ދުންފަތުގެ ބާވަތްތަކުގައި ސިއްހަތުގެ އިންޒާރު ޖަހަން ދިން މުއްދަތު އެޗްޕީއޭ އިން އިތުރު ކޮށްދީފި

ދުންފަތުގެ ބާވަތްތަކުގައި ސިއްހަތުގެ އިންޒާރު ނުވަތަ ލޭބަލް ޖަހަން ދިން މުއްދަތު ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުދަ ދުވަހު އިތުރު ހަ މަހަށް ފަސްކޮށްދީފި އެވެ.

މި މަހުގެ 28 ގައި ހަމަވާން އޮތް މުއްދަތު މިހާރު ވަނީ އަންނަ ޖުލައި މަހުގެ 28 އަށް ފަސް ކޮށްފައިވާ ކަމަށް އެޗްޕީއޭ އިން ބުނެ އެވެ.

ދުންފަތް ކޮންޓްރޯލް ކުރުމާ ގުޅޭ އާންމު ގަވާއިދުގެ ދަށުން ލާޒިމުކުރާ ދުންފަތުގެ ބާވަތްތައް ރަޖިސްޓްރީ ކުރުމާއި ސިއްހަތުގެ އިންޒާރު ޖެހުމުގެ އުސޫލަށް ބައެއް ބަދަލުތައް ގެނެސް އެޗްޕީއޭ އިން ވަނީ ބުދަ ދުވަހު އިއުލާން ކޮށްފަ އެވެ. އެ ބަދަލުތަކުގެ ތެރޭގައި މުއްދަތު ފަސްކުރުމަށް ނިންމުން ހިމެނެ އެވެ.

އެޗްޕީއޭ އިން ބުނީ އަންނަ ޖުލައި 28 ގެ ފަހުން ދުންފަތުގެ ބާވަތްތައް ރާއްޖެ އެތެރެކޮށް ވިއްކޭނީ ސިއްހަތުގެ އިންޒާރު ނުވަތަ ލޭބަލް ޖަހައިގެން ކަމަށެވެ. މިހާރު ސިއްހަތުގެ އިންޒާރު ނުޖަހައި ދުންފަތުގެ ބާވަތްތައް އެތެރެކުރާ މީހުންނަށް އެޗްޕީއޭ އިން ވަނީ އަންނަ ޖުލައި 27 ގެ ކުރިން އެ ތަކެތި ވިއްކައި ނިންމަން ހަނދާން ކޮށްދީފަ އެވެ.

އެޗްޕީއޭ އިން ހާމަކުރި ގޮތުގައި އެ ބަދަލާ ގުޅިގެން އަންނަ ޖުލައި 28 ގެ ކުރިން ދުންފަތުގެ ބާވަތްތަކުގައި ސިއްހަތުގެ އިންޒާރު ޖަހައިގެން އެތެރެކޮށް ވިއްކުމަށް ހުރަހެއް ނާޅާނެ އެވެ. މިއީ ވިޔަފާރިވެރިންނަށް އެ ބަދަލުތަކަށް ތައްޔާރުވުމަށް ފުރުސަތު ދިނުމުގެ ގޮތުން ނިންމި ނިންމުމެއް ކަމަށް އެ އިދާރާއިން ބުނެ އެވެ.

އެޗްޕީއޭ އިން ވަނީ ރަޖިސްޓާޑް ޓޮބޭކޯ ޕްރޮޑަކްޓްސް ލިސްޓަށް އައި ބަދަލުތަކެއް ވެސް ހާމަކޮށްފަ އެވެ. އެ ލިސްޓުގައި ހިމެނެނީ ގަވާއިދަށް އަމަލުކުރަން ފެށުމުގެ ކުރިން ކަނޑައެޅޭ މުއްދަތެއްގެ ކުރިން އެތެރެކޮށްފައިވާ ދުންފަތުގެ ހުރިހާ ބާވަތްތަކާއި ގަވާއިދަށް އަމަލުކުރަން ފެށި ފަހުން އަލަށް އެތެރެކުރުމަށް ގަވާއިދުގެ ދަށުން ރަޖިސްޓްރީ ކުރެވޭ ބާވަތްތަކެވެ.

އަލަށް ރަޖިސްޓްރީ ކުރެވޭ ދުންފަތުގެ ބާވަތްތައް އެ ލިސްޓުގައި ހިމަނަނީ ރަޖިސްޓްރޭޝަން ނަމްބަރާ އެކީގަ އެވެ. އެ ލިސްޓާ ގުޅޭ ގޮތުން އެޗްޕީއޭ އިން ބުނީ ދުންފަތުގެ އެއް ބްރޭންޑެއްގެ ތަފާތު ފްލޭވާސް ހިމެނޭ ބާވަތްތަކާއި އެ ބާވަތްތައް ޕެކެޓު ކުރާއިރު ތަކެތި ހުންނަ އަދަދާއި އުފެއްދި ގައުމަށް ބަލައި ތަފާތު އުފެއްދުމެއްގެ ގޮތުގައި މިހާރުގެ ލިސްޓުގައި ހިމަނާފައިވާނެ ކަމަށެވެ.

ރައީސް ޑރ. މުހައްމަދު މުއިއްޒުގެ ސަރުކާރުން ރާއްޖެ އިން ދުންފަތުގެ އިސްތިއުމާލު ކުރުން ކުޑަކުރުމަށް ގިނަ މަސައްކަތްތަކެއް ކުރަމުން އަންނަ ކަމަށް ސަރުކާރުގެ އިދާރާތަކުން ބުނާއިރު ދުންފަތުގެ ވަގު ވިޔަފާރި ރާއްޖޭގައި ދުވަހެއް ދުވަހަކަށް ފުޅާވަމުން އަންނަ ކަމަށް ފާހަގަކުރެވެ އެވެ. ރާއްޖޭގެ މައި ދޮރާށި ތަކުން ސިނގިރޭޓުގެ ބޮޑެތި ވައްކަން ކުރާ އިރު ފުލުހުންގެ ބެލުމުގެ ދަށުގައި ހުންނަ ސިގިރޭޓް ވަގަށް ނެގުމުގެ މައްސަލަތައް ވެސް ވަނީ ދާދި ފަހުން ފެންމަތިވެފަ އެވެ.