ވެމްކޯގެ މުވައްޒަފުންގެ ސަލާމަތާ ގުޅޭ މައްސަލައެއް އެޗްއާރްސީއެމް އިން ތަހުގީގު ކުރަނީ

ވޭސްޓް މެނޭޖްމަންޓް ކޯޕަރޭޝަން (ވެމްކޯ) ގެ މަސައްކަތުގެ މާހައުލުގައި މުވައްޒަފުންނަށް ތަކުރާރުކޮށް އަނިޔާލިބި، ފުރާނައަށް ގެއްލުންވާ ފަދަ ނުރައްކާތެރި ހާދިސާތަކެއް ހިނގަމުންދާތީ، އެ ކުންފުނީގެ މަސައްކަތްތެރިންގެ ސަލާމަތާއި ރައްކާތެރިކަމާ ގުޅޭ މައްސަލައެއް ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރްސީއެމް) އިން ތަހުގީގު ކުރަން ފަށައިފި އެވެ.

އެ ކޮމިޝަނުން މި މައްސަލަ ބަލަން ފަށާފައިވަނީ ވެމްކޯގެ މަސައްކަތު މާހައުލުގައި ހުރި ނުރައްކާތަކާ ގުޅޭގޮތުން ހުށަހެޅުނު ޝަކުވާތަކަކާ ގުޅިގެންނެވެ.

އެޗްއާރްސީއެމް އިން ބުރާސްފަތި ދުވަހު ނެރުނު ނޫސް ބަޔާނެއްގައި ބުނީ، ވެމްކޯގައި ކުނި އުކާލުމާއި މެނޭޖުކުރުމުގެ މަސައްކަތުގައި އުޅޭ މުވައްޒަފުންގެ ސަލާމަތާ މެދު ބޮޑެތި ކަންބޮޑުވުންތަކެއް އެބަހުރި ކަމަށެވެ. އަދި މިފަދަ ހާދިސާތައް ހިނގަމުންދާތީ، އެ ކުންފުނީގައި މަސައްކަތްތެރިންގެ ރައްކާތެރިކަމަށް އަޅާފައިވާ ފިޔަވަޅުތަކުގެ އެކަށީގެންވާ ކަމާމެދު އާންމުންގެ މެދުގައި ސުވާލު އުފެދިފައިވާ ކަމަށްވެސް އެ ކޮމިޝަނުން ފާހަގަކޮށްފައިވެ އެވެ.

މި ތަހުގީގުގެ ތެރެއިން، "މަސައްކަތު މާހައުލުގެ ސަލާމަތާއި ސިއްހީ ރައްކާތެރިކަމުގެ ގާނޫނު" ގެ ދަށުން މުވައްޒަފުންނަށް ލިބިދޭންޖެހޭ ހިމާޔަތް ކަށަވަރު ކޮށްދީފައިވޭތޯ އެޗްއާރްސީއެމް އިން ބަލާނެ އެވެ. މީގެ އިތުރުން، މަސައްކަތްތެރިންނަށް ބޭނުންވާ ޕާސަނަލް ޕްރޮޓެކްޓިވް އިކުއިޕްމަންޓް (ޕީޕީއީ) ފޯރުކޮށްދިނުމާއި، ރައްކާތެރިކަމުގެ ފިޔަވަޅުތައް އަމަލީގޮތުން ތަންފީޒުކުރާ މިންވަރުގެ އިތުރުން، ނުރައްކާތަކުން ސަލާމަތްވުމަށް ބޭނުންވާ ތަމްރީނުތައް މުވައްޒަފުންނަށް ދީފައިވޭތޯވެސް އެ ކޮމިޝަނުން ތަހުގީގު ކުރާނެ އެވެ.

އެޗްއާރްސީއެމް އިން އިތުރަށް ބުނި ގޮތުގައި، މުވައްޒަފުންނަށް އެއްވެސް ބިރުވެރިކަމެއް ނުވަތަ ބަދަލުހިފުމުގެ އަމަލެއް ކުރިމަތިވެދާނެ ކަމުގެ ބިރެއް ނެތި، މަސައްކަތުގެ މާހައުލުގައި ހުރި ކަންބޮޑުވުންތައް ހިއްސާކުރުމުގެ ފުރުސަތު އޮތްތޯ ވެސް މި ތަހުގީގުގެ ތެރެއިން ބަލާނެ އެވެ. އެހެންކަމުން، މި މައްސަލައާ ގުޅޭ އެއްވެސް މައުލޫމާތެއް ލިބިފައިވާ ފަރާތެއްވާނަމަ ވެމްކޯގެ މުވައްޒަފުންނަށް އެއްބާރުލުން ދިނުމަށް އެ ކޮމިޝަނުން ވަނީ އިލްތިމާސްކޮށްފަ އެވެ. އަދި މައުލޫމާތު ދޭ ފަރާތްތަކުގެ ސިއްރު ހިފަހައްޓާނެ ކަމުގެ ޔަގީންކަން ވެސް އެޗްއާރްސީއެމް އިން ވަނީ ދީފަ އެވެ.

ވެމްކޯގައި ހިނގާފައިވާ ނުރައްކާތެރި ހާދިސާތަކުގެ ތެރެއިން އެންމެ ފާހަގަކޮށްލެވޭ އެއް ހާދިސާއަކީ، މިއަހަރުގެ ޖެނުއަރީ މަހުގެ 26 ވަނަ ދުވަހު ތިލަފުށީގައި ހިނގި ހާދިސާ އެވެ. އެ ދުވަހު ކުނި ނަގަން އުޅުމުގެ ތެރޭގައި ހައިމާކެއްގެ ދަތްގަނޑުން ޖެހި، ބަންގްލަދޭޝްގެ މުވައްޒަފެއް ކަމަށްވާ އަމީން މިއާ ވަނީ މަރުވެފަ އެވެ.