މިއަދު މި ގައުމު ދަތުރުކުރަމުން މިދާ މިސްރާބުން ރައްޔިތުންގެ ފަރުދީ ހައްގުތައް ގެއްލިގެން ހިނގައިދާނޭ ކަމުގެ ބިރު އެބައޮތް: އިމްރާން
މިއަދު ރާއްޖެ މި ދަތުރުކުރަމުންދާ މިސްރާބުން ރައްޔިތުންގެ ފަރުދީ ހައްގުތައް ގެއްލިގެން ހިނގައިދާނޭ ކަމުގެ ބިރު އެބައޮތް
އަދާލަތު ޕާޓީއަށް 20 އަހަރު ފުރުން ފާހަގަކުރުމަށް ކުރިއަށް ގެންދިއަ ރަސްމިއްޔާތުގައި ޝައިޚް އިމްރާން ވާހަކަ ދައްކަވަނީ: ވިދާޅުވީ މި އަދު މި ގައުމު މިދާ މިސްރާބުން ސަލާމަތް ކުރުމަށް މަސައްކަތް ކުރަން ޖެހޭ ކަމަށް
މިއަދު ރާއްޖެ މި ދަތުރުކުރަމުންދާ މިސްރާބުން ރައްޔިތުންގެ ފަރުދީ ހައްގުތައް ގެއްލިގެން ހިނގައިދާނޭ ކަމުގެ ބިރު އެބައޮތް ކަމަށް އަދާލަތު ޕާޓީގެ ރައީސް އަދި ކުރީގެ ހޯމް މިނިސްޓަރު ޝައިޚް އިމްރާން އަބްދުﷲ ވިދާޅުވެއްޖެ އެވެ.
ޝައިޚް އިމްރާން މިފަދައިން ވިދާޅުވީ އަދާލަތު ޕާޓީއަށް 20 އަހަރު ފުރުމުގެ މުނާސަބަތު ފާހަކުރުމަށް ބުރާސްފަތި ދުވަހުގެ ރޭ ގަލޮޅު މަދަރުސާގައި ބޭއްވި ރަސްމިއްޔާތުގައި ވާހަކަދައްކަވަމުންނެވެ.
ޝައިޚް އިމްރާން ވިދާޅުވީ އަދާލަތު ޕާޓީ އަކީ ވަރަށް މާތް މަގުސަދެއްގައި އުފެއްދި ޕާޓީއެއް ކަމަށާއި އެގޮތުން ޕާޓީގެ ދުވެލީގެ މިސްރާބު ހުންނަން ޖެހޭނީ ޕާޓީގެ ބިންގާ އެޅި އުސޫލުތަކުގެ މައްޗަށް ކަމަށެވެ. އެގޮތުން އެންމެ އިސްކަމެއް ދޭކަމެއް ކަމުގައި ވަނީ އަދުލު އިންސާފުގެ މަތީގައި ސާބިތުވެތިބުން ކަމަށް އޭނާ ވިދާޅުވި އެވެ.
އަދާލަތު ޕާޓީގެ މޮޓޯގައި ވެސް އެ ޕާޓީ އަކީ ދީނީ، ސިޔާސީ، އިޖުތިމާއި އަދި އިގުތިސާދީ ފުރިހަމަ ނިޒާމެއް ރާއްޖޭގައި ގާއިމް ކޮށް ދެމެހެއްޓުމަށް މަސައްކަތް ކުރާ ބައެއް ކަމަށް ބުނެފައިވާ ކަމަށް ޝައިޚް އިމްރާން ވިދާޅުވި އެވެ. އަދި އެގޮތުގައި ހިތްވަރާއި އެކު ދެމިތިބެން ޖެހޭނޭ ކަމަށް ވެސް ވިދާޅުވި އެވެ.
ޝައިޚް އިމްރާން ވިދާޅުވީ ޕާޓީން ވޭތުވެ ދިޔަ 20 އަހަރުގެ ތެރޭގައި ރާއްޖޭގެ ތިން ސަރުކާރެއްގައި ބައިވެރިވެފައިވާ ކަމަށާއި އެ ހުރިހާ ސަރުކާރެއްގައި ވެސް އަދާލަތު ޕާޓީން މުހިންމު ޒިންމާތަކެއް އަދާކޮށްފައިވާ ކަމަށެވެ. އަދި އެގޮތުން ރައްޔިތުންނަށް ހުރިހާ ގޮތަކުން ވެސް ގިނަ ޚިދުމަތް ތަކެއް ކޮށްދީފައިވާ ކަމަށް އޭނާ ވިދާޅުވި އެވެ.
ޝައިޚް އިމްރާން ވިދާޅުވީ މިއަދު ރާއްޖެ ދަތުރުކުރަމުން މިދާ ހާލަތުގައި ރާއްޖޭގެ ސިޔާސީ މަސްރަހާއި ހާލަތާއި ދޭތެރޭ ރާއްޖޭގެ ގިނަ ރައްޔިތުންގެ ކަންބޮޑުވުން އިންތިހާއަށް ބޮޑުކަމަށެވެ.
ޕާޓީތައް އުފެދުމުގެ 10 ނުވަތަ 15 އަހަރުގެ ކުރިއާއި ހަމައަށް ރާއްޖޭގެ ރައްޔިތުންގެ ފަރުދީ ހައްގުތައް ގެއްލިގެން ހިންގައިދާކަމުގެ ބިރު ރައްޔިތުންގެ ތެރޭގައި މިއަދު އެބައޮތް ކަމަށް އިމްރާން ވިދާޅުވިއެވެ.
އިމްރާން ވިދާޅުވީ މިހާރު ގައުމު މިއޮތް ހާލަތުން ނުވަތަ ގައުމު މިދާ މިސްރާބުން އަރައިގަތުމަށް އަދާލަތު ޕާޓީން ކުރިން އަދާކުރި ދައުރު ރާއްޖޭގައި އަދާކުރުން މިހިންމު ކަމަށެވެ.
މި ބޮޑު ބުރަ މަސައްކަތް ކުރެވޭނީ އަޅުގަނޑުމެންގެ އެންމެންގެ ވިސްނުން ފުޅާވެގެން. އަޅުގަނޑުމެންގެ ހިތްތަކަކީ ވަރަށް ފުޅާއެއްޗަކަށް ވެގެން. ރައްޔިތުންނާއި އެކު މަސައްކަތް ކުރުމުގެ އިހުސާސް އާއި ފިކުރާއި ބުއްދި އުފައްދައިގެން. އަޅުގަނޑުމެންގެ އިސްލާމީ ތާރީޚުން އިބުރަތާއި ދަރުސް ލިބިގެން.އަދާލަތު ޕާތީގެ ރައީސް އިމްރާން އަބްދުﷲ
ޝައިޚް އިމްރާން އިތުރަށް ވިދާޅުވީ ގައުމުގެ ރައްޔިތުން އެކަތިގަނޑަކަށް ވެގެން ކުރާ މަސައްކަތަކުން މެނުވީ މިއަދު ގައުމަށް ދިމާވެފައި މިވާ ހާލު ބަދަލު ނުކުރެވޭނޭ ކަމަށެވެ.
ޝައިޚް އިމްރާން ވިދާޅުވީ ރާއްޖެއަށް ލިބިފައިވާ ފަރުދީ މިނިވަން ކަމުގެ ނިޒާމަކީ ވަރަށް ގިނަ ބައެއްގެ ބުރަ މަސައްކަތާއި ގުރުބާނީން ހޯދާފައި އޮތް ހިންގުމުގެ ނިޒާމެއް ކަމަށެވެ. އެހެން ކަމުން މި ނިޒާމު ފުނޑުފުނޑުކޮށް ރޫޅާމުމުގެ ޖާގަ އެއްވެސް ބަޔަކަށް ނުދެވޭނޭ ކަމަށް އޭނާ ވިދާޅުވިއެވެ.
