރު އަލީ ނިޔާޒު ވިދާޅުވީ، ރެފަރެންޑަމްއާ ގުޅޭގޮތުން ރައްޔިތުން ހޭލުންތެރިކުރުވުމަށް އެމްޑީޕީން ބާއްވާ ޕިކަޕް ޖަލްސާތަކުގައި ބައިވެރިވުމުގެ ދައުވަތު އިލެކްޝަންސް ކޮމިޝަނަށް މިހާރު ދީފައިވާނެ ކަމަށެވެ.
އަލީ ނިޔާޒު ވިދާޅުވީ މިހާރު އޮތް ރެފަރެންޑަމް ގާނޫނު އޮތްގޮތުން، ވަކި ގޮތަކަށް ވޯޓު ދޭންވީ ސަބަބުތައް ކިޔައިދޭންޖެހޭނެ ކަމަށް އިލެކްޝަންސް ކޮމިޝަނުގެ މެންބަރުން ގަބޫލުނުކުރައްވާ ކަމަށެވެ. އަދި އެ މައުލޫމާތުތައް ރައްޔިތުންނަށް ފޯރުކޮށްދޭނީ ކޮން ބައެއްކަން ވެސް ކޮމިޝަނަށް ސާފުނުވާކަން އޭނާ ފާހަގަކުރެއްވި އެވެ. އެހެންކަމުން ކޮންމެ ދުވަހަކުވެސް އެމްޑީޕީން ކުރިއަށްގެންދާ ހަރަކާތްތަކުގައި ބައިވެރިވެ، ރައްޔިތުންނަށް ބޭނުންވާ މައުލޫމާތު ދިނުމަށް ކޮމިޝަނަށް އެދިފައިވާނެ ކަމަށް ނިޔާޒު ވިދާޅުވި އެވެ.
އެ ބޭފުޅުން ގަބޫލެއް ނުކުރައްވާ އެ ސަބަބު އެ ބޭފުޅުން ކިޔައިދޭންޖެހޭނެ ކަމަކަށް މިހާރުގެ ރިފްރެންޑަމް ގާނޫނުގައި އޮތް ގޮތުން. ދެން އެކަން ކުރަނީ ކޮންބައެއްތޯ؟ އެއެއް ވެސް އެ ބޭފުޅުންނަކަށް ނޭނގެ. އެހެންވީމާ، އަޅުގަނޑުމެން މިއަދު އިލެކްޝަންސް ކޮމިޝަނަށް ދަޢުވަތު ދީފިން. އަޅުގަނޑުމެން މި ބާވާ ޕިކަޕް ޖަލްސާތަކުގައި އެ ބޭފުޅުން ބައިވެރިވާން އިނގޭތޯ. ކޮންމެ ދުވަހަކު ވެސް އެ ބޭފުޅުން ފަރާތުން މީގަ އަޅުގަނޑުމެންނަށް ދެ މަޢުލޫމާތު ދެއްވުމަށް. އެ ބޭފުޅުން އެ ބޭފުޅުން ވެސް ގަބޫލުކުރާ ކޮންމެވެސް ބަޔަކު އެކަން ކުރަންޖެހޭނެ ކަމަ ރިފްރަންޑަމް ގާނޫނަށް މަތިކޮށްފައި މި ވިދާޅުވަނީ، އަށްވަނަ އިޞްލާޙުގައި އޮތް އެއްޗެއް ތަފްޞީލުކޮށްދޭ ވާހަކައެއް ނުބުނޭ.ހުޅުމާލެ ދާއިރާގެ ކުރީގެ މެންބަރު އަލީ ނިޔާޒު
މި ބައްދަލުވުމުގައި އިލެކްޝަންސް ކޮމިޝަނުން ވަނީ ރެފަރެންޑަމްއާ ގުޅޭގޮތުން ހޭލުންތެރިކަން އިތުރުކުރުމަށް މިހާތަނަށް ކޮށްފައިވާ މަސައްކަތްތަކުގެ ތަފާސް ހިސާބުތައް ހިއްސާކޮށްފަ އެވެ. އެގޮތުން އަށް ގަޑިއިރުގެ ހޭލުންތެރިކަމުގެ ޕްރޮގްރާމްތަކެއް ހިންގުމުގެ އިތުރުން، ހަތަރު ހާހަށްވުރެ ގިނަ ލީފްލެޓް ބަހާފައިވާ ކަމަށް ކޮމިޝަނުން ބުނެފައިވެ އެވެ. ނަމަވެސް އަލީ ނިޔާޒު ވިދާޅުވީ އެމްޑީޕީން ރާއްޖޭގެ ހުރިހާ ރަށަކަށް ދަތުރުކުރިއިރު، ދެވަނަ އިންތިޚާބެއް ނުވަތަ ރެފަރެންޑަމް އެއް އޮންނަކަން ވެސް އާންމު ރައްޔިތުންނަށް ނޭނގޭ ކަމަށެވެ.
އަލީ ނިޔާޒު އިތުރަށް ވިދާޅުވީ، ގާނޫނުއަސާސީއަށް ގެނައި އަށްވަނަ އިސްލާހުގައި އޮތް ކަންކަން ތަފްސީލުކޮށްދީ، ވޯޓުގައި "އާއެކޭ" ނުވަތަ "ނޫނެކޭ" ބުނަންވީ ސަބަބުތައް ރައްޔިތުންނަށް އޮޅުންފިލުވައިދޭން ޖެހޭނެ ކަމަށެވެ. އަދި ކުރިއަށް އޮތް ތަނުގައި ހޭލުންތެރިކުރުވުމުގެ މަސައްކަތްތައް އިތުރު ލެވެލްއަކަށް ގެންދިއުމަށް އިލެކްޝަންސް ކޮމިޝަނުން މަސައްކަތް ކުރަމުންދާ ކަމަށާއި، އެކަމުގައި އެމްޑީޕީގެ ފުރިހަމަ އެހީތެރިކަން ދޭނެ ކަމުގެ ޔަގީންކަން ކޮމިޝަނަށް ދީފައިވާނެ ކަމަށްވެސް އޭނާ ވިދާޅުވި އެވެ.
