ސަރުކާރު ޖަވާބުދާރީ ކުރުމަށް ހުރިހާ ޕާޓީ ތަކާއެކު މަސައްކަތް ކުރަން އަދާލަތު އޮތީ ތައްޔާރަށް
ރައީސް މުއިއްޒުގެ މިސަރުކާރު ޒިންމާދާރު ކުރުވާ ޖަވާބުދާރީ ކުރުވަން އިދިކޮޅު ހުރިހާ ސިޔާސީ ޕާޓީތަކަށް ކުރީގެ ރައީސް އަބްދުﷲ ޔާމީން ވެސް ވަނީ ދައުވަތުއަރުވާފަ
އަދާލަތު ޕާޓީގެ ރައީސް އިމްރާން އަބްދުﷲ
މިހާރުގެ ސަރުކާރު ހަމަމަގުން ކައްސާލައިފައިވާ ކަމަށް ވިދާޅުވެ، ސަރުކާރު ޖަވާބުދާރީ ކުރުވުމަށް އެހެން ސިޔާސީ ޕާޓީތަކާއެކު މަސައްކަތްކުރުމަށް އަދާލަތު ޕާޓީ ތައްޔާރަށް އޮތްކަމަށް އެޕާޓިގެ ރައީސް ޝެއިޚް އިމްރާން އަބްދުﷲ އިއުލާނުކުރައްވައިފި އެވެ.
އެކްސްގައި ކުރެއްވި ޕޯސްޓެއްގައި ޝެއިޚް އިމްރާން ވަނީ، ޕީއެންއެފް އަދި އެމްޑީޕީ ފަދަ އެހެނިހެން ސިޔާސީ ޕާޓީތަކާއެކު މަސައްކަތްކުރުމުގެ ފުރުސަތު އޮތްކަން ވަނީ ފާހަގަކޮށްފަ އެވެ. ނަމަވެސް، މި މަސައްކަތުގައި އެއް ޕްލެޓްފޯމަކަށް އައުމުގެ މާނައަކީ ހުރިހާ ޕާޓީއެއްގެ ފަލްސަފާ އާއި ގަބޫލުކުރާ ހަމަތައް އެއްގޮތްވާންޖެހުން ނޫންކަން ޝެއިޚް އިމްރާން ވަނީ ސާފުކޮށްދީފަ އެވެ.
އިމްރާން ފާހަގަކުރެއްވި ގޮތުގައި، ކޮންމެ ސަރުކާރެއް އޮތްކަމުގައި ވިޔަސް، އެ ސަރުކާރެއް ހަމަމަގުން ކައްސާލައިފިނަމަ، އިދިކޮޅު ޕާޓީތަކުން އެކަން ފާހަގަކޮށް، އެވާހަކަ ދެއްކުމަކީ ދާދިފަހުން ރައީސް ޔާމިން ވެސް ވިދާޅުވެފައިވާ ފަދައިން އެ ޕާޓީތަކުގެ ޒިންމާއެކެވެ.
ސިޔާސީ ޕާޓީތައް އުފައްދާފައި އެ ޕާޓީތަކާ ހަވާލުކޮށްފައިވާ ޤާނޫނީ ޒިންމާތައް އަދާކުރުމުގައި އެހެން ޕާޓީތަކާއެކު މަސައްކަތްކުރުމަށް އަދާލަތު ޕާޓީން ފަހަތަށް ނުޖެހޭނެ ކަމަށް އިމްރާން ވަނީ ވިދާޅުވެފަ އެވެ.
ސަރުކާރު ހަމަމަގުން ކައްސާލައިފި. ސަރުކާރު ޖަވާބުދާރީ ކުރުވުމަށް ޕީއެންއެފް އާއި އެމްޑީޕީ އަދި އެހެން ސިޔާސީ ޕާޓީ ތަކާއެކު އަދާލަތު ޕާޓީ އަށް މަސައްކަތް ކުރެވޭނެއަދާލަތު ޕާޓީގެ ރައީސް ޝެއިޚް އިމްރާން އަބްދުﷲ
ޝެއިޚް އިމްރާން މިފަދައިން ވިދާޅުވެފައިވާއިރު ރައީސް މުއިއްޒުގެ މިސަރުކާރު ޒިންމާދާރު ކުރުވާ ޖަވާބުދާރީ ކުރުވަން އިދިކޮޅު ހުރިހާ ސިޔާސީ ޕާޓީތަކަށް ކުރީގެ ރައީސް އަބްދުﷲ ޔާމީން ވެސް ވަނީ ދައުވަތުއަރުވާފަ އެވެ. ކުރީގެ ރައީސް ޔާމިން ވިދާޅުވީ ގޮތުގައި ސަރުކާރު ޒިންމދާރު ކުރުވާ ޖަވާބުދާރީ ކުރުވަން އެމްޑީޕީއަށްވެސް ހިތްވަރު ދެއްވާ ކަމަށާ އަދި އަދާލަތު ޕާޓީއާ އެހެން ޕާޓީތަކަށްވެސް ޕީއެންއެފްއާ އެކު ސަރުކާރު ހަމަމަގަށް އަޅުވަން މަސައްކަތްކުރެވޭނެ ކަމަށެވެ.
އަޅުގަޑު ހިތްވަރު ދެން އިނގޭތޯ އެމްޑީޕީއަށްވެސް ސަރުކާރުން ޒިންމާދާރުކުރުވަން މަސައްކަތްކުރަން. ކޮންމެ ޕާޓީއަކަށްވެސް އަޅުގަޑުމެންނާ އެކު ސަރުކާރު ޖަވާބުދާރީ ކުރުވަން މަސައްކަތްކުރެވޭނެ. އެއީ ކޮންމެ ހިޔާލު އެއް ގޮތްވެގެން ނެތް ނޫން. އެއީ ސަރުކާރު ޒިންމާކުރުވާ ޖަވާބުދާރީ ކުރުވަން ގާނޫނު އަސާސީއިން މަތިކުރަނީ ސިޔާސީ ޕާޓީތަކާ ކަމަށް ވެސް ވުމުން. އަޅުގަޑުމެންނާ އެކު ހުރިހާ ޕާޓީތަކަށް މިކަމުގައި މަސައްކަތްކުރެވޭނެ.ކުރީގެ ރައީސް އަބްދުﷲ ޔާމިން އަބްދުލް ގައްޔޫމް
ރައީސް މުއިއްޒުގެ ސަރުކާރުން މިހާރު ފެންނަނީ ހުދުމުހުތާރު ވެރިކަމެއް ކުރެއްވުމަށްޓަކާ މަގުކޮށަމުންދާ މަންޒަރުކަމަށް ގިނަ ބަޔަކު ސިފަކުރެއެވެ. ސަރުކާރުގެ ދޯހަޅި ސިޔާސަތު ތަކުގެ ސަބަބުން ދިވެހިރައްޔިތުން އިންތިހާ އަށް ބިކަވެފައިވާ މި ދަނޑިވަޅުގައި ސަރުކާރު ޒިންމާދާރު ކުރުމުގެ ހަރަކާތްތައް ވަނީ އިތުރުވެފަ އެވެ.
އެގޮތުން ދިވެހިރާއްޖޭގެ ދުސްތޫރީ ނިޒާމު ހަލާކު ކުރުމަށްޓަކާ ރައީސް މުއިއްޒުގެ ސަރުކާރުން ކުރަމުންގެންދާ މަސައްކަތްތައް ހުއްޓުވުމަށް އިދިކޮޅު މައި ޕާޓީ، އެމްޑީޕީގެ ފަރާތުން އޮކްޓޯބަރު 3 ވަނަ ދުވަހު މާލޭގައި ބޮޑު އެއްވުމެއް ބޭއްވުމަސް ހަމަޖެހިފައިވެ އެވެ. އަދި ޒުވާޏުންނާ ނޫސްވެރިން އިސްނަގައިގެން، ދިވެހި ރައްޔިތުންގެ މަދަނީ ހައްގުތަކަށް ވަކާލާތުކޮށް ކަށަވަރު ކުރުމަށްޓަކާ "ފުލްސްޓޮޕް މޫވްމެންޓް" ގެ ނަމުގައި ހަރަކާތެއްވެސް ވަނީ ވުޖޫދުކޮށްފަ އެވެ. ފުލްސްޓޮޕް މޫވްމެންޓްގެ ހަރަކާތްތައް ސިލްސިލާ ގޮތެއްގައި ކޮންމެ ހަފްތާއެއްގެ ބުރާސްފަތި ދުވަހު އޮންނާނެ ކަމަށް މައުލޫމާތުލިބެ އެވެ.
