މިއަދުގެ ރިޔާސީ ބަޔާން ބޮޑަށް ވައްތަރީ ރައީސަކު އިއްވި ބާޔާނަކަށްވުރެ ދިމްޔާތު ކުންފުނީގެ ވެރިޔަކު ބޯޑު މެމްބަރުންނަށް އިއްވި އަހަރީ ރިޕޯޓަކާ: ކުރީގެ މިނިސްޓަރ އަމީރު

މިއަދުގެ ރިޔާސީ ބަޔާން ބޮޑަށް ވައްތަރީ ރައީސަކު އިއްވި ބާޔާނަކަށްވުރެ ދިމްޔާތު ކުންފުނީގެ ވެރިޔަކު ބޯޑު މެމްބަރުންނަށް އިއްވި އަހަރީ ރިޕޯޓަކަަށް ކަމަށް ކުރީގެ މިނިސްޓަރ އިބްރާހީމް އަމީރު ވިދާޅުވެ، ރައީސް މުއިއްޒު ގެ ރިޔާސީ ބަޔާނަށް ވަރަށް ބޮޑަށް ފާޑު ވިދާޅުވެއްޖެ އެވެ.

އަމީރު އެކްސް ގައި ކުރެއްވި ޕޯސްޓެއް ގައި ބުރާސްފަތި ދުވަހު ވިދާޅުވީ "ގޮނޑިކޮއްކޮ މަޖްލިހަކަށް އިއްވި ރިޔާސީ ބަޔާނުން އެނގިގެން ދިޔައީ، ކުރިޔަށް ހުރި އަހަރުތަކުގައި ރާއްޖޭގެ އަމިއްލަ ވިޔަފާރިވެެރިންނަށް އިތުރު ގޮންޖެހުންތަކާއި ކުރިމަތިވާނެ ކަން،" ކަމަށެވެ.

އަމީރު ފާހަގަ ކުރެއްވި ރިޔާސީ ބަޔާނުން އެނގެނީ "ސަރުކާރުން މިހާރަށް ވުރެ ފުޅާކޮށް ވިޔަފާރިތަކަށް ވަންނާނެކަން،" ކަމުގަ އެވެ.

"މިހާތަނަށް އަައި އިރު ރާއްޖޭގެ ފަތުރުވެރިކަން ދުނިޔޭގެ އެންމެ މަޤުބޫލު މަންޒިލަކަށް ވެގެން ދިޔައީ، މި ސިނާއަތުގައި ސަރުކާރުގެ ސީދާ ބައިވެރިވުން ނެތުމުން. ސަރުކާރުގެ މުޅި ފޯކަސް ހުރީ ހުރިހާ ވިޔަފާރިތަކަަށް ސީދާ ވަންނަން. މިއީ ގެއްލުން ބޮޑުވާނެ ބިރުވެރި ސިޔާސަތެއް." އަމީރު ވިދާޅުވި އެވެ.

އަމީރު ފާހަގަ ކުރެއްވި ގޮތުގައި، ސަރުކާރެއްގެ މަސްއޫލިއްޔަތަކީ ރެގިއުލޭޓްކުރުން ކަމަށާއި، ވިޔަފާރިއަށް ފަހި މާހައުލެއް ގާއިމްކުރުން ކަމަށެވެ. އަދި ވިޔަފާރިތައް ކުރިއެރުވުމަށް ކެޕިޓަލް ރެއިޒްކުރެވޭނެ ނިޒާމެއް ގާއިމްކުރުމުގެ އިތުރުން ސަރުކާރަކުން ކުރަން ޖެހޭ ކަމަކީ އަމިއްލަ ވިޔަފާރިތައް އިނދަޖައްސާލާ، ހުރިހާ ވިޔަފާރިއެއް ސަރުކާރުން ކުރުން ނޫން ކަމަށް އަމީރު ވިދާޅުވި އެވެ.

ބުރާސްފަތި ދުވަހު ރައީސް މުހައްމަދު މުއިއްޒު ރައްޔިތުންގެ މަޖިލީހުގައި ދެއްވި ތިން ގަޑީއިރުގެ ދިގު، ތިން ވަނަ ރިޔާސީ ބަޔާނުގައި ވަނީ ސަރުކާރުގެ ކުންފުންޏަކުން ކުރިއަށް އޮތް ތިން އަހަރުގެ ތެރޭގައި 10 ރަށެއް ރިސޯޓެއްގެ ގޮތުގައި ތަރައްގީ ކުރަން ނިންމާފައިވާ ކަމަށް ވިދާޅުވެ، މިހާތަނަށް ޕްރައިވެޓް ސެކްޓަރ އިން ތަރައްގީ ކޮށް ކުރިއަރުވާފައިވާ ރާއްޖޭގެ އެންމެ މުހިންމު ސިނާއަތުގެ ތެރެއަށް ސަރުކާރުން ބޮޑުކޮށް ވަންނާނެ ކަމުގެ އިޝާރާތް ކުރައްވާފަ އެވެ.