އިންތިޚާބުތައް އެއްކޮށް، ދައުރަށް ބަދަލު ގެންނަ ވޯޓަކީ ގާނޫނާ ޚިލާފަށް ނަގާ ވޯޓެއް: ސަލީމް

ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްކޮށްލައި، ދައުރަށް ބަދަލު ގެނައުމަށް ސަރުކާރުން އަންގައިގެން އިލެކްޝަންސް ކޮމިޝަނުން ނަގަން އުޅޭ ޚިޔާލު ހޯދުމުގެ ވޯޓަކީ ގާނޫނާ ޚިލާފަށް ކުރިއަށްގެންދާ ކަމެއް ކަމަށް ރައްޔިތުންގެ މަޖިލީހުގެ ކުރީގެ ނައިބު ރައީސް އަޙުމަދު ސަލީމް (ސައްލެ) ވިދާޅުވެއްޖެ އެވެ.

ސަލީމް މިހެން ވިދާޅުވީ އަންނަ އޭޕްރިލް މަހުގެ 4 ވަނަ ދުވަހު ބޭއްވުމަށް ނިންމާފައިވާ ޚިޔާލު ހޯދުމުގެ ވޯޓާ ގުޅިގެން ހުރި ކަންބޮޑުވުންތައް ހިއްސާކުރުމަށް އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުންނެވެ.

މި ބައްދަލުވުމުގައި ވާހަކަދައްކަވަމުން ސަލީމް ވިދާޅުވީ، ސަރުކާރުގެ އަތުގައި ބާރުތައް އޮތުމުން ރައްޔިތުން ގަދަކަމުން ވޯޓަކާ ހަމައަށް ގެންދެވިދާނެ ކަމަށެވެ. ނަމަވެސް އެގޮތަށް ކަންކަން ކުރި ނަމަވެސް، މިކަމުގައި ރައްޔިތުން ވަރަށް ބޮޑަށް ވިސްނަންޖެހޭ ކަމަށް އޭނާ ފާހަގަކުރެއްވިއެވެ. އިންތިޚާބުތައް އެއްކޮށްލުމާއި ދައުރަށް ބަދަލު ގެނައުމަކީ ގާނޫނީ އޮނިގަނޑުގެ ބޭރުން ކުރަން އުޅޭ ކަމެއްކަން ފާހަގަކުރައްވައި، ސަލީމް ވިދާޅުވީ ގަދަކަމުން ވޯޓުލާން ޖެއްސި ކަމުގައި ވިޔަސް މި ވޯޓުގައި ރައްޔިތުން ސަރުކާރަށް ބޮޑުތަނުން "ނޫނެކޭ" ބުނަންޖެހޭ ކަމަށެވެ. 

އިންތިހާބުތައް އެއްކޮށްލަން ސަރުކާރުން އަންގައިގެން އިލެކްޝަންސް ކޮމިޝަނުން ކުރިޔަށް މިގެންދާ ފެންނަ ނުފެންނަ ވޯޓަކީ، އަޅުގަނޑުމެން ގަބޫލުކުރާ ގޮތުގަ ގާނުނާ ހިލާފަށް ކުރިޔަށް ގެންދާ ވޯޓަކަށް ވުމާ އެކު އެކަން ބާތިލު ކުރުމަށް ކޯޓަށް މައްސަލަ ހުށަހަޅައިގެން ހަމަ އެއްގޮތަކަަށް ވެސް ކޯޓުން އެކަން ބަލައިނުގަނެ އަދި މައްސަލައިގެ އަޑުއެހުމެެއް ނުބާއްވާ ގޮތެއް ނުނިންމާ ކުރިޔަށް ދާތީ އެކަމުގެ ކަންބޮޑުވުން ރައްޔިތުންނާ ހިއްސާ ކުރީ. ކޮންމެ ގޮތެއްގަ ވިޔަސް ބާރުތައް އޮތީތީ ވޯޓަކާ ހަމައަށް ގެންދެވިދާނެ ރައްޔިތުން ގަދަކަމުން. އެގޮތަށް ގެންދިޔަ ކަމުގަ ވީނަމަވެސް އަޅުގަނޑުމެން ވަރަށް ބޮޑަށް މިކަމަށް ވިސްނަން އެބަޖެހޭ. މިޔަށް ރައްޔިތުން ބޮޑުތަނުން ނޫނެކޭ ބުނަންޖެހޭ. ނޫނެކޭ ބުނުމުގެ ގޮތުން ނޫނެކޭ އިންނަ ގޮޅީގަ އަޅުގަނޑުމެން ފާހަގަ ޖަހަން ޖެހޭ

ރައްޔިތުންގެ މަޖިލީހުގެ ކުރީގެ ނައިބު ރައީސް އަޙުމަދު ސަލީމް (ސައްލެ)

ސަލީމް އިތުރަށް ވިދާޅުވީ، ރައްޔިތުންނަށް ދެރަވާނެ ނުވަތަ ގެއްލުންވާނެ އެއްވެސް ކަމެއްގައި އެމްޑީޕީން ބައިވެރިނުވާނެ ކަމަށާއި، އެފަދަ ކަމަކަށް އެ ޕާޓީން ތެދުވެ މަސައްކަތް ނުކުރާނެ ކަމުގެ ޔަގީންކަން އަރުވާ ކަމަށެވެ. އެހެންކަމުން މިކަމާ މެދު ރައްޔިތުން ވަރަށް ބޮޑަށް ހޭލުންތެރިވެ، ސަމާލުކަން ދިނުމަށް އޭނާ ވަނީ އިލްތިމާސް ކުރައްވާފަ އެވެ.

އިންތިޚާބުތައް އެއްކޮށްލުމަށް ނަގާ ވޯޓަކީ ގާނޫނާ ޚިލާފު ކަމެއްގެ ގޮތުގައި ސިފަކުރައްވައި، ސަލީމް ތަކުރާރުކޮށް ވިދާޅުވީ ރައްޔިތުންނަށް މަޖުބޫރުކޮށްގެން ވޯޓުލާން ޖެއްސި ނަމަވެސް، ގައުމުގެ މުސްތަގުބަލަށްޓަކައި މިކަމަށް ނޫނެކޭ ބުނުމަކީ ކޮންމެހެން ކުރަންޖެހޭ ކަމެއް ކަމަށެވެ. މި ވޯޓަކީ ސަރުކާރުން ބޭނުންވާ ވަކި މަގްސަދުތަކެއް ހާސިލުކުރުމަށް ކުރާ ކަމެއްގެ ގޮތުގައި އިދިކޮޅު ފަރާތްތަކުން އަންނަނީ ތުހުމަތު ކުރަމުންނެވެ.