ފުރަތަމަ ދުވަހު ފަސް ލައްކަ ޓިކެޓް ރިޒާވް ކޮށްފި: ފީފާ

އަންނަ އަހަރު ރަޝިއާގައި އޮންނަ ފީފާ ވޯލްޑްކަޕްގެ ޓިކެޓް ވިއްކާލުމަށް ހުޅުވާލުމާއެކު ފުރަތަމަ ދުވަހުވެސް ފަސް ލައްކަ ޓިކެޓް ރިޒާވް ކޮށްފިކަމަށް ފީފާއިން ބުނެފިއެވެ.

ފީފާއިން ނެރުނު ބަޔާނެއްގައި އެ އިދާރާއިން ބުނެފައި ވަނީ ހުކުރު ދުވަހު ޓިކެޓް ރިޒާވް ކުރަން ހުޅުވާލުމާއެކު ފަސް ލައްކައަށްވުރެ ގިނަ ޓިކެޓް ހޯދުމަށް އެ އިދާރާގެ ވެބްސައިޓް މެދުވެރިކޮށް ސަޕޯޓަރުން އެދިފައިވާ ކަމަށެވެ. އެގޮތުން ފުރަތަމަ 24 ގަޑިއިރުގެ ތެރޭގައި އެންމެ ގިނައިން ޓިކެޓް ރިޒާވް ކޮށްފައި ވަނީ މި މުބާރާތް ބޭއްވުމަށް ހަމަޖެހިފައިވާ ރަޝިއާއިން ކަމަށާއި ރަޝިއާގެ ފަހަތުން އެންމެ ގިނަ ޓިކެޓް ރިކުއެސްޓް އައިސްފައި ވަނީ މެކްސިކޯ، އާޖެންޓީނާ، ބްރެޒިލް، ޗައިނާ، އެމެރިކާ، ކޮލޮމްބިއާ، ޖަރުމަން، އަދި އިނގިރޭސިވިލާތުން ކަމަށެވެ.

އެ ބަޔާނުގައި އަންނަ އަހަރު ރަޝިއާގެ މޮސްކޯގައި ހުންނަ ލުޒްނިކީ ސްޓޭޑިއަމްގައި އޮންނަ ވޯލްޑްކަޕް ފައިނަލް މެޗުގެ 50000 ޓިކެޓް ހޯދުމަށް ރިކުއެސްޓް އައިސްފައިވާ ކަމަށެވެ. އަދި ހަމަ އެ ސްޓޭޑިއަމްގައި މުބާރާތް ހުޅުވުމަށް ކުޅޭ މެޗުގެ ވެސް 40000 ޓިކެޓް ހޯދުމަށް ރިކުއެސްޓް އައިސްފައިވާ ކަމަށް އެ އިދާރާއިން ބުނެއެވެ.

ފީފާގެ ރަސްމީ ވެބްސައިޓް މެދުވެރިކޮށް ދެ ފިޔަވައްސެއްގެ ދަށުން ޓިކެޓް ވިއްކުމަށް ނިންމާފައިވާއިރު ފުރަތަމަ ފިޔަވަހީގެ ޓިކެޓް ވިއްކަން ފަށާފައިވަނީ ހުކުރު ދުވަހުއެވެ. އެންމެ އަގުހެޔޮކޮށް ޓިކެޓް ވިއްކުމަށް ހަމަޖެހިފައިވަނީ 105 ޑޮލަރަށެވެ. އަދި އެންމެ އަގުބޮޑު ޓިކެޓްގެ އަގުތަށް އުޅެނީ 1100 ޑޮލަރަށް ކަމަށް ފީފާއިން ހާމަކުރެއެވެ.

ޓިކެޓާއެކު ޓިކެޓް ނަގާ ފަރާތްތަކަށް ހާއްސަ ކުރެވިފައިވާ އައިޑެންޓިޓީ ކާޑުތަކެއް ލިބިގެންދާނެއެވެ. މި ކާޑުތަކަކީ ރަޝިއާގެ އިދާރާތާކަށް ވޯލްޑްކަޕާއި ގުޅިގެން ދާ މީހުން ސްކްރީން ކުރުމަށް ދެވޭ ކާޑުތަކެވެ.

ވޯލްޑްކަޕަށް މިހާތަނަށް ހަތް ޓީމު ކޮލިފައިވެފައިވާ އިރު އެ މުބާރާތުގެ މެޗުތައް ރަޝިއާގެ 11 ސިޓީއެއްގައި ކުރިޔަށްދާނެއެވެ. އެގޮތުން އެ ގައުމުގެ ކެޕިޓަލް ސިޓީ ކަމަށްވާ މޮސްކޯއާ ސެއިންޓް ޕީޓާސްބާގްއާ ސޯޗީގެ އިތުރުން ކަޒާންގައި މި މުބާރާތުގެ މެޗުތައް ކުރިޔަށްދާނެއެވެ.