ވެލާނާ އެއަރޕޯޓުން ބީއެމްއެލްގެ ފައިސާ ފޭރުނު މައްސަލައިގައި 8 މީހުންނަށް ދައުވާ ކުރަން ހުށަހަޅައިފި
11 މާރިޗު 2026 | ބުދަ 13:51ވެލާނާ އިންޓަރނޭޝަނަލް އެއަރޕޯޓުގައި ބޭންކް އޮފް މޯލްޑިވްސްގެ މުވައްޒަފުންނަށް ވަޅިން ބިރުދައްކައި ގިނަ އަދަދެއްގެ ފައިސާ ފޭރުނު މައްސަލައިގައި 8 މީހެއްގެ މައްޗަށް ދައުވާކުރުމަށް ކްރިމިނަލް ކޯޓަށް ހުށަހަޅައިފި. މި ހާދިސާގައި އެކި ގައުމުތަކުގެ ފައިސާ ހިމެނޭހެން ބޮޑު އަދަދެއް ފޭރިފައިވާއިރު، ދައުވާލިބޭ މީހުންގެ އަތުން އެ ފައިސާ އަނބުރާ ހޯދުމަށް ޕްރޮސިކިއުޓާ ޖެނެރަލްގެ އޮފީހުން ވަނީ އެދިފަ. މި މައްސަލައިގައި ހިމެނޭ މީހުންގެ މައްޗަށް ފޭރުމާއި، ބިރުދެއްކުމާއި، ތޫނު އެއްޗެއް ގެންގުޅުމުގެ ދައުވާތައް ވަނީ އުފުލާފަ.
ވެލާނާ އިންޓަނޭޝިނަލް އެއާޕޯޓް
ވެލާނާ އިންޓަރނޭޝަނަލް އެއަރޕޯޓުގައި ބޭންކް އޮފް މޯލްޑިވްސްގެ މުވައްޒަފުންނަށް ވަޅިން ބިރުދައްކައި ގިނަ އަދަދެއްގެ ފައިސާ ފޭރުނު މައްސަލައިގައި 8 މީހުންގެ މައްޗަށް ދައުވާތައް ކުރުމަށް ޕްރޮސިކިއުޓާ ޖެނެރަލްގެ އޮފީހުން ކްރިމިނަލް ކޯޓަށް ހުށަހަޅައިފި އެވެ.
މި މައްސަލައިގައި ދައުވާ ކުރެވިފައިވަނީ 8 ފެބްރުވަރީ 2026 ދުވަހާއި 26 ފެބްރުވަރީ 2026 ދުވަހުއެވެ. މި މައްސަލަ ހިނގީ 27 އޮކްޓޫބަރު 2025 ދުވަހުގެ ފަތިހު 4:15 އެހައިކަންހާއިރު އެވެ.
ދައުވާގައި ބުނެފައިވާ ގޮތުގައި މި ހާދިސާ ހިނގާފައިވަނީ ވެލާނާ އިންޓަރނޭޝަނަލް އެއަރޕޯޓުގެ ޓާރމިނަލް 1 ގައި ހުންނަ ބޭންކް އޮފް މޯލްޑިވްސްގެ ޑޮލަރު އެކްސްޗޭންޖް ކައުންޓަރަށް ގެންދިއުމަށް މަސައްކަތް ކުރަނިކޮށެވެ. ގިނަ އަދަދެއްގެ ފައިސާ ސޫޓްކޭސްއަކަށް އަޅައިގެން ބޭންކްގެ ދެ މުވައްޒަފަކު އެއަރޕޯޓް އައު ޓަރމިނަލްގެ ގޭޓް 1 ގެ ކުރިމަތީގައި ތިއްބައި، އެމީހުންނަށް ވަޅިން ބިރުދައްކައި ފައިސާ އަޅާފައިވާ ސޫޓްކޭސް ފޭރިގަނެފައިވާ ކަމުގަ އެވެ.
ފޭރުނު ފައިސާގެ ތެރޭގައި 4،900 ޔޫރޯއާއި، 1،735 ޕައުންޑާއި، 2،610 ސިންގަޕޯރ ޑޮލަރާއި، 1،345 އޮސްޓްރޭލިއަން ޑޮލަރާއި، 510 ސްވިސް ފްރޭންކާއި، 1،515 ކެނޭޑިއަން ޑޮލަރާއި، 334،000 ޖަޕަނީސް ޔެންއާއި، 10،420 ހޮންގކޮންގް ޑޮލަރާއި، 106،120 ޔޫއެސް ޑޮލަރާއި، 23،778 ދިވެހި ރުފިޔާއާއި، 25،000 އިންޑިއަން ރުޕީސްއާއި، 600 ޗައިނީސް ޔުއާން ހިމެނެ އެވެ.
މި މައްސަލައިގައި ދައުވާ ކުރެވިފައިވާ މީހުންނަކީ ތ. ވިލުފުށި، އެހީވާގެ، އަޙްމަދު މާހިދުއާއި، ސ. ހިތަދޫ، ވަށަގުލިމާގެ، ޢަލީ އަފްޒަލާއި، ގއ. ވިލިނގިލި، ބިނާ، ޢަބްދުލްއައްވަލު އިބްރާހީމް އަބޫބަކުރާއި، ކ. ގުރައިދޫ، އަޅިވިލާގެ، ޙުސައިން ޝަހުދުއާއި، ލ. މާވަށް، ރޭޝަމް، މާޒިން މޫސާއާއި، މ. ކޯރަސް، އަޙްމަދު ރައިހާން ނަޢީމްއާއި، ކ. ގުރައިދޫ، އަޅިވިލާގެ، އިބްރާހީމް އަނޫފްއާއި، ރ. މަޑުއްވަރި، މީޒާން، އިސްމާޢީލް ސިރްހާން އެވެ.
އަޙްމަދު މާހިދުގެ މައްޗަށް ދިވެހިރާއްޖޭގެ ޤާނޫނުލްޢުޤޫބާތުގެ ދަށުން ފޭރުމުގެ ކުށާއި، ތޫނުއެއްޗެއް ބޭނުންކޮށްގެން މީހަކަށް ބިރުދެއްކުމުގެ ކުށާއި، މަޤްބޫލު ސަބަބެއްނެތި ޢާންމު ތަނެއްގައި ތޫނުއެއްޗެއް ގެންގުޅުމުގެ ކުށުގެ ދައުވާ ކުރެވިފައިވެ އެވެ.
ޢަލީ އަފްޒަލްގެ މައްޗަށް ފޭރުމުގެ ކުށާއި، ތޫނުއެއްޗެއް ބޭނުންކޮށްގެން މީހަކަށް ބިރުދެއްކުމުގައި ބައިވެރިވުމުގެ ކުށުގެ ދައުވާ ކުރެވިފައިވެ އެވެ.
ޢަބްދުލްއައްވަލް އިބްރާހީމް އަބޫބަކުރުގެ މައްޗަށާއި، ޙުސައިން ޝަހުދުއާއި، މާޒިން މޫސާއާއި، އަޙްމަދު ރައިހާން ނަޢީމްއާއި، އިބްރާހީމް އަނޫފްއާއި، އިސްމާޢީލް ސިރްހާންގެ މައްޗަށް ފޭރުމުގައި ބައިވެރިވުމުގެ ކުށުގެ ދައުވާ ކުރެވިފައިވެ އެވެ.
މި ޢަމަލުގެ ސަބަބުން ބޭންކް އޮފް މޯލްޑިވްސްއަށް ލިބުނު ގެއްލުމުގެ ބަދަލު ދަޢުވާލިބޭ މީހުންގެ އަތުން ނަގައިދިނުމަށް ޕްރޮސިކިއުޓާ ޖެނެރަލްގެ އޮފީހުން ކޯޓުގައި އެދިފައިވެ އެވެ.
