ލީބިޔާގެ އައްސޭރިފަށުގައި ބޯޓެއް ބަންޑުން ޖެހުމުގެ ސަބަބުން 53 ހިޖުރަވެރިން މަރުވެއްޖެ

ލީބިޔާގެ އައްސޭރިފަށަށް 55 މީހުންނާއެކު ދަތުރުކުރި ރަބަރު ބޯޓެއް ބަންޑުން ޖަހާލުމުގެ ހާދިސާގައި، ދެ ތުއްތު ކުދިން ހިމެނޭހެން 53 ހިޖުރަވެރިން މަރުވެ ނުވަތަ ގެއްލިފައިވާ ކަމަށް އިންޓަނޭޝަނަލް އޯގަނައިޒޭޝަން ފޯ މައިގްރޭޝަން (އައި.އޯ.އެމް) އިން ހޯމަ ދުވަހު ބުނެފި އެވެ.

އެ ހާދިސާއިން ސަލާމަތްވި މީހުންނާ ހަވާލާދީ އައި.އޯ.އެމް އިން ނެރުނު ބަޔާނެއްގައި ބުނެފައިވަނީ، އެ ބޯޓު ފުރާފައިވަނީ މިދިޔަ ބުރާސްފަތި ދުވަހު ޒާވިޔާއިން ކަމަށާއި، ބޯޓު ބަންޑުން ޖަހާލާފައިވަނީ ހުކުރު ދުވަހު ޒުވާރާގެ އައްސޭރިފަށަށް ކަމަށެވެ. ޒާވިޔާ އާއި ޒުވާރާއަކީ ލީބިޔާގެ ވެރިރަށް ޓްރިޕޮލީގެ ހުޅަނގުން އޮންނަ އައްސޭރިފަށުގެ ދެ ރަށެވެ.

އައި.އޯ.އެމް އިން ބުނި ގޮތުގައި، ލީބިޔާގެ ކަމާބެހޭ ފަރާތްތަކުން ހިންގި ސަލާމަތްކުރުމުގެ އޮޕަރޭޝަނުގައި ސަލާމަތް ކުރެވިފައިވަނީ ނައިޖީރިއާ އަށް ނިސްބަތްވާ ދެ އަންހެނުންނެވެ. އޭގެ ތެރެއިން އެކަކު އޭނާގެ ފިރިމީހާ ގެއްލިފައިވާ ކަމަށް ބުނެފައިވާއިރު، އަނެއް އަންހެން މީހާ ބުނެފައިވަނީ މި ހިތާމަވެރި ހާދިސާގައި އޭނާގެ ދެ ތުއްތު ކުދިން ގެއްލިފައިވާ ކަމަށެވެ.

އދ. ގެ އެޖެންސީއެއް ކަމަށްވާ އައި.އޯ.އެމްގެ ތަފާސްހިސާބުތަކުން ދައްކާގޮތުގައި، 2025 ވަނަ އަހަރުގެ މިހާތަނަށް މެދުތެރޭ މެޑިޓަރޭނިއަން ކަނޑުގެ ސަރަހައްދުން 1،300 އަށްވުރެ ގިނަ ހިޖުރަވެރިން ވަނީ ގެއްލިފަ އެވެ.

މޫސުން ގޯސްވުމުގެ ސަބަބުން ކަނޑުމަތީގައި ހިނގި އެކި ހާދިސާތަކުގައި، މިއަހަރުގެ ޖެނުއަރީ މަހު އެކަނިވެސް މަދުވެގެން 375 ހިޖުރަވެރިން މަރުވެ ނުވަތަ ގެއްލިފައިވާ ކަމަށް ރިޕޯޓުކޮށްފައިވެއެވެ. މީގެ އިތުރުން، ރެކޯޑު ކުރެވިފައިނުވާ އެތައް ސަތޭކަ މީހުންނެއް މިފަދަ ހާދިސާތަކުގައި މަރުވެފައިވާނެ ކަމަށް ބެލެވެ އެވެ.

އެ އެޖެންސީން ހާމަކުރި ގޮތުގައި، އެންމެ ފަހުން ހިނގި މި ހާދިސާއާއެކު، 2026 ވަނަ އަހަރުގެ މިހާތަނަށް މި މަގުން ދަތުރުކުރަނިކޮށް މަރުވި ނުވަތަ ގެއްލުނު ހިޖުރަވެރިންގެ އަދަދު ވަނީ މަދުވެގެން 484 އަށް އަރާފަ އެވެ.

ސަލާމަތީ ދާއިރާގެ ދެ މަސްދަރަކުން މައުލޫމާތު ދީފައިވާ ގޮތުގައި، ޖެނުއަރީ މަހުގެ މެދުތެރޭގައި ލީބިޔާގެ އިރުމަތީ ސަރަހައްދަކުން ހިޖުރަވެރިންގެ 21 ހަށިގަނޑު ވަޅުލާފައިވާ ސަރަހައްދެއް ވަނީ ފެނިފައެވެ. އަދި އެ ސަރަހައްދުން ސަލާމަތްވި 10 މީހެއްގެ ހަށިގަނޑުން، އެމީހުން ބަންދުގައި ތިބި ދުވަސްވަރު އަނިޔާކޮށްފައިވާ ކަމުގެ ނިޝާންތައް ފެންނަން ހުރި ކަމަށްވެސް ބުނެފައިވެ އެވެ.

އަދި އޭގެ ދެ ދުވަސް ފަހުން، ލީބިޔާގެ ސަލާމަތީ ބާރުތަކުން އެ ގައުމުގެ އިރުދެކުނުގައި އޮންނަ ކުފްރާ ނަމަކަށް ކިޔާ ރަށެއްގައި ހުރި ސިއްރު ޖަލަކުން 200 އަށްވުރެ ގިނަ ހިޖުރަވެރިން ސަލާމަތްކޮށްފައިވާ ކަމަށް އެހެން ދެ މަސްދަރަކުން މައުލޫމާތު ދީފައިވެއެވެ. އެ މީހުން ބަންދުކޮށްފައި ތިބީ އިންސާނިއްޔަތާ ޚިލާފު ދަށު ދަރަޖައިގެ ހާލަތެއްގައި ކަމަށް ރިޕޯޓުތައް ބުނެ އެވެ.

2011 ވަނަ އަހަރު ނޭޓޯގެ އެހީތެރިކަމާއެކު ކުރި އިހުތިޖާޖުތަކުގައި މުއައްމަރުލް ގައްޒާފީގެ ވެރިކަން ވައްޓާލި ފަހުން، ހަނގުރާމަ އާއި ފަގީރުކަމުން ސަލާމަތްވުމަށް ޔޫރަޕަށް ދާން ބޭނުންވާ ހިޖުރަވެރިން ބޭނުންކުރާ މައިގަނޑު މަގަކަށް ލީބިޔާ ވަނީ ވެފައެވެ. މިގޮތުން ސަހަރާ ސަރަހައްދާއި މެޑިޓަރޭނިއަން ކަނޑު ހުރަސްކޮށް ކުރާ މި ދަތުރުތަކަކީ ނުރައްކާތެރި ދަތުރުތަކެކެވެ.

ނޮވެމްބަރު މަހު ޖެނީވާގައި ބޭއްވި އދ. ގެ ބައްދަލުވުމެއްގައި، އިނގިރޭސިވިލާތް، ސްޕެއިން، ނޯވޭ އަދި ސިއެރާ ލިއޯން ހިމެނޭހެން ބައެއް ގައުމުތަކުން ވަނީ ލީބިޔާގައި ހުރި ހިޖުރަވެރިން ބަންދުކުރާ މަރުކަޒުތައް ބަންދުކުރުމަށް ގޮވާލާފައެވެ. އިންސާނީ ހައްގުތަކަށް މަސައްކަތްކުރާ ޖަމާއަތްތަކުން ބުނާ ގޮތުގައި އެ މަރުކަޒުތަކުގައި ހިޖުރަވެރިންނަށް އަނިޔާކޮށް، ގޯނާކޮށް، އަދި ބައެއް ފަހަރު މަރާލުން ފަދަ އަމަލުތައް ހިންގަމުންދެ އެވެ.