99 އިންސައްތަ ވޯޓާއެކު ޝެއިޚް މުހައްމަދު ޝިފާން އަދާލަތު ޕާޓީގެ ރައީސް ކަމަށް
އޮންލައިން ޕޯޓަލް މެދުވެރިކޮށް ހޮނިހިރު ދުވަހު ބޭއްވި އަދާލަތު ޕާޓީގެ އިންތިޚާބުގައި ނައިބު ރައީސް ކަމަށް އިންތިޚާބު ވެވަޑައިގަތީ ޝިފާންގެ ރަނިންމޭޓެއްގެ ގޮތުގައި ވާދަކުރެއްވި ޝެއިޚް އަބްދުﷲ ރަޝީދު.
އަދާލަތު ޕާޓީގެ ރައީސް ކަމަށް އިންތިހާބުވި ޝެއިޚު މުހައްމަދު ޝިފާން (ވ) އަދި ނައިބް ރައީސް ކަމަށް އިންތިހާބުވި ޝެއިޚް އަބްދުﷲ ރަޝީދު. | ރާއްޖެ އެމްވީ
އަދާލަތު ޕާޓީގެ ރައީސް ކަމަށް އެ ޕާޓީގެ މިހާރުގެ ނައިބު ރައީސް ޝެއިޚް މުހައްމަދު ޝިފާން 99 އިންސައްތަ ވޯޓާއެކު ކާމިޔާބު ކުރައްވައިފި އެވެ.
އޮންލައިން ޕޯޓަލް އެއް މެދުވެރިކޮށް ހޮނިހިރު ދުވަހު ބޭއްވި މި އިންތިޚާބުގައި ނައިބު ރައީސް ކަމަށް އިންތިޚާބު ވެވަޑައިގަތީ ޝިފާންގެ ރަނިންމޭޓެއްގެ ގޮތުގައި ވާދަކުރެއްވި ޝެއިޚް އަބްދުﷲ ރަޝީދު އެވެ.
އަދާލަތު ޕާޓީގެ 4 ވަނަ ދައުރުގެ ރައީސް ހޮވުމަށް ބޭއްވި އިންތިޚާބުގެ ވަގުތީ ނަތީޖާ ދައްކާ ގޮތުން، މި އިންތިޚާބުގައި ވޯޓު ލާފައިވަނީ ވޯޓުލުމުގެ ހައްގު ލިބިގެންވާ ފަރާތްތަކުގެ ތެރެއިން 22 އިންސައްތަ މީހުންނެވެ. އިންތިޚާބުގައި ވޯޓު ދިން މީހުންގެ އަދަދެއް އަދާލަތު ޕާޓީގެ އިލެކްޝަންސް ކޮމިޓީން ހާމަކޮށްފައެއް ނުވެ އެވެ.
ހޮނިހިރު ދުވަހުގެ ހެނދުނު 09:00 އިން ރޭގަނޑު 20:00 ގެ ނިޔަލަށް ކުރިއަށް ގެންދިޔަ މި އިންތިޚާބުގެ ވޯޓުލުން ކުރިއަށް ގެންގޮސްފައިވަނީ "ފަހި ވޯޓް" ނަމަކަށް ކިޔާ އޮންލައިން ޕޯޓަލް އެއް މެދުވެރިކޮށެވެ. މީގެ އިތުރުން މި އިންތިޚާބުގައި ވޯޓުލެވޭނެ ފަރާތްތަކުގެ ލިސްޓު ޝާއިޢު ކުރުމަށާއި، މޯބައިލް ނަންބަރު ރަޖިސްޓްރީ ކުރުމަށާއި، މޯބައިލް ނަންބަރު ބަދަލު ކުރުމަށާއި އަދި ޝަކުވާ ހުށަހެޅުމަށް ވެސް ބޭނުން ކޮށްފައިވަނީ "ފަހިވިހި" ނަމަކަށް ކިޔާ އޮންލައިން ޕޯޓަލް އެކެވެ.
މި އިންތިޚާބުގައި ވޯޓުލުމުގެ ވަގުތެއްގެ ގޮތުގައި އެންމެ ފުރަތަމަ ކަނޑައަޅާފައިވަނީ ހޮނިހިރު ދުވަހުގެ ހެނދުނު 09:00 ން މެންދުރުފަހު 15:00 ގެ ނިޔަލަށެވެ. ނަމަވެސް ބައެއް ފަރާތްތަކުގެ ޝަކުވާއާ އެކު ވޯޓުލުމުގެ ވަގުތު 2 ފަހަރެއްގެ މަތިން އިތުރުކޮށްފައިވެ އެވެ. އެގޮތުން ފުރަތަމަ އިތުރު ކުރީ އިރުއޮއްސި 18:00 ގެ ނިޔަލަށެވެ. އޭގެ ފަހުން ވަނީ ރޭގަނޑު 20:00 ހަމައަށް ވޯޓުލުމުގެ ވަގުތު އިތުރު ކޮށްފަ އެވެ.
އަދާލަތު ޕާޓީގެ ރައީސަކު ހޮވުމުގެ ވޯޓުލުން އޮންލައިން ޕޯޓަލް އެއް މެދުވެރިކޮށް ނިންމާލި އިރު، އިންތިޚާބުގައި ވޯޓު ލާނެ ގޮތަކާ މެދު އެ ޕާޓީގެ ތެރޭގައި އޮތީ ޚިޔާލު ތަފާތުވުން އުފެދިފަ އެވެ. މި އިންތިޚާބުގައި ވޯޓު ފޮށި ބެހެއްޓުމަށް އެދިވަޑައިގެން މި މަހުގެ 11 ވަނަ ދުވަހު، އެ ޕާޓީގެ ރައީސް ކަމަށް ވާދަކުރެއްވި ޑރ. އިކްރާމް އަބްދުއްސައްތާރު ވަނީ ސިޓީ އެއް ހުށަހަޅުއްވާފަ އެވެ. ނަމަވެސް އިންތިޚާބުގައި ވޯޓު ފޮށި ބަހައްޓަން ޕާޓީގެ އެތެރޭގެ އިންތިޚާބުތަކަށް ހަދާފައިވާ ގަވާއިދުން ޖާގަ ނުދޭ ކަމަށް އަދާލަތު ޕާޓީން ބުނެފައިވެ އެވެ.
އޭގެ ފަހުން ޑރ. އިކްރާމް ވަނީ އިންތިޚާބާ ގުޅިގެން ހުރިހާ ކަމެއް ކުރަމުން ދިޔައީ ދެފުށްފެންނަ ޢަދުލު އިންސާފުގެ އުސޫލުތަކާ ޚިލާފަށް ކަމަށް ތުހުމަތުކުރައްވާ އަދާލަތު ޕާޓީގެ ރައީސަކު ހޮވާ އިންތިޚާބު ބޮއިކޮޓު ކޮށް ކެންޑިޑޭޓުންގެ ލިސްޓުން ނަން ނަގާފަ އެވެ.
އަދާލަތު ޕާޓީގެ ރައީސަކަށް އިންތިޚާބުވި އެ ޕާޓީގެ ނައިބު ރައީސް ޝެއިޚް މުހައްމަދު ޝިފާން ވާދަކުރެއްވީ މިހާރު އެ ޕާޓީގެ ރައީސް އިމްރާން އަބްދުﷲ އާއި، ޝެއިޚް އިޔާޒް އަބްދުއްލަތީފް އަދި ޝެއިޚް އިލްޔާސް ހުސައިންގެ ތާއީދާ އެކުގަ އެވެ. އަދާލަތު ޕާޓީގެ ރައީސް ކަމަށް އިންތިޚާބުވި ޝެއިޚް ޝިފާން އަދި ނައިބު ރައީސް ކަމަށް އިންތިޚާބުވި ޝެއިޚް އަބްދުﷲ އަކީ ވެސް މަދީނާ އިސްލާމިކް އުނިވަރސިޓީ އިން ގްރެޖުއޭޓްވި ދެ ބޭފުޅުންނެވެ.
