މިސަރުކާރުން އައްޑޫ ސިޓީގެ ކަރަންޓުގެ މައްސަލަ ހައްލު ކުރުމަށް ގެންނަނީ ބައު ޖަނަރޭޓަރުތައް: މެންބަރު އަހުމަދު ދީދީ
26 ޖެނުއަރީ 2026 | ހޯމަ 07:23މެންބަރު އަހުމަދު ދީދީ ވިދާޅުވީ ކަރަންޓަށް މައްސަލައެއް ދިމާވާއިރަށް ކޮންމެވެސް ދިމާލަކުން 1.2، 1.3 ނުވަތަ 1.4 މެގަވޯޓުގެ ބޭނުން ކޮށްފައިވާ ޖަނަރޭޓަރެއް ގެނެސް، ވަގުތީ ހައްލެއް ގެންނަ ކަމަށް.
ރާއްޖެޓީވީގެ ވައުދުނާމާ ޕްރޮގްރާމްގައި ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ ވާހަކަ ދައްކަވަނީ | ރާއްޖެއެމްވީ
މިސަރުކާރުން އައްޑޫ ސިޓީގެ ކަރަންޓުގެ މައްސަލަ ހައްލު ކުރުމަށް ބައު ޖަނަރޭޓަރުތައް ގެނެސް ވަގުތީ ހައްލު ހޯދައިދޭ ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ ވިދާޅުވެއްޖެ އެވެ.
ރާއްޖެޓީވީގެ ވައުދުނާމާ ޕްރޮގްރާމްގައި މެންބަރު އަހުމަދު ދީދީ ވަނީ އައްޑޫ ސިޓީގެ ތަރައްގީ މިސަރުކާރުން ހުއްޓުވާފައިވާތީ އެކަމުގެ ކަންބޮޑުވުންފާޅު ކުރައްވާފަ އެވެ. ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ތަރައްގީގެ ގިނަ މަޝްރޫއުތައް ކުރިއަށް ދިޔަ ކަމަށާއި، ސަރުކާރު ބަދަލުވުމާއެކު ހުރިހާ މަސައްކަތެއް ހުއްޓިފައިވާ ކަމަށް އޭނާ ވިދާޅުވި އެވެ.
އައްޑޫ ސިޓީ ރައްޔިތުންގެ އެންމެ ބޮޑު ކަންބޮޑުވުމަށް އިޝާރާތް ކުރައްވައި މެންބަރު އަހުމަދު ދީދީ ވިދާޅުވީ ކަރަންޓު ކެނޑޭ މައްސަލަ ވަރަށް ބޮޑު ކަމަށާއި، ސަރުކާރަށް ދެއަހަރަށް ވުރެ ގިނަ ދުވަސްވެގެން ދިޔައިރު މި މައްސަލައަށް ދާއިމީ ހައްލެއް ހޯދާދެވިފައިނުވާ ކަމަށެވެ. އަދި ކުރީ ސަރުކާރުގައި ކަރަންޓުގެ މައްސަލަ ހައްލު ކުރުމަށް ކުރިއަށް ގެންދިޔަ މަޝްރޫއު ހުއްޓުވާފައިވާ ކަމަށް މެންބަރު އަހުމަދު ދީދީ ވިދާޅުވި އެވެ.
މީގެ އިތުރުން މެންބަރު އަހުމަދު ދީދީ ވިދާޅުވީ މިސަރުކާރުން އައްޑޫގެ ކަރަންޓުގެ މައްސަލައަށް ދާއިމީ ހައްލެ ހޯދައިދިނުމަށް މަސައްކަތް ކުރާ މަންޒަރު ނުފެންނަ ކަމަށާއި، ކަރަންޓަށް މައްސަލައެއް ދިމާވާއިރަށް ކޮންމެވެސް ދިމާލަކުން ބޭނުން ކޮށްފައިވާ ޖަނަރޭޓަރެއް ގެނެސް، ވަގުތީ ހައްލެއް ގެންނަ ކަމަށެވެ.
40 އެތައް މެގަވޯޓެއްގެ އިންޖީނު ބެހެއްޓޭ ގޮތަށް ހާޑްވެޔަރ ބެހެއްޓޭ ގޮތަށް ފަރުމާކުރެވި އިމާރާތް ކުރެވި ގާތްގަނޑަކަށް 80 ޕަސެންޓް ނިމިފައި އިން ޕަވަރ ހައުސްއެއް އެބައިން. އޭރު ހަމަ އައްޑޫ ރައްޔިތުންގެ ވަރަށް ބޮޑު އުއްމީދެއް މިއީ. ހަމަ ޓޯޓަލް ސޮލިއުޝަނެއް. އަނެއްކާ ޓޫރިޒަމް ޑިވަލޮޕްވެގެން އަންނައިރު އަންނަ އިތުރު ލޯޑު ނެގޭ ގޮތަށް އެތަން ތަރައްގީ ކުރަމުން ދަނިކޮށް މިބޭފުޅުން ހަވާލުވީ. ހަވާލުވި ގޮތަށް އެކަން ވެސް ހުއްޓުވާލީ.ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ
މެންބަރު އަހުމަދު ދީދީ ވިދާޅުވީ މިހާރު އައްޑޫގެ ރައްޔިތުން ތިބެނީ ކޮންމެ ވަގުތަކު ވެސް ކަރަންޓު ކެނޑިދާނެ ކަމުގެ ބިރުވެރިކަމެއްގެ ތެރޭގައި ކަމަށެވެ. މި މައްސަލައަށް ދާއިމީ ހައްލެއް ލިބެންޖެހޭ ކަމަށާއި، މިކަމުގެ ނޭދެވޭ އަސަރު ވަރަށް ބޮޑަށް ކުރާ ކަމަށެވެ. އަދި ވިދާޅުވީ ފަތުރުވެރިކަން ކުރިއެރުވުމަށް މަސައްކަތް ކުރާއިރު، ކަރަންޓުގެ ކެޕެސިޓީ ފުޅާވެ، ހަރުދަނާވާން ޖެހޭ ކަމަށެވެ.
