15 މީހުންނާއި އެކު ދަތުރު ކުރި މަސްދޯންޏެއްގައި ރޯވެއްޖެ
މި ހާދިސާގައި އަނިޔާވި މީހުން މާލެ ގެނައުމުގެ މަސައްކަތް ފުލުހުން ކުރަމުންދާ އިރު، އެމްއެންޑީއެފުން ވަނީ ރޯވި އަލިފާންގަނޑު މިހާރު ކޮންޓްރޯލް ކޮށްފަ.
މަސް ދޯންޏެއްގައި އަލިފާނުގެ ހާދިސާ އެއް ހިނގުން | އެމްއެންޑީއެފް
15 މީހުންނާއި އެކު ދަތުރު ކުރި މަސްދޯންޏެއްގައި ރޯވެއްޖެ އެވެ.
ފުލުހުން މީޑިއާތަކަށް ފޮނުވި މެސެޖެއްގައި ބުނެފައި ވަނީ ކުރުނބާ މޯލްޑިވްސް ރިސޯޓް ކައިރިން މަސް ދޯންޏެއްގައި އަލިފާން ރޯވެފައި ވާ ކަމުގެ މައުލޫމާތު ހޮނިހިރު ދުވަހު އެ އިދާރާ އަށް ލިބިފައިވާ ކަމަށެވެ. އެ ހާދިސާގެ މައުލޫމާތު ލިބުނީ ހޮނިހިރު ދުވަހުގެ 14:54 ގައި ކަމަށް ވެސް އެ އިދާރާ އިން ވަނީ ބުނެފަ އެވެ.
މި ހާދިސާ އާއި ގުޅިގެން ފުލުހުން ދަނީ އެ ސަރަހައްދުގައި ހަރަކާތްތެރި ވަމުންނެވެ. އަދި އަނިޔާވި މީހުން މާލެ ގެނައުމަށްޓަކާ ކުރުނބާ މޯލްޑިވްސްގެ އުޅަނދެއްގައި ދަތުރުކުރަމުންދާ ކަމަށް އެ އިދާރާ އިން ވަނީ 03:30 ހާ އިރު މީޑިއާ އަށް މައުލޫމާތު ދީފަ އެވެ.
މި ހާދިސާ އާއި ގުޅިގެން އެމްއެންޑީއެފް އިން ބުނީ ދޫނިދޫ ކައިރިން ދަތުރުކުރަމުންދިޔަ މަސްދޯންޏެއްގައި އަލިފާން ރޯވެގެން އެމްއެއެންޑީއެފް މާލޭ އޭރިއާ ކޮމާންޑް، ހުޅުމާލެ ފަޔަރ ސްޓޭޝަނުން ހަރަކާތްތެރިވަމުންދާ ކަމަށެވެ.
އެމްއެންޑީއެފް މީޑިއާ އޮފިޝަލް ވިދާޅުވީ އަލިފާންގަނޑު އެއްކޮށް ނިއްވާ ނުލެވުނު ނަމަވެސް ރޯވެފައިވާ އަލިފާންގަނޑު މިހާރު ކޮންޓްރޯލް ކުރެވިފައިވާ ކަމަށެވެ. މިހާދިސާގައި އަނިޔާވި މީހުންގެ ތަފްސީލާއި ލިބުނު އަނިޔާ އަދި ދޯންޏާއި މުދަލަށް ލިބުނު ގެއްލުމުގެ ތަފްސީލްތައް އަދި ސާފެއް ނުވެ އެވެ.
އިތުރު ތަފްސީލް އަންނަނީ..
