ޕާކިސްތާނުން ކާބުލަށް ވައިގެ ހަމަލާއެއް ދިން ކަމަށް ބުނެ، އަފްޣާނިސްތާނުގެ ޠާލިބާނުން ޕާކިސްތާނުގެ ސަރަޙައްދީ މަރުކަޒުތަކަށް ހަމަލާދީ، ދެ ޤައުމުގެ މެދުގައި ހާލަތު ދަނީ އިތުރަށް ގޯސްވަމުން.
ޕާކިސްތާނާއި އަފްޣާނިސްތާނާ ދެމެދު އޮންނަ ތުރުޚަމް ބޯޑަރު ހުރަސްކުރާ ސަރަހައްދަށް، އަފްޣާނިސްތާނުގެ ރައްޔިތުންގެ ތަކެއްޗާއެކު އުޅަނދުތަކުގައި އަނބުރާ އަފްޣާނިސްތާނަށް ދަތުރު ކުރަނީ، ސެޕްޓެމްބަރު 1، 2025
އަފްޣާނިސްތާނާއި ޕާކިސްތާނުގެ ސަލާމަތީ ބާރުތަކުގެ މެދުގައި ވަރުގަދަ ހަމަލާތަކެއް ބަދަލު ކުރަމުންދާ ކަމަށް ރިޕޯޓުތައް ބުނެފިއެވެ.
އޭއެފްޕީ އިން ބުނެފައިވާ ގޮތުގައި ހޮނިހިރު ދުވަހުގެ ރޭ މެންދަމުން އަލިވި ފަހުން ދެ ޤައުމުގެ ސަރަޙައްދީ އިމުގައި ގަދަ ހަނގުރާމައެއް ވަނީ ހިނގާފައެވެ.
މިކަން ހިނގީ އަފްޣާނިސްތާނުގެ ވެރިރަށް ކާބުލް އަށް ވައިގެ ހަމަލާތަކެއް ޕާކިސްތާނުން ދިން ކަމަށް އަފްޣާނިސްތާނުން ތުހުމަތު ކުރުމަށް ފަހުގައެވެ.
"ޕާކިސްތާނުގެ ބާރުތަކުން ދިން ވައިގެ ހަމަލާތަކަށް ޖަވާބު ދިނުމުގެ ގޮތުން އަފްޣާނިސްތާނުގެ އިރުމަތީ ސަރަޙައްދުގައި ތިބި ޠާލިބާނުގެ ބާރުތަކުން ބޯޑަރު ސަރަހައްދު ގައި ހުރި ޕާކިސްތާނުގެ ބާރުތަކުގެ އެކި ސަރަޙައްދީ މަރުކަޒުތަކާ ދެކޮޅަށް ގަދަ ހަނގުރާމައެއް ފަށައިފި" ކަމަށް އަފްޣާނިސްތާނުގެ ސިފައިންގެ ބަޔާނެއްގައި ބުނެފައިވެއެވެ.
