އިންތިޚާބަށް ރީ- ރަޖިސްޓްރީ ވާން ބާކީ 1 ދުވަސް، އަވަހަށް ރަޖިސްޓްރީ ވާން އެދެފި
އަންނަ އޭޕްރީލް މަހު ބާއްވާ ލޯކަލް ކައުންސިލް އިންތިޚާބުގައި ވޯޓުލާން ރީ-ރަޖިސްޓްރީވުމުގެ ފުރުސަތު އާދިއްތަ ދުވަހުގެ މެންދުރު 3:00 އަށް ހަމަވާނެ. މި އިންތިޚާބާ އެކު ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމާ މެދު އާންމު ރައްޔިތުންގެ ޚިޔާލު ހޯދުމުގެ ވޯޓު ނެގުމަށް ވެސް ވަނީ ހަމަޖެހިފަ.
2026 އެޕްރީލް 04 ވާ ހޮނިހިރު ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބަށް، ކުރިމަތިލާ ޝަރުޠު ހަމަވެފައިވާ ފަރާތްތަކުގެ ތެރެއިން، މާލެ ސިޓީގެ ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ނަންތައް ތަރުތީބު ކުރުމަށްޓަކައި ބޭއްވި ގުރުއަތުނެގުމުގެ ތެރެއިން. | އިލެކްޝަންސް ކޮމިޝަން
ލޯކަލް ކައުންސިލް އިންތިޚާބާ އަންހެނުންގެ ތަރައްގީ އަށް މަސައްކަތް ކުރާ ކޮމިޓީތަކުގެ އިންތިޚާބުގައި ވޯޓު ލާން ރީ- ރަޖިސްޓްރީ ވާން ބާކީ އޮތީ 1 ދުވަސް ކަމަށާ ވީހާވެސް އަވަހަކަށް ރީ- ރަޖިސްޓްރީ ވާން އެދޭ ކަމަށް އިލެކްޝަންސް ކޮމިޝަން (އީސީ) އިން ބުނެފި އެވެ.
އަންނަ އޭޕްރީލް މަހުގެ 4 ވަނަ ދުވަހު ބާއްވާ މި އިންތިޚާބުގައި ވޯޓުލާން ރީ- ރަޖިސްޓްރީ ވުމުގެ ފުރުސަތު ހުޅުވާލީ މި މަހުގެ 10 ވަނަ ދުވަހުގަ އެވެ.
އާދިއްތަ ދުވަހުގެ މެންދުރު 3:00 ގައި މި ފުރުސަތު ހަމަވާއިރު އީސީ އިން އެދިފައި ވަނީ ވޯޓުލާން މިހާރު ރަޖިސްޓްރީކޮށްފައިވާ މަރުކަޒު ޔަގީންކޮށް، ރީ- ރަޖިސްޓްރީ ކުރަންޖެހޭ ނަމަ އެކަމަށް ސަމާލުކަން ދިނުމަށެވެ.
މި އިންތިޚާބާ އެކު ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްކޮށްލުމާއި ގުޅޭ ގޮތުން ރައްޔިތުންގެ ޚިޔާލު ހޯދުމުގެ ފެންނަ ނުފެންނަ ވޯޓު ވެސް ނެގުމަށް ވަނީ ހަމަޖެހިފަ އެވެ.
ރީ-ރަޖިސްޓްރީވުމަށް ހުށަހެޅޭނީ އިލެކްޝަންސް ކޮމިޝަނުގެ، 'ރީ- ރަޖިސްޓްރޭޝަން ޕޯޓަލް' ނުވަތަ 'މައި ޕޯޓަލް' މެދުވެރިކޮށެވެ.
ރީ- ރަޖިސްޓްރޭޝަން ޕޯޓަލް މެދުވެރިކޮށް އޮންލައިންކޮށް ފޯމު ހުށަހަޅާއިރު، ރަޖިސްޓަރީވުމަށް އެދޭ މީހާގެ، ވޯޓުލުމަށް ބޭނުންކުރެވޭ ކާކުކަން އަންގައިދޭ ރަސްމީ ލިޔުމެއްގެ ކޮޕީއެއް އަދި ހުށަހަޅާ މީހާގެ ލައިވް ފޮޓޯ ހުށަހަޅަން ޖެހޭނެ ކަމަށް އިލެކްޝަން ކޮމިޝަނުން ބުނެ އެވެ. 'މައި ޕޯޓަލް' މެދުވެރިކޮށް ފޯމު ހުށަހެޅޭނީ ހަމައެކަނި ވެރިފައިޑް އީފާސް އެކައުންޓަކުންނެވެ.
