އޯޑިއޯން ބިން ހުރި ސަރަހައްދުން މަޖިލީދީމަގާ ، ފަނޑިޔާރު މަގު ގުޅުވާލުމަށް އިތުރު މަގެއް ހެދުމަށް ހަމަޖެހިފައި ވަނީ އެ ސަރަހައްދުގެ ޓްރެފިކަށް ލުޔެއް ހޯދުމަށް ކަމަށް ހައުސިން މިނިސްޓަރ ޑރ މުހައްމަދު މުއިއްޒު ވިދާޅުވެއްޖެ އެވެ.
ހައުސިން މިނިސްޓަރ ޑރ މުހައްމަދު މުއިއްޒު ވިދާޅުވީ، މި މަގަކީ 30 ފޫޓްގެ ފުޅާ މަގަކަށް ވުމުން ދެ ފަރާތުގައި ޕޭވްމެންޓް ވެސް ހިމެނޭނެ ކަމަށެވެ. މިފަދަ މަގެއް ހެދުމަށް ހަމެޖެހިފައި ވަނީ އެ ސަރަހައްދުގެ ޓްރެފިކް ފްލޯ ހަމަޖެއްސުމަށް ކަމަށް އެމަަނިކުފާނު ވިދާޅުވި އެވެ.
މަޖީދީމަގު އޯޑިއޯން ބިމުގެ ބަޔަކުން މަގެއް ސަރުކާރުން ހަދަމުންދާ އިރު މީގެ ކުރިން އެ ބިމަކީ ލަގްޒަރީ ފްލެޓް އެޅުމަށް ސަރުކާރުންދީފައިވާ ބިމެކެވެ. އެހެންނަމަވެސް އެގްރީމެންޓާއި ހިލާފަށް މަސައްކަތް ކުރަމުންދާ ކަމަށް ބުނެ ސަރުކާރުން ވަނީ ނާދީ ބިމާއި އޯޑިއޯން ބިމުގައި އެޅުމަށް ހަވާލުކުރި ލަގްޒަރީ ފްލެޓްތަކުގެ މަސައްކަތް ނުކުރެވޭގޮތަށް އެގްރީމެންޓް ބާތިލް ކުރުމަށް ނިންމާފަ އެވެ. އެ މަސައްކަތް ހުއްޓުވާފައިވަނީ މިދިޔަ ފެބްރުއަރީ މަހުގައި އޯޑިއޯން ބިމުގައި ފްލެޓް އެޅުމަށް ބިންގާވެސް އެޅިފަހުންނެވެ.
އެގޮތުން އެ ސަރަހައްދުގައި 12 ބުރީގެ ލަގްޒަރީ ފްލެޓް އެޅުމަށް ހަމަޖެހިފައިވާ އިރު 54 އެޕާޓްމެންޓް އެޅުމަށް އޭރު ވަނީ ނިންމާފަ އެވެ.