އަދާލަތު ޕާޓީގެ ރައީސް ކަމަށް ޝިފާން އާއި އިކްރާމް ކުރިމަތިލައްވައިފި

އަދާލަތު ޕާޓީގެ ރައީސްގެ މަގާމަށް ކުރިމަތިލުމަށް ހުޅުވާލި ފުރުސަތު ބުރާސްފަތި ދުވަހު ހަމަވި އިރު، އެ މަގާމަށް ކުރިމަތިލެއްވީ އެ ޕާޓީގެ މިހާރުގެ ނައިބު ރައީސް ޝައިހް މުހައްމަދު ޝިފާން އާއި އިކްރާމް އަބްދުއްސައްތާރު ކަމަށް މައުލޫމާތު ލިބިއްޖެ އެވެ.

އަދާލަތު ޕާޓީގެ ރައީސްގެ މަގާމަށް ކުރިމަތިލުމަށް ފުރުސަތު ހުޅުވާލީ މިދިޔަ ޑިސެމްބަރު 29 ވަނަ ދުވަހު އެވެ.

ރާއްޖެ އެމްވީ އަށް މައުލޫމާތު ލިބިފައިވާ ގޮތުގައި ޝިފާން އާއި އިކްރާމް ވަނީ ކެންޑިޑެންސީ ފޯމް އަދާލަތު ޕާޓީއަށް ހުށަހަޅުއްވާފަ އެވެ. އެ ދެ ކެނޑިޑޭޓުންގެ އިތުރުން އެހެން އެއްވެސް ކެނޑިޑޭޓެއް ޕާޓީގެ ރައީސްގެ މަގާމަށް ކުރިމަތިލެއްވުމަށް އެދި ފޯމެއް ހުޅިކަން އެނގިފައެއް ނުވެ އެވެ.

ޝިފާންގެ ނައިބު ރައީސެއްގެ ގޮތުގައި ހުށަހަޅާފައިވަނީ އަބްދުﷲ އެވެ. އިކްރާމްގެ ނައިބު ރައީސެއްގެ ގޮތުގައި ހުށަހަޅާފައި ވަނީ މުހައްމަދު މުއްތަލިބު އެވެ.

އަދާލަތު ޕާޓީ އަށް ރައީސަކު ހޮވުމަށް ބާއްވާ އިންތިހާބު ބޭއްވުމަށް ހަމަޖެހިފައިވަނީ ޖެނުއަރީ 31 ވަނަ ދުވަހު އެވެ. 

އަދާލަތު ޕާޓީގެ ރައީސްގެ މަގާމުގައި މިވަގުތު ހުންނެވީ މިދިޔަ އެމްޑީޕީ ވެރިކަމުގައި ހޯމް މިނިސްޓަރަކަށް ހުންނެވި އިމްރާން އަބްދުﷲ އެވެ. ނަމަވެސް ޕާޓީގެ ރައީސް ކަމުގެ މަގާމުގައި ދެ ދައުރު ފުރުއްވާފައި ވުމުގެ ސަބަބުން އިމްރާން އަށް މިފަހަރުގެ އިންތިޚާބު ގައި ވާދަ ނުކުރެވޭނެ އެވެ. 

މި އިންތިހާބުގެ ނަތީޖާ އިން އަދާލަތު ޕާޓީ އަށް އައު ލީޑަރޝިޕެއް ލިބިގެންދާނެ އެވެ. މި އިންތިހާބު ގައި ޕާޓީ ގެ އެންމެހާ އާއްމު މެމްބަރުންނަށް ވޯޓުލުމުގެ ފުރުސަތު ލިބިގެންދާނެ ކަމަށް އެ ޕާޓީ އިން ބުނެ އެވެ.