ކެލިފޯނިއާގެ ލައިބްރަރީއަކުން ނެގި ފޮތެއް، 46 އަހަރު ފަހުން އަނބުރާ ރައްދުކޮށްފި

އެމެރިކާގެ ކެލިފޯނިއާގެ ލައިބްރަރީއަކަށް ލިބުނު ޕާރުސަލެއް ކަނޑާލިއިރު، މީގެ 46 އަހަރު ކުރިން އަނބުރާ ހަވާލުކުރަންޖެހޭ ފޮތެއް އޭގެ ތެރޭގައި އޮތުމުން އެތަނުގެ މުވައްޒަފުންނަށް ބޮޑު ހައިރާންކަމެއް ލިބިއްޖެ އެވެ.

ސެން ޑިއޭގޯ ކައުންޓީ ލައިބްރަރީގެ ލާމޭސާ ގޮފީގެ ބްރާންޗް މެނޭޖަރު ކެސީ ކޮލްޑްވިން ބުނި ގޮތުގައި، މިދިޔަ ޖެނުއަރީ މަހުގެ ކުރީކޮޅު އޭނާ ހުޅުވި ޕާރުސަލަކުން ފެނުނީ ޝީލާ ބޭންފޯޑް ލިޔެފައިވާ "ދަ އިންކްރެޑިބަލް ޖާނީ" ނަމަކަށް ކިޔާ ފޮތެކެވެ. ލައިބްރަރީގެ ރެކޯޑްތައް ބުނާ ގޮތުން މި ފޮތަކީ ވަރަށް ކުރިން އަނބުރާ ހަވާލުކުރަން ޖެހިފައިވާ ފޮތެކެވެ.

"އެ ޕާރުސަލް ހުޅުވާލުމުން ވަރަށް ބޮޑަށް ބާ ފޮތުގެ ވަސް ދުވި،" ކޮލްޑްވިން ކިޔައިދިނެވެ. އޭނާ އިތުރަށް ފާހަގަކުރި ގޮތުގައި، ލައިބްރަރީގެ އެޑްރެސް ބަދަލުވެފައި ވީނަމަވެސް، އެ ފޮތް ފޮނުވި ފަރާތުން އެކަން ހޯދައި ބަލައިގެން ސީދާ ރަނގަޅު ގޮތްޕަށް ފޮތް ފޮނުވާފައިވާތީ އެއީ ވަރަށް ފާހަގަ ކުރެވޭ ކަމެއް ކަމަށެވެ.

މި ފޮތް ފޮނުވާފައި ވަނީ ކާކުކަން ހާމަނުކޮށް އާދައިގެ ޕާރުސަލެއްގަ އެވެ. އޭގެ ތެރޭގައި އޮތް ނޯޓެއްގައި "މިހާ ލަސްވީތީ މައާފަށް އެދެން" މިހެން ލިޔެފައިވާއިރު، އަތުން ކުރަހާފައިވާ ހިނިތުންވުމެއްގެ ނިޝާނެއް އިނެވެ.

ލައިބްރަރީގެ ރެކޯޑުތަކުން ދައްކާ ގޮތުގައި އެ ފޮތް އަނބުރާ ހަވާލުކުރަން ޖެހޭ ތާރީޚަކީ 20 މޭ 1980 އެވެ.

ސެން ޑިއޭގޯ ކައުންޓީން އިންސްޓަގްރާމް ގައި ކުރި ޕޯސްޓެއްގައި ބުނެފައި ވަނީ، ލައިބްރަރީން ނަގާ ތަކެތި އަނބުރާ ހަވާލުކުރުމަށް ކިތަންމެ ލަސްވި ކަމުގައި ވިޔަސް ދުވަހަކު ވެސް ވަގުތު ފާއިތެއް ނުވާނެ ކަމަށެވެ. އަދި މިހާރު އެ ލައިބްރަރީން ފޮތް ލަހުން ހަވާލުކުރުމުން ދުވަހުން ދުވަހަށް އަރާ ޖޫރިމަނާ ނުނަގާ ގޮތަށް ވަނީ ހަމަޖައްސާފަ އެވެ.

ކޮލްޑްވިން ބުނީ މި ފޮތް އަލުން ކިއުންތެރިންނަށް ދޫކުރާ ސެކްޝަނަކަށް ނުލާނެ ކަމަށެވެ. އޭގެ ބަދަލުގައި، މި މަޖާ ހާދިސާގެ ހަނދާނެއްގެ ގޮތުން އޭނާގެ އަމިއްލަ މޭޒުމަތީގައި އެ ފޮތް ބާއްވާނެ ކަމަށް އޭނާ ބުންޏެވެ.