ރައްޔިތުންގެ ޙައްޤުތައް ގެއްލޭ ކޮންމެ ފަހަރަކު އަދާލަތު ތެދުވާނެ: އިމްރާން

ވެރިކަމުގެ ސިޔާސަތު ތަޣައްޔަރުވެ، ސިޔާސީ ޖައްވު ކިލަނބުވެ ފަސާދަވެ ގިނަ ރައްޔިތުންގެ ޙައްޤާއި މަސްލަޙަތު ގެއްލޭ ކޮންމެ ފަހަރަކު އަދާލަތު ޕާޓީ ތެދުވާނެ ކަމަށް އެ ޕާޓީގެ ރައީސް ޝައިޚް އިމްރާން ޢަބްދުﷲ ވިދާޅުވެއްޖެ އެވެ.

އަދާލަތު ޕާޓީގެ 20 ވަނަ އަހަރީ ދުވަހުގެ މުނާސަބަތުގައި އިމްރާން ފޮނުއްވި ވީޑިއޯ މެސެޖުގައި ވިދާޅުވީ، ވޭތުވެދިޔަ 20 އަހަރު ރާއްޖޭގެ ގިނަ ރައްޔިތުން ގުޅިގެން ހިންގި ކޮންމެ ބޮޑު ހަރަކާތެއްގައި އަދާލަތު ޕާޓީން ވަނީ މުހިންމު ދައުރެއް އަދާކޮށްފައިކަމަށެވެ. މި މުއްދަތުގައި މެދުކެނޑުމެއްނެތި އިޖުތިމާޢީ، ދީނީ އަދި އިޞްލާޙީ ގިނަ މަސައްކަތްތަކެއް ޕާޓީގެ ފަރާތުން ކުރެވިފައިވާ ކަމަށްވެސް އިމްރާން ވިދާޅުވިއެވެ.

އިމްރާން ވިދާޅުވީ މިއިން ކޮންމެ ކަމެއް ކާމިޔާބު ވެފައިވަނީ ޢަދާލަތު ޕާޓީގެ އިޚްލާސްތެރި މެންބަރުންގެ މިންނެތް މަސައްކަތުން ކަމަށެވެ. އަދި ޕާޓީގެ އިދާރީ ގުނަވަންތަކާއި މެންބަރުންގެ ރޫޙާއި އިޙުސާސްތަކާއި ގުޅި ލާމެހިގެން ހިންގުނު ކޮންމެ ޙަރަކާތަކީ އެމައްޗަށް ފަޚުރުވެރިވުން ޙައްޤު މަސައްކަތެއް ކަމަށެވެ.

އިމްރާން ވިދާޅުވީ އަދާލަތު ޕާޓީގެ މެންބަރުން އެންމެ އުފާކޮށް ފަޚުރުވެރިވާންވީ ކަމަކީ ވޭތުވެދިޔަ 20 އަހަރު މެދުކެނޑުމެއްނެތި ރާއްޖެއަށް ޙިދުމަތް ކޮށްފައިވާ ހަމައެކަނި 2 ޕާޓީގެ ތެރެއިން އެއްޕާޓީއަކީ އަދާލަތު ޕާޓީ ކަމުގައިވުން ކަމަށެވެ.

ވެރިކަމުގެ ސިޔާސަތު ތަޣައްޔަރުވެ، ސިޔާސީ ޖައްވު ކިލަނބުވެ ފަސާދަވެ ގިނަ ރައްޔިތުންގެ ޙައްޤާއި މަސްލަޙަތު ގެއްލޭ ކޮންމެ ހިނދެއްގައި ރައްޔިތުންގެ ދިފާޢުގައި ތެދުވެ، ސާބިތުކަމާ އެކު އިސްސަފުގައި އަދާލަތު ޕާޓީ ވަނީ މަސައްކަތް ކޮށްފައިކަމަށް އިމްރާން ވިދާޅުވި އެވެ.

އިމްރާން ވިދާޅުވީ ވޭތުވެ ދިޔަ ތަނުގައި ކަންކުރި ފަދައިން، މިއަދުވެސް އަދާލަތު ދެމިއޮންނާނީ އަދުލު އިންސާފުގެ މަތީގައި ސާބިތުވެ، ޙައްގައް ނަސްރުދޭ ޕާޓީއެއްގެ ގޮތުގަ އެވެ. އަދި ރައްޔިތުން ބިކަވެ ނިކަމެތިވާ ކޮންމެ ދަނޑިވަޅެއްގައި އަދާލަތު އޮންނާނީ ފަސްނުޖެހި ރައްޔިތުންނާ އެކު ކަމަށް އިމްރާން ވިދާޅުވި އެވެ.