ކޮންމެ ކަމެއް ވެސް ހައްލުކޮށްދެއްވާނީ މީޑިއާ އަށް ތިލަވެ، ނުކަތާ ވަރުވީމަތޯ؟

ރައީސް ޑރ.މުހައްމަދު މުއިއްޒު އެވެ.  ހުރިހާ ކަމެއް މި ދަނީ މި ޒާތަށެވެ. މީޑިއާގައި މައްސަލަތައް ފެންމަތިވެ ރައްޔިތުން ރަތަށް އަރާ ހިސާބަށް ނުދަނީސް އެއްވެސް ކަމެއް ސަރުކާރަށް އެނގޭ ކަމަކަށް ނުވެ އެވެ. ސަރުކާރު ހޫނު ފެނަށް ވެއްޓި މުޅި ސަރުކާރަށް އާއްމުންގެ ފާޑުކިޔުން ކަމެއްގައި އަމާޒު ނުވަނީސް ރައްޔިތުންނަށް އެއްވެސް ކަމެއްގައި ރާހަތެއް ލިބޭނެ ފަދަ އެއް ނެތެވެ. ސަރުކާރު ކުންފުންޏަކަސް އިދާރާ އަކަސް ކަން ހިނގަނީ މި އުސޫލުންނެވެ.

މި ފަހުން ހިނގި މިފަދަ ކަންކަމަށް ބަލާލާނަމެވެ. އަލިފާނުގެ ހާދިސާ ހިނގި ހިޔާ ފްލެޓުގެ 5 ވަނަ ޓަވަރުގެ ތިރީގައި ބަހައްޓާފައި ހުރި އޭސީ އައުޓްޑޯ ޔުނިޓްތައް ނުނަގާ މައްސަލަ ބޮޑުވެ އެކަން ތަކުލީފަކަށް ވި އިރުވެސް ސަރުކާރަށް އެކަން ރޭކާލީ ކަމަކަށް ނުވި އެވެ.  30 ޖެނުއަރީ 2026 ވީ ހުކުރު ދުވަހު އިރުއޮއްސި 6:45 ހާއިރު ހިނގި އެ ހާދިސާ އަށް ފަހު އޭސީ އައުޓް ޑޯ ޔުނިޓުތައް ނުނަގައިގެން އާއްމުން އައީ އެ ޝަކުވާ އުފުލަމުންނެވެ. ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން މަރާމާތުގެ މަސައްކަތް ކޮށް، ހަލާކުވި އޭސީ އައުޓްޑޯ ޔުނިޓްތައް ހިޔާ ފްލެޓުގެ 5 ވަނަ ޓަވަރު ބޭރުގައި ބެހެއްޓުންވީ އާއްމުންނަށް ބޮޑު އުނދަގުލަކަށެވެ. އެކަމަކާއި އަޅާލާނެ ވާލެއް ނުވެ އެވެ. ނަމަވެސް މީޑިއާ އިން އެކަން ސަމާލު ކަމަށް ގެނައި ދުވަހުގެ ރޭގަނޑު އެ އެއްޗެހި ނަގައިފި އެވެ. އެކަން ޕްރައޯރިޓީ ހައިވީ ތޯއްޗެކެވެ.

މާލޭ ގްރޭންޑްގެ އެއް ފްޓް ހަލާކުވެފައި ހުންނަތާ މަހެއް ވާން ކައިރި ވެފައިވީ އިރު ވެސް އެކަމަށް އެކަސީގެންވާ ޖަވާބެއް ނުދެ އެވެ. އެ ވާހަކަ އަހާލިޔަސް ޖަވާބެއް ނުދެވެ އެވެ. އާއްމުން ތިބީ ވާނުވާގަ އެވެ.  އެ ލިފްޓު ހަލާކުވީ ޖެނުއަރީ 24 ވަނަ ދުވަހު އެވެ. . ލިފްޓް ހަލާކުވުމާއި ގުޅިގެން އެ ތަން ބަލަހައްޓާ ކުންފުނި، ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ވަނީ އެ ލިފްޓުގައި އިއުލާނެއް ހަރުކޮށްފަ އެވެ. ޖެނުއަރީ މަހު ފަހުކޮޅު ހަރުކޮށްފައިވާ އެ އިއުލާން ހަރު ކުރި ތާރީހު އެނގެން ނެތް އިރު މީޑިއާގެ ސަމާލުކަަމަށް އެކަން އައުމާއި އެކު އެކަން ވެސް ހައްލުކޮށްފި އެވެ. ވިދާޅުވަނީ އެއީ އިއްތިފާގެއް ކަމަށެވެ.

ދެން އޮތީ ގެދޮރުވެރިޔާ  ފްލެޓުތަކަށް ދިރިއުޅުން ބަދަލުކުރާ އާއިލާތަކަށް ދިމާވި ގޮންޖެހުންތަކެވެ. މުޅި ސަރަހައްދު ގޮނޑުވުމާއި ބައެއް އަސާސީ ޚިދުމަތްތަައް ހޯދުމަށް ހުރި ދަތިތައް މީޑިއާ އަށް ތިލަވި ހިސާބުން އެކަން ވެސް އިސާހިތަކު ހައްލުކޮށްދެއްވައިފި އެވެ.

ވޭސްޓް މެނޭޖްމެންޓް ކޯޕަރޭޝަން (ވެމްކޯ)ގެ ބައެއް މުވައްޒަފުންނަށް ރޯދަ އިނާޔަތް ނުދޭ ކަމަށް އެ ކުންފުނީގެ ބައެއް މުވައްޒަފުން ކަންބޮޑުވުން ފާޅު ކުރީ މި އިހަކަށް ދުވަހު އެވެ.  އެކަން ވެސް މީޑިއާ އަށް ހާމަކުރުމާއި އެކު ހައްލުކޮށްދެއްވައިފި އެވެ. މި ނޫނަސް މުސާރަ އާއި އިނާޔަތުގެ ކަންކަމުގައި މީޑިއާ އަށް ކަންކަން ހާމަވުމުން މައްސަލަތައް ހައްލުކޮށްދެއްވާލެއް އަވަސް އެބަ ވެ އެވެ. އެހެންވީމަ ސުވާލަކީ ކޮންމެ ކަމެއް ވެސް ހައްލުކޮށްދެއްވާނީ މީޑިއާ އަށް ތިލަވެ، ނުކަތާ ވަރުވީމަތޯ އެވެ.