އަދާލަތު ޕާޓީގެ ރައީސް ހޮވާ އިންތިހާބު ޖަނަވަރީ ފަހުކޮޅު ބާއްވަނީ
އަދާލަތު ޕާޓީގެ ރައީސްގެ މަގާމަށް ކުރިމަތިލުމުގެ ފުރުސަތު ހޯމަ ދުވަހު ހުޅުވާލައިފި. މި މަގާމަށް އެންމެ މީހަކު ކުރިމަތިލިޔަސް ފެންނަ ނުފެންނަ ވޯޓެއް ނަގާނެ. އެކަކަށް ވުރެ ގިނަ މީހުން ވާދަކުރާނަމަ 31 ޖަނަވަރީ 2026 ގައި ރައީސަަކު އިންތިހާބުކުރަން ވޯޓު ނަގާނެ.
ޢަދާލަތު ޕާޓީގެ މަޝްވަރާ މަޖިލީހުގެ ތެރެއިން
އަދާލަތު ޕާޓީގެ ރައީސް ކަމުގެ މަގާމަށް އެކަކަށް ވުރެ ގިނަ މީހުން ވާދަ ކުރާނަމަ 31 ޖަނަވަރީ 2026 ގައި ރައީސަަކު އިންތިހާބުކުރަން ވޯޓު ނަގާނެ ކަމަށް އެ ޕާޓީ އިން ބުނެފި އެވެ.
އަދާލަތު ޕާޓީ ގެ ރައީސްގެ މަޤާމަށް ކުރިމަތިލުމަށް ހުޅުވާލުމާ ގުޅޭ ގޮތުން އެޕާޓީ އިން ކުރި އިއުލާނެއްގައި ބުނީ، ޕާޓީ ގެ ރައީސް ކަމުގެ މަގާމަށް ކުރިމަތިލެވޭނީ ޢަދާލަތު ޕާޓީގެ ދަފްތަރުގައި 28 ޑިސެންބަރު 2025 އާ ހަމައަށް ރަޖިސްޓްރީ ވެފައިވާ ފަރާތްތަކަށެވެ.
އަދާލަތު ޕާޓީ ގެ ރައީސްކަމަށް ކުރިމަތިލާ ފަރާތްތަކުގެ ކިބައިގައި ފުރިހަމަވާންވާން ޖެހޭ ޝަރުތު ތަކުގެ ތެރޭގައި ދީނުގައި ޙައްދެއް ކަނޑައެޅިފައިވާ ކުށެއް ކޮށްފައިވާކަން ޝަރީޢަތަށް ސާބިތުވެފައިވާ މީހަކު ކަމުގައި ނުވުން، ޚިޔާނަތުގެ މައްސަލައެއް، ނުވަތަ ބަދުއަޚްލާޤީ މައްސަލައެއް، އެ މީހެއްގެ މައްޗަށް ޝަރީޢަތުން ސާބިތުވެފައިވާ މީހަކު ކަމުގައި ނުވުން، އެ ޕާޓީގެ މަޖިލިސްތަކުގެ ތެރެއިން މަޖިލީހެއްގައި މަދުވެގެން 2 އަހަރު އުޅެ، ޕާޓީގެ އުޞޫލުތަކާއި ހަމަތަކަށް ހޭނިފައިވާ މީހަކު ކަމުގައި ވުން އަދި ދައުލަތުގެ ކަމާއި ބެހޭ އިދާރާއިން ޤަބޫލު ކުރާ ޔުނިވަރސިޓީ އަކުން، ނުވަތަ މުއައްސަސާއަކުން ދަށްވެގެން ޑިޕްލޮމާ ހާސިލު ކޮށްފައިވުން، އަދި މަދުވެގެން 3 (ތިނެއް) އަހަރު ދުވަހުގެ ޢަމަލީ ތަޖުރިބާ ލިބިފައިވުން ހިމެނެ އެވެ.
އަދާލަތު ޕާޓީ ގެ ރައީސް ކަމުގެ މަގާމަށް އެންމެ މީހަކު ކުރިމަތިލައިފި ނަމަ ނަގާނީ ފެންނަ ނުފެންނަ ވޯޓެކެވެ.
އަދާލަތު ޕާޓީ ގެ ރައީސް ކަމުގެ މަގާމަށް ކުރިމަތިލުމުގެ ސުންގަޑިއަކީ 8 ޖަނަވަރީ 2026 ގެ 16:00 އެވެ.
އަދާލަތު ޕާޓީގެ ރައީސް ގެ މަގާމުގައި މިހާރު ހުންނެވީ ޝެއިޚް އިމްރާން އަބްދުﷲ އެވެ. އޭނާ ވަނީ އެ ޕާޓީގެ ރައީސްކަން ދެ ދައުރު ފުރިހަމަ ކުރައްވާފަ އެވެ.
