އޭދަފުށީގައި ޕިކަޕަކުން ޖެހި އެކްސިޑެންޓްވި އުމުރުން ދުވަސްވީ މީހަކު ނިޔާވެއްޖެ

ބ. އޭދަފުށީގައި ޕިކަޕަކުން ޖެހި ހިނގި ނުރައްކާތެރި އެކްސިޑެންޓްގައި އަނިޔާވި އުމުރުން ދުވަސްވީ މީހާ ނިޔާވެއްޖެ އެވެ.

އޭދަފުށީގައި މިމަހުގެ 15 ވަނަ ދުވަހުގެ ރޭ ހިނގި މި ނުރައްކާތެރި އެކްސިޑެންޓުގައި އަނިޔާ ވެފައިވަނީ އުމުރުން ދުވަސްވީ މީހަކަށެވެ. އޭނާ ނިޔާވެފައިވަނީ އައިޖީއެމްއެޗްގެ އައިސީޔޫގައި ފަރުވާ ދެމުން ދަނިކޮށް ހުކުރު ދުވަހު ހެނދުނުގެ ވަގުތެއްގަ އެވެ. 

މި ހާދިސާގައި ނިޔާވެފައިވަނީ އޭދަފުށީ ސީސަންގެ، އުމުރުން 82 އަހަރުގެ އަބޫބަކުރު އަބްދުﷲ އެވެ.

މި އެކްސިޑެންޓް ހިނގާފައިވަނީ މިމަހުގެ 15 ވަނަ ދުވަހު އަބޫބަކުރު މަޣްރިބު ނަމާދަށް ފަހު ހިނގާފައި ގެއަށް ދަނިކޮށް، މަގުމަތިން ދުއްވާފައި ދިޔަ ޕިކަޕަކުން ޖެހިގެންނެވެ. އަދި އެވަގުތު ޕިކަޕު ދުއްވަން އިނީ އޭދަފުށީ ދުނި، އަބްދުﷲ ރަމީޒެވެ. އޭނާއަކީ ގަވާއިދާ ހިލާފަށް ޕިކަޕު ދުއްވައިގެން މީގެ ކުރިން ވެސް ލައިސަންސް ހިފަހައްޓާފައިވާ މީހެއްކަން ވަނީ އެނގިފަ އެވެ.

އެރަށު މީހަކު މި ނޫހަށް ކިޔައިދިން ގޮތުގައި ޕިކަޕުން ޖެހުމާއެކު އަބޫބަކުރު ބިންމައްޗަށް ވެއްޓި، ޕިކަޕުގެ ދަށުވި އެވެ. އަދި އޭނާ އެވަގުތު ސަލާމަތް ކުރީ އެ ސަރަހައްދުގައި ތިބި އާންމު ބަޔަކު ޕިކަޕު ފަހަތަށް ކޮށްޕައިގެންނެވެ.

އޭނާ ބުނިގޮތުގައި އަބޫބަކުރު ސަލާމަތްކުރި އިރު އޭނާ ގެ އެއްފައި އޮތީ ވަރަށް ބޮޑަށް ފަޅައިގެންގޮސް، މުޅި ސަރަހައްދަށް ލޭ ފައިބާފަ އެވެ. އެކްސިޑެންޓަށްފަހު ވަގުތުން ބ. އަތޮޅު ހޮސްޕިޓަލުގައި ފަރުވާ ދިނުމަށްފަހު، ހާލު ސީރިއަސްވުމުގެ ސަބަބުން ޖެހިގެން އައި ދުވަހު ވަނީ އެމެޖެންސީގައި މާލެ ގެނެސް އައިޖީއެމްއެޗްގައި ފަރުވާ ދޭން ފަށާފަ އެވެ.

އެނގިފައިވާގޮތުގައި މި މައްސަލައާ ގުޅިގެން ޕިކަޕު ދުއްވަން އިން މީހާ މިހާރު ހުރީ ފުލުހުންގެ ބެލުމުގެ ދަށުގަ އެވެ.