ދުންފުހުގެ އަސަރު ބޮޑުވެ ގޭގެ ދޮރުތައް ލައްޕާފައި ބެހެއްޓުމަށް އެޗްޕީއޭ އިން އިރުޝާދު ދީފި

ރާއްޖޭގެ އެކި ސަރަހައްދުތަކަށް ދުންފުހުގެ އަސަރު ވަރަށް ބޮޑަށް ކުރަމުންދާތީ ރައްޔިތުން ސަމާލުވުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އެދިއްޖެ އެވެ. ކުރިއަށް އޮތް ފަސް ދުވަހުވެސް ދުންފުހުގެ އަސަރު ރާއްޖޭގެ ސަރަހައްދުގައި ވަރަށް ބޮޑަށް ހުންނާނެ ކަމަށް ބެލެވޭކަމަށް އެޖެންސީން ބުނެ އެވެ.

މި ދުވަސްވަރު ބޭރުގައި ކުޅިވަރުގެ ހަރަކާތްތައް ބޭއްވުމާއި ކަސްރަތުކުރުމަށް ބޭރަށް ދިޔުން މަދުކުރުމަށް އެޗްޕީއޭ އިން އިލްތިމާސް ކޮށްފައިވެ އެވެ. އަދި ބޭރަށް ނިކުންނަން ޖެހިއްޖެ ހާލަތްތަކުގައި N95 މާސްކު ނުވަތަ އެފަދަ ރައްކާތެރިކަމުގެ މާސްކެއް ބޭނުންކުރުމަށް އިރުޝާދު ދީފައިވެ އެވެ.

ރާއްޖޭގެ ސަރަހައްދުގެ ވައި ވަރަށް ބޮޑަށް ނުސާފުވެ ދުރުފެންނަ މިންވަރު ވަނީ ވަރަށް ބޮޑަށް ދަށްވެފަ އެވެ. މެޓް އޮފީހުން ހާމަކޮށްފައިވާ ގޮތުން ބުދަ ދުވަހު ދުރުފެންނަ މިންވަރު ވަނީ 1.5 ކިލޯމީޓަރަށްވުރެ ދަށްވެފަ އެވެ. މިއާއެކު މެދު ރާއްޖެ އާއި އުތުރުގެ ސަރަހައްދުތަކުގެ ވައިގެ ކޮލިޓީ ދަށްވުމުގެ ސަބަބުން މިހާރު ރެޑް އެލާޓަށް ވަނީ އަރާފަ އެވެ.

މެޓް އޮފީހުން ބުނީ ކުރިއަށް އޮތް ފަސް ދުވަހު ވެސް ރާއްޖޭގެ ސަރަހައްދުގެ ވައި ނުރައްކާތެރި މިންވަރަކަށް ނުސާފުވާނެ ކަމަށް ބެލެވޭ ކަމަށެވެ. މިއީ ސިއްހަތަށް ވަރަށް ބޮޑު ނުރައްކާއެއް ކަމަށާއި، ހާއްސަކޮށް ނޭވާލާ ބަލިތަކާއި ހިތުގެ ބަލިތައް ހުންނަ މީހުންނަށް މި ހާލަތު ވަރަށް ގޯސް ކަމަށް އެޗްޕީއޭ އިން ވަނީ ފާހަގަކޮށްފަ އެވެ.

ބޭރުގެ ނުސާފު ވައި ގޭތެރެއަށް ނުވަންނާނެ ހެން ގޭގެ ދޮރުތައް ލައްޕާފައި ބެހެއްޓުމަށް އެޗްޕީއޭ އިން އިރުޝާދު ދީފައިވެ އެވެ. އަދި ގޭތެރޭގެ ވައި ސާފުކުރުމަށް އެއަރ ޕިއުރިފަޔަރ ބޭނުންކުރުމަށް ވެސް އިރުޝާދު ދީފައިވެ އެވެ. ކުޑަކުދިންނާއި މާބަނޑު މީހުން ބޭރަށް ނުކުންނަން ޖެހިއްޖެ ހާލަތްތަކުގައި އިތުރު ސަމާލުކަމެއް ދިނުމަށް އެޗްޕީއޭ އިން ވަނީ ގޮވާލާފަ އެވެ.

ރާއްޖޭގެ ސަރަހައްދުގެ ވައި ނުސާފުވެފައިވަނީ އިރުވައި މޫސުމުގައި ރާއްޖޭގެ އުތުރުން އިންޑިއާ އަދި ހިމާލިޔާ ސަރަހައްދުން އަންނަ ފުސްދުމާއެކުގަ އެވެ. ފަހަކަށް އައިސް ކޮންމެ އަހަރެއްގެ ވެސް އިރުވައި މޫސުމުގައި މި މައްސަލަ ރާއްޖެ އަށް ކުރިމަތިވެ އެވެ.