ފޯޅަވަހި ހިމެނޭ ގޮތަށް އެމެރިކާގެ އަސްކަރީ މަރުކަޒުތަކަށް ހަމަލާދޭނެކަމަށް އީރާނުން އިންޒާރުދީފި

އެމެރިކާއިން ދެމުންދާ އަސްކަރީ އިންޒާރުތަކާ އެއްގޮތަށް އަމަލުކޮށްފިނަމަ، އެމެރިކާގެ އަސްކަރީ މަރުކަޒުތަކާއި، ވަސީލަތްތަކާއި އަދި މުދަލަކީ އީރާނުން ހަމަލާދިނުން ހުއްދަ "ޝަރުއީ އަމާޒުތަކެއް" ކަމަށް ބަލާނެ ކަމުގެ އިންޒާރު، އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރޭޒް އަދި ސަލާމަތީ މަޖިލީހުގެ ރައީސަށް ހުކުރު ދުވަހު އީރާނުން ފޮނުވި ސިޓީއެއްގައި ދީފި އެވެ.

އދ. އަށް އީރާނުން ކަނޑައަޅާފައި ހުންނަވާ ދާއިމީ މަންދޫބު އާމިރު ސައީދު އިރަވާނީ ފޮނުއްވި މި ސިޓީގައި ވިދާޅުވީ، އީރާނަށް ދޭ ކޮންމެ ހަމަލާއަކަށް "ސާބިތުކަމާއެކު" ރައްދުދޭނެ ކަމަށާއި، އެ ސަރަހައްދުގައި ހިންގާ އަސްކަރީ އުދުވާންތަކުގެ ނަތީޖާ ވަރަށް ހިތިވާނެ ކަމަށެވެ.

އީރާނުގެ އިންޒާރު މިހެން ދީފައިވާއިރު، ރާއްޖޭގެ ދެކުނުން އޮންނަ ފޯޅަވަހީގައި ވެސް އެމެރިކާގެ އަސްކަރީ ބޭހެއް އޮވެ އެވެ. އަދި އެއީ އީރާނަށް ހަމަލާ ދިނުމަށް އެމެރިކާ ބޭނުން  ކުރާ އެއް މަރުކަޒުކަމަށް ބައިނަލްއަގުވާމީ މީޑިއާތަކުގައި ރިޕޯޓްކޮށްފައިވެ އެވެ. 

މި ކުރިމަތިލުންތައް އުފެދިފައި މިވަނީ، ނިއުކްލިއާ މައްސަލައިގައި ވޮޝިންޓަނާއެކު އެއްބަސްވުމަކަށް އައުމަށް އެމެރިކާގެ ރައީސް ޑޮނަލްޑް ޓްރަމްޕް އީރާނަށް "ގިނަވެގެން 10 ނުވަތަ 15 ދުވަހުގެ" މުހުލަތެއް ދެއްވުމާ ގުޅިގެންނެވެ. އަދި ދެ ފަރާތުން އެއްބަސްވުމަކަށް ނާދެވިއްޖެނަމަ "ނުރައްކާތެރި ކަންތައްތަކެއް" ހިނގާނެ ކަމަށްވެސް ޓްރަމްޕް ވަނީ ވިދާޅުވެފަ އެވެ.

އދ. ގައި ހުންނަ އީރާނުގެ މިޝަނުން ޓްރަމްޕްގެ ވާހަކަތަކަށް ފާޑުކިޔަމުން ބުނީ، މިއީ އަސްކަރީ އުދުވާނެއް ފެށުމުގެ ހަގީގީ ބިރު އޮތް ކަމުގެ ނިޝާނެއް ކަމަށެވެ. ނަމަވެސް، ތެހެރާނުން ހަނގުރާމައަކަށް ބޭނުންނުވާކަން ފާހަގަކޮށް އެ ސިޓީގައި ބުނެފައިވަނީ، ކޮންޓްރޯލް ނުކުރެވޭ ފަދަ ނުރައްކާތެރި ނަތީޖާއެއް ނުކުމެދާނެ ކޮންމެ ކަމެއްގެ ފުރިހަމަ އަދި ސީދާ ޒިންމާ އެމެރިކާއިން އުފުލަން ޖެހޭނެ ކަމަށެވެ.

މެދުއިރުމަތީގައި މަސްރަހު ގޯސްވަމުންދާ ދަނޑިވަޅެއްގައި އެމެރިކާއިން އަސްކަރީ ބާރުތައް ޖަމާކުރަމުންދާތީ އދ. އިން ވަނީ ކަންބޮޑުވުން ފާޅުކޮށްފަ އެވެ. އދ. ގެ ތަރުޖަމާނު ސްޓެފަން ޑުޖަރިކް ނޫސްވެރިންނަށް މައުލޫމާތު ދެއްވަމުން ވިދާޅުވީ، ސެކްރެޓަރީ ޖެނެރަލް އެންޓޯނިއޯ ގުޓަރޭޒް، އެހެން ފަރާތްތަކެކޭވެސް އެއްފަދައިން، މި ފެންނަ އަސްކަރީ ތައްޔާރުތަކާއި، ހަނގުރާމައިގެ ކުޅިވަރުތަކާއި އަދި ތަމްރީނުތަކާ މެދު ނުހަނު ކަންބޮޑުވެވަޑައިގަންނަވާ ކަމަށެވެ. އެހެންކަމުން، އޮމާން މެދުވެރިވެގެން ކުރިއަށްގެންދާ މަޝްވަރާތައް އީރާނާއި އެމެރިކާއިންވެސް ކުރިއަށް ގެންދިއުމަށް އދ. އިން ބާރުއަޅާ ކަމަށް އޭނާ ވިދާޅުވި އެވެ.

އީރާނުގެ ނިއުކްލިއާ ޕްރޮގްރާމާ ގުޅޭގޮތުން އީރާނާއި އެމެރިކާއާ ދެމެދު ބޭއްވި މަޝްވަރާތަކުގެ ދެވަނަ ބުރު، އޮމާން މެދުވެރިވެގެން ފެބްރުއަރީ 17 ވަނަ ދުވަހު ޖެނީވާގައި ވަނީ ބާއްވާފަ އެވެ. އެ މަޝްވަރާތަކަށްފަހު އީރާނުގެ ފޮރިން މިނިސްޓަރު އައްބާސް އަރާގްޗީ ވިދާޅުވީ، މަޝްވަރާތަކުގައި ކުރިއެރުންތަކެއް ލިބިފައިވާ ކަމަށާއި، އެއްބަސްވުމަކަށް އާދެވިދާނެ ފަދަ ލިޔެކިޔުންތަކެއް އެކުލަވާލުމަށް ތެހެރާނާއި ވޮޝިންޓަނުން މަސައްކަތް ކުރާނެ ކަމަށެވެ.

އެމެރިކާގެ ދެ މަތިންދާބޯޓު އުފުލާ މަނަވަރާއި އެތައް ހާސް ސިފައިންނެއް ގަލްފް ސަރަހައްދަށް ފޮނުވާފައިވާ ޓްރަމްޕް، ސޯޝަލް މީޑިއާގައި ވަނީ އީރާނަށް ދޭ އިންޒާރުތައް ވަރުގަދަކުރައްވާފަ އެވެ.

ޓްރަމްޕްގެ "ޓްރުތް ސޯޝަލް" ޕްލެޓްފޯމްގައި ލިޔުއްވާފައިވަނީ، އީރާނުން އެއްބަސްވުމަކަށް އަންނަން ބޭނުންނުވާނަމަ، "ނުރައްކާތެރި ސަރުކާރަކުން" ދީފާނެ ހަމަލާއެއް ނައްތާލުމަށްޓަކައި، ޗާގޯސް އައިލެންޑްސްގައި އޮންނަ އިންޑިއާ ކަނޑުގެ ވައިގެ މަރުކަޒު ބޭނުންކުރަން އެމެރިކާއަށް މަޖުބޫރުވެދާނެ ކަމަށެވެ.

މީގެ ކުރިން ކުރެވުނު މަޝްވަރާތައް މިދިޔަ އަހަރު ނާކާމިޔާބުވީ، އިސްރާއީލުން އީރާނަށް ހަމަލާދީ 12 ދުވަހުގެ ހަނގުރާމައެއް ފެށުމުންނެވެ. އެ ހަނގުރާމައިގައި އެމެރިކާއިން ބައިވެރިވެ، އީރާނުގެ ފޯޑޯ، ނަޓާންޒް އަދި އިސްފަހާންގައި ހުރި ނިއުކްލިއާ ތިން މަރުކަޒަކަށް ބޮން އަޅާފައިވެ އެވެ.

ޓްރަމްޕް އެންމެ ފުރަތަމަ އަސްކަރީ ހަމަލާއެއްގެ އިންޒާރު ދެއްވީ، ސަރުކާރާ ދެކޮޅަށް މުޒާހަރާކުރި މީހުންނަށް އީރާނުން ދިން ނުރައްކާތެރި ހަމަލާތަކާ ގުޅިގެން ޖެނުއަރީ މަހުގަ އެވެ. އޭގެ ރައްދުގައި ތެހެރާނުން ވަނީ ގަލްފްގެ ތެޔޮ ބޭރުކުރާ މައި މަގު ކަމަށްވާ ސްޓްރެއިޓް އޮފް ހޯމްޒް ބަންދުކުރާނެ ކަމުގެ އިންޒާރުދީ، އެ ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކަށް ހަމަލާދީފާނެ ކަމަށް ބުނެފަ އެވެ.