ސަރުކާރުގެ އިހުމާލުން ކުޅުދުއްފުށި ސިޓީގެ ތައުލީމީ ދާއިރާ އަށް ގޮންޖެހުންތަކެއް!
ކުޅުދުއްފުށީގެ ސްކޫލްތަކުގައި ތައުލީމު ހާސިލްކުރާ ދަރިވަރުންގެ އަދަދު ދަށްވެ، ސްކޫލްތަކަށް ޖާގައިގެ ދަތިކަން ހައްލުކުރުމަށް ކުރީގެ ސަރުކާރުން ފެށި އިމާރާތްތަކުގެ މަސައްކަތް ހުއްޓިފައިވުމުން ބެލެނިވެރިން ދަނީ ކަންބޮޑުވުން ފާޅު ކުރަމުން.
ޖަލާލުއްްދީން ސްކޫލުގައި ތައުލީމު ހާޞިލް ކުރަމުންދާ ދަރިވަރުންތަކެއް | ޖަލާލުއްދީން ސްކޫލް
މިއަހަރުގެ ދިރާސީ އައު އަހަރުގެ ކިޔެވުން ފެށުމާއެކު, ކުޅުދުއްފުށި ސިޓީ ގެ ތައުލީމީ ދާއިރާ އަށް ބޮޑު ގޮންޖެހުމަކާ ކުރިމަތިވެ، އެ ސިޓީގެ ސްކޫލްތަކުގެ ދަރިވަރުންގެ އާބާދީ މިއަހަރު ވަރަށް ބޮޑުތަނުން ދަށަށް ގޮސްފި އެވެ.
މިގޮތުން ފާއިތުވި އަހަރުތަކާއި އަޅާބަލާއިރު, ފުރަތަމަ ފަހަރަށް އެ ސިޓީގެ ސްކޫލުތަކުގައި ތައުލީމު ހާސިލްކުރަމުންދާ ދަރިވަރުންގެ އަދަދު މަދުވެފައިވާއިރު، ސްކޫލްތަކަށް ދިމާވެފައިވާ ޖާގައިގެ ދަތިކަން ހައްލުކުރުމަށް ފަށާފައިވާ މަޝްރޫއުތައް ނުނިމި ދިގުލައިގެން ދިއުމުން ބެލެނިވެރިންނަށް މިއަދު ވަނީ ކަންބޮޑުވުން ފާޅުކުރަން ޖެހިފަ އެވެ.
އުތުރުގެ ރަށްތަކުގެ މައި ހަބު ކަމުގައިވާ ކުޅުދުއްފުށި ސިޓީގައި, ސަރުކާރު ތިން ސްކޫލާއި އަމިއްލަ ފަރާތަކުން ހިންގާ ޕްލޭ ސްކޫލެއް ހިމެނޭހެން ދަރިވަރުންގެ ޖުމްލަ އާބާދީ އަކީ 2850 އެވެ. މިއީ ނިމިދިޔަ ދިރާސީ އަހަރުގެ 2947 އާ އަޅާބަލާއިރު ފާހަގަކުރެވޭ މިންވަރެއްގެ ދަށަށް ދިއުމެކެވެ. ތަފާސްހިސާބުތަކަށް ބަލާއިރު، 2020 ވަނަ އަހަރު 2812 ދަރިވަރުން ތިބިއިރު، އެ އަދަދު އަހަރުން އަހަރަށް އިތުރުވެ 2024 ވަނަ އަހަރު ވަނީ 3009 އަށް އަރާފައެވެ. ނަމަވެސް، 2025 ވަނަ އަހަރަކީ ފާއިތުވި ހުރިހާ އަހަރަކާ ޚިލާފަށް، ކުޅުދުއްފުށީގެ ސްކޫލްތަކުގެ އާބާދީ ފުރަތަމަ ފަހަރަށް ދަށަށް ދިޔަ އަހަރެވެ.
މިގޮތުން އެ ސިޓީގެ ސްކޫލުތަކުުގައި ތައުލީމު ހާސިލްކުރާ ދަރިވަރުންގެ އާބާދީ ކަންބޮޑުވާ ވަރަށް މަދުވަމުންދާއިރު، މީގެ ފަހަތުގައިވާ އެންމެ ބޮޑު އެއް މައްސަލަ އަކީ ޖާގައިގެ ދަތިކަމެވެ.
ނިމިދިޔަ އެމްޑީޕީ ސަރުކާރުން ކުޅުދުއްފުށީގެ ތިން ސްކޫލުގައި ޖާގައިގެ ދަތިކަން ހައްލުކުރުމަށްޓަކައި އައު އިމާރާތްތަކެއްގެ މަސައްކަތް ފެށި ނަމަވެސް، ސަރުކާރު ބަދަލުވުމާއެކު ތިން ސްކޫލުގެ މަޝްރޫޢުތައް ވެސް ވަނީ ހުއްޓިފަ އެވެ. މީގެ ސަބަބުން ދަރިވަރުންނަށް ކިޔަވައިދިނުމުގެ ކަންކަމުގައި ދަތިތަކާ ކުރިމަތިލާން ޖެހި، ސްކޫލްތަކުގެ ވަސީލަތްތަކަށް ވަނީ ބާރުބޮޑުވެފަ އެވެ.
ކުޅުދުއްފުށީގެ ތައުލީމީ ދާއިރާއަށް ދިމާވެފައިވާ މި ގޮންޖެހުންތަކާ ގުޅޭގޮތުން ބެލެނިވެރިން ފާހަގަކުރާ ގޮތުގައި، އާބާދީ އިތުރުވަމުންދިޔަ އަހަރުތަކުގައި ވެސް ޖާގައިގެ މައްސަލަ އަށް ދާއިމީ ހައްލެއް ލިބިފައި ނުވުމަކީ ދަރިވަރުންގެ ކިޔެވުމަށް އޭގެ ނޭދެވޭ އަސަރު ކުރާނެ ކަމެކެވެ. އަދި މިހާރު ފެށިފައި ހުރި މަޝްރޫއުތައް ހުއްޓުމެއްނެތި ކުރިއަށްގެންގޮސް އަވަހަށް ނިންމުމަކީ ސިޓީގެ ތައުލީމީ ފެންވަރު ހިފެހެއްޓުމަށް ކޮންމެހެން ބޭނުންތެރި ކަމެކެވެ.
އެހެންނަމަވެސް, ރައީސް މުޢިއްޒުގެ ސަރުކާރާއި، ދައުލަތުގެ އިސްވެރިން ކުޅުދުއްފުށީގެ ސްކޫލްތަކުގެ ހާލަތު ރަނގަޅުކުރުމަށް މަސައްކަތް ނުކުރައްވާތީ، ކުޅުދުއްފުށީގެ ރައްޔިތުން ގޮވާލަނީ، ސަރުކާރުން މިހާރު ގެންގުޅޭ ފަރުވާކުޑަ ސިޔާސަތުތައް ދޫކޮށްލައި، ހުއްޓިފައިވާ ސްކޫލް އިމާރާތްތަކުގެ މަސައްކަތް އަވަހަށް ނިންމައި، ސިޓީގެ ތައުލީމީ މުސްތަޤްބަލް ކަށަވަރުކޮށްދިނުމަށެވެ.
