މިސަރުކާރުން ބޭނުންވާ ގޮތަށް އިންތިޚާބުތައް ކާމިޔާބު ކުރުމަށް މުޅި މާލިއްޔަތު އެކުއެކީގައި އަރިކޮށްލާނެ: މެންބަރު މީކާއީލް
މެންބަރު މީކާއީލް ވިދާޅުވީ ކުރިއަށް އޮތް ލޯކަލް ކައުންސިލް އިންތިޚާބަށް ސަރުކާރުން ނުފޫޒު ފޯރުވައި، ދައުލަތުގެ މާލިއްޔަތާއި ކުންފުނިތަކުގެ ވަސީލަތްތައް ނަހަމަ ގޮތުގައި ބޭނުންކުރަމުންދާ ކަމަށް. އިންތިޚާބާ ދިމާކޮށް ވަޒީފާގެ ބިރުދެއްކުމާއި ރިޝްވަތު ބެހުމުގެ އަމަލުތައް ހިންގަމުންދާކަން ފާހަގަކުރައްވައި، މިއީ ރާއްޖޭގައި ބާއްވާ އެންމެ "ހަޑި" އިންތިޚާބަށް ވާނެ ކަމަށް އޭނާ ވިދާޅުވި.
ރާއްޖެޓީވީގެ ފަލަސުރުހީ ޕްރޮގްރާމްގައި ރައްޔިތުން މަޖިލީހުގެ ގަލޮޅު ދެކުނު ދާއިރާގެ މަޖިލިސް މެންބަރު މީކާއީލް އަހުމަދު ނަސީމް ވާހަކަ ދައްކަވަނީ | ރާއްޖެއެމްވީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުން ބޭނުންވާ ގޮތަށް އިންތިޚާބުތައް ކާމިޔާބު ކުރުމަށް މުޅި މާލިއްޔަތު އެކުއެކީގައި އަރިކޮށްލާނެ ކަމަށް ރައްޔިތުން މަޖިލީހުގެ ގަލޮޅު ދެކުނު ދާއިރާގެ މަޖިލިސް މެންބަރު މީކާއީލް އަހުމަދު ނަސީމް ވިދާޅުވެއްޖެ އެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި މެންބަރު މީކާއީލް ވިދާޅުވީ، ލޯކަލް ކައުންސިލް އިންތިޚާބަށް ސަރުކާރުން ވަރަށް ބޮޑަށް ނުފޫޒު ފޯރުވަމުންދާ ކަމަށާއި، ރައްޔިތުންގެ ފަރުދީ މިނިވަން ކަމަށް އަރައިގަންނަމުންދާ ކަމަށެވެ. ސަރުކާރާ ދެކޮޅަށް އިންތިޚާބުގައި ވާދަކުރާ ކެންޑިޑޭޓުންނަށް ގިނަ ފިއްތުންތައް ކުރިމަތިކުރުވާ ކަމަށާއި، އިންތިޚާބުގައި ވާދަކުރާތީވެ، ދަރިންނާއި، އާއިލާ ގުޅުންތައް އޮންނަ މީހުން ވަޒީފާއިން ވަކި ކުރަމުންދާ ކަމަށް މެންބަރު މީކާއީލް ވިދާޅުވި އެވެ. އަދި ވިދާޅުވީ ބިރު ދެއްކުމުގެ އިތުރުން ކުރިއަށް އޮތްތަނުގައި އެތައް ގުނައަކުން ފައިސާ ބަހާ މަންޒަރު ރައްޔިތުންނަށް ފެންނާނެ ކަމަށެވެ.
ސަރުކާރުން ބޭނުންވާ ގޮތަށް އިންތިޚާބުތައް ކާމިޔާބު ކުރުމަށް މުޅި މާލިއްޔަތު އަރިކޮށްލާނެކަން ފާހަގަކުރައްވައި މެންބަރު މީކާއީލް ވިދާޅުވީ މިހާރުވެސް ނުނަގަން ޖެހޭ އަދަދަށް މީހުން ވަޒީފާއަށް މީހުން ނަގަމުންދާ ކަމަށެވެ.
މީގެ އިތުރުން މެންބަރު މީކާއީލް ވިދާޅުވީ އިންތިޚާބަށް ސަރުކާރުގެ ކުންފުނިތައް ބޭނުން ކުރަމުންދާއިރު، ޕީއެންސީ ކެންޑިޑޭޓުންގެ ޕޯސްޓަރުތައް ހަރު ކުރުމުގެ މަސައްކަތް ވެސް އެޗްޑީސީގެ މުވައްޒަފުން ލައްވާ ކުރުވަމުންދާ ކަމަށާއި، އެކަމުގެ ހެކި އެބަހުރި ކަމަށެވެ. އަދި މިއީ ކަންބޮޑުވާ މައްސަލައެއް ކަމަށާއި، މިކަން ރައްޔިތުން ނުކުމެ ހުއްޓުވަން ޖެހޭ ކަމަށް އޭނާ ވިދާޅުވި އެވެ.
ހުޅުމާލޭގައި ޕީއެންސީ ކެންޑިޑޭޓުންނަށް ޕޯސްޓަރު ހަރުކޮށްދޭން ވެސް ތިބެނީ އެޗްޑީސީގެ ސްޓާފުން. ސީދާ ޔުނީފޯމްގައި އެނގޭތޯ. ވީޑިއޯ އެބަހުރި. ވީޑިއޯ ޑޮކިއުމަންޓް އެވިޑެންސް އަޅުގަނޑުމެންގެ އަތުގައި އެބަހުރި އެނގޭތޯ ސީދާ އެޗްޑީސީގެ ޔުނީފޯމްގައި ތިބެގެން އެބޭފުޅުންގެ ކެންވަސް ހަރުކޮށްދޭ މަންޒަރު އަޅުގަނޑުމެން ރިކޯޑު ކޮށްފައި އެބަހުރި. އެހެންވީމަ މިއީ ނުފޫޒު ނުފޯރުވާނެ ކަމަށް ދައްކަން ވެސް ބޭނުންވާ ސަރުކާރެއް ނޫން. ދައްކަން ވެސް ބޭނުންވާ ސަރުކާރެއް ނޫން. އެމީހުން ނުފޫޒު ފޯރުވާކަން ދައްކަން ވެސް ބޭނުން. ނުފޫޒު ފޯރުވަން ވެސް ފޯރުވާނެ އަދި ދުވަސްކޮޅަކުން އޮޅޭ ހިސާބަށް ދާނެ އެޗްޑީސީގެ އެމްޑީއަކީ ކާކުތޯ ވެސް. މާލޭގެ މޭޔަރު ކަމަށް އެ ވާދަ ކުރައްވާ ޕީއެންސީގެ ކެންޑިޑޭޓަކީ ވެސް އެޗްޑީސީގެ އެމްޑީގެ ގޮތުގައި ދުވަސްކޮޅަކުން ޕޯޓްރައި ކުރައްވަން ފައްޓަވާފާނެ.ރައްޔިތުން މަޖިލީހުގެ ގަލޮޅު ދެކުނު ދާއިރާގެ މަޖިލިސް މެންބަރު މީކާއީލް އަހުމަދު ނަސީމް
ކައުންސިލް އިންތިޚާބުގައި މާލޭގެ ކެންޕޭން މެނޭޖަރަކީ ރައީސް ޑރ.މުހައްމަދު މުއިއްޒު ކަމަށް އެމަނިކުފާނު އަމިއްލަފުޅަށް ވިދާޅުވެފައިވާތީ އެކަމަށް އިޝާރާތް ކުރައްވައި މެންބަރު މީކާއީލް ވިދާޅުވީ އެކަމުން ވެސް ނުފޫޒު އޮތް މިންވަރު ހާމަވާ ކަމަށެވެ. އަދި ވިދާޅުވީ އިންތިޚާބުގެ ކެންޑިޑޭޓުންނާއެކު މުލިއާގޭގައި އިންނަވައިގެން ރިޝްވަތުގެ ފައިސާ ބަހާނެކަަން އިއުލާން ކުރީ ވަރަށް ފާޅުގައި ކަމަށެވެ.
އެހެންކަމުން މިއިންތިޚާބު ކަންކަން ދާނެ ގޮތް ހިތަށް ގެންނަން ވެސް ނޭނގޭ ކަމަށާއި، މިފަހަރުގެ ލޯކަލް ކައުންސިލް އިންތިޚާބަކީ މިހާތަނަށް ރާއްޖޭގައި ބާއްވާ އެންމެ ހަޑި އިންތިޚާބަށް ވާނެ ކަމަށް އޭނާ ވިދާޅުވި އެވެ.
