އައްޑޫގައި ޑެންގީ ހުން ފެތުރެނީ، މިމަހުގެ މިހާތަނަށް 48 މީހުންނަށް ބަލި ޖެހިފައިވޭ
އައްޑޫގައި ޑެންގީ ހުން ފެތުރޭ މިންވަރު އިތުރުވަމުންދާތީ، އެކަމަށް ސަމާލުވުމަށް އައްޑޫ އެކުއެޓޯރިއަލް ހޮސްޕިޓަލުން ވަނީ އިލްތިމާސްކޮށްފައި. މިދިޔަ ޖެނުއަރީ މަހުން ފެށިގެން މިހާތަނަށް 100 އާ ގާތްކުރާ އަދަދަކަށް ކޭސް ރިޕޯޓުކޮށްފައިވާއިރު، ބަލިން ރައްކާތެރިވުމަށް މަދިރި އާލާވާ ތަންތަން ނައްތާލުމަށާއި ބަލީގެ އަލާމާތެއް ފެނިއްޖެނަމަ ލަސްނުކޮށް ސިއްހީ އެހީތެރިކަން ހޯދުމަށް ކަމާބެހޭ އިދާރާތަކުން ވަނީ އިރުޝާދު ދީފައި.
އައްޑޫ އެކުއެޓޯރިއަލް ހޮސްޕިޓަލްގެ ކައުންޓަރުތަކުން މީހުން ޚިދުމަތް ހޯދަނީ.
އައްޑޫ ސިޓީގައި ޑެންގީ ހުން ފެތުރެމުންދާތީ ސަމާލުވުމަށް އިލްތިމާސްކޮށްފި އެވެ.
އައްޑޫ އެކުއެޓޯރިއަލް ހޮސްޕިޓަލް (އޭއީއެޗް) އިން ބުނީ، މިއަހަރު ފެށުނު ފަހުން ޑެންގީ ހުން ޖެހިގެން ރިޕޯޓު ކުރާ މިންވަރު އިތުރުވެފައިވާ ކަމަށާއި، ބައްޔަށް ސަމާލުވާން ޖެހޭ ކަމަށެވެ.
އެގޮތުން ޖެނުވަރީ މަހު ޑެންގީ ހުން ޖެހިގެން 51 ކޭސް ރިޕޯޓުވެފައިވާ އިރު، މި މަހުގެ މިހާތަނަށް 48 ކޭސް ރިޕޯޓުކޮށްފައިވާ ކަމަށް އޭއީއެޗް އިން ބުނެ އެވެ. އަދި ޑެންގީގެ ކޭސްތައް އެންމެ ގިނަ ކޭސް ރިޕޯޓު ކޮށްފައިވަނީ ހިތަދޫ އާއި ފޭދޫ އިންނެވެ.
މީގެ އިތުރުން އޭއީއެޗް އިން ބުނީ، މި ބަލި ފެތުރެމުންދާއިރު، ބަލިން ރައްކާތެރިވުމަށް ފިޔަވަޅު އަޅަން ޖެހޭ ކަމަށާއި، 3 ދުވަހަށް ވުރެ ގިނައިން ހުން އަންނަ ނަމަ އަދި ކުޑަ ކަމުދެވޭ މިންވަރު މަދުވެ، އާދަޔާ ހިލާފަށް ވަރުދެރަވެ، ހަށިގަނޑުގެ އެއްވެސް ތަނަކުން ލޭ އައުން ފަދަ ކަމެއް ދިމާވެއްޖެނަމަ ލަސްނުކޮށް ސިއްހީ އެހީތެރިއެއްގެ ލަފައާއި އިރުޝާދު ހޯދަން ޖެހޭ ކަމަށެވެ.
އައްޑޫގައި ޑެންގީ ހުން ފެތުރެމުންދާތީ ސަމާލުވުމަށް އިލްތިމާސް ކޮށްފައިވާއިރު، މިދިޔަ މަހު ރާއްޖޭގެ ހުރިހާ އަތޮޅެއްގައި ރޯގާގެ ގޮތުގައި ފެތުރޭ ބަލިތައް ވަރަށް ބޮޑަށް އިތުރުވެފައިވާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނެފައިވެ އެވެ. އަދި ޑިސެންބަރު 2025 ގައި ޑެންގީ ހުމުގެ 424 ކޭސް ރެކޯޑުކުރެވިފައިވާ އިރު، ޖެނުއަރީ މަހު 647 ކޭސް ރިޕޯޓު ކޮށްފައިވާ ކަމަށެވެ.
ޑެންގީ ހުމަކީ އީޑީސް މަދިރިން ޖެހޭ ބައްޔެކެވެ. މަދިރިން ރައްކާތެރިވުމުގެ ގޮތުން ހަށިގަނޑު ރަނގަޅަށް ނިވައިވާ ގޮތަށް ހެދުން އެޅުމާއި، މަދިރި ލޯޝަން، ސްޕްރޭ ބޭނުންކުރުމަށް އެޗްޕީއޭ. އިން ވަނީ އެދިފައެވެ. ފަތިސް ގަޑީގައި އަދި ހަވީރު އިރުއޮއްސޭ ވަގުތު ގޭގެ ދޮރުތަކާއި ކުޑަ ދޮރުތައް ލައްޕާފައި ބެހެއްޓުމާއި، ހުސްފުޅި، ދަޅު ފަދަ ފެން ހަރުލާ ތަކެތި ގޯތިތެރެ އާއި މަގުމައްޗަށް އުކާނުލުމާއި، އަދި ފެން ހަރުލާ ގޮތަށް ހުންނަ ތަކެއްޗާއި، ތަންތަން ސާފުކުރުމަށް އެޗްޕީއޭއިން އިލްތިމާސްކޮށްފައިވެ އެވެ.
