މި ސަރުކާރަކީ ލާމަރުކަޒީ ނިޒާމާއި ދެކޮޅު ސަރުކާރެއް: މޭޔަރ ޢާޠިފް

މި ސަރުކާރަކީ ލާމަރުކަޒީ ނިޒާމާއި ދެކޮޅު ސަރުކާރެއް ކަމަށާއި, އެކަން ބަހާއި އަމަލުން ސާބިތުވާކަމަށް ކުޅުދުއްފުށި ސިޓީގެ މޭޔަރ މުޙައްމަދު ޢާޠިފް ވިދާޅުވެއްޖެއެވެ.

މޭޔަރ ޢާޠިފް މިފަދައިން ވިދާޅުވީ 'ރާއްޖެ އެމްވީ' އަށް އިއްޔެ ދެއްވި ބަސްދީގަތުމެއްގައި, ލާމަރުކަޒީ ޤާނޫނަށް ގެނައި ގޯސް ބަދަލުގެ ސަބަބުން މި ފެށިގެން ކުރިއަށްދާ 2026 ވަނަ އަހަރުގެ މަސައްކަތްތަކަށްވެސް ބުރޫ އަރާނެ ކަމަށް ފާހަގަކުރައްވަމުންނެވެ.

މިގޮތުން މޭޔަރ ޢާޠިފް ވިދާޅުވީ, ލާމަރުކަޒީ ޤާނޫނަށް ގެނައި ބަދަލުގެ ދަށުން ބިން ކުއްޔަށް ދިނުން ހުއްޓުވާފައިވާތީ ރަށުގެ އިޤުތިޞާދު ކުރިއެރުވުމަށް ކުރަން ހުރި މަސައްކަތްތައް ވަނީ ބަންދުވެފައިކަމަށެވެ.

މީގެ ތެރޭގައި ކުޅުދުއްފުށީގައި އޮޑި ހަރުގެއެއް އެޅުމަށް ދަތި ވެފައިވާއިރު, މިކަމުގެ ސަބަބުން އޮޑި ވެރި މީހާ އަށާއި, އޮޑި ބަންނަން މަސައްކަތް ކުރާ ވަޑިންނަށް ގެއްލުންވެ, ވަޑިންގެ އާމްދަނީ ހުއްޓި, އޮޑި ބަންނަން ބޭނުންކުރާ ލަކުޑި ފަދަ ތަކެތި ވިއްކާ ފަރާތްތަކަށްވެސް ގެއްލުންވާ ކަމަށް މޭޔަރ ޢާޠިފް ފާހަގަކުރައްވާފައިވެއެވެ. 

ސަރުކާރުން ލާމަރުކަޒީ ޤާނޫނަށް ގެނައި ގޯސް ބަދަލުތަކާއެކު, އާންމު ރައްޔިތުންގެ އިތުރުން ކައުންސިލްގެ އާމްދަނީ އަށްވެސް ވަރަށް ބޮޑަށް ބުރޫ އަރާ ކަމަށް މޭޔަރ ޢާޠީފް ވަނީ  ފާހަގަކުރައްވާފައެވެ. އެގޮތުން, މޭޔަރ ވިދާޅުވީ, މިފަދަ ބިންތައް ދޫކުރުމުގެ ބާރު ކައުންސިލްތަކަށް ލިބިފައިވާނަމަ, ކައުންސިލްގެ އާމްދަނީ އިތުރުވުމުން އޭގެ ފައިދާ ވާނީ ރަށުގެ ރައްޔިތުންނަށް ކަމަށެވެ.

މީގެ އިތުރުން ލޯކަލް އޮތޯރިޓީ ކުންފުނިން ކުރާ މަސައްކަތްތައް ހުއްޓުމުގެ ސަބަބުން 2026 ވަނަ އަހަރު ސްކޫލުތައް ހުޅުވުމުގެ ކުރިން ލޯކަލް އޮތޯރިޓީ ކުންފުނީގެ ބިސްނަސް އެންޓިޓީ އެއް ގޮތަށް, ކުޅުދުއްފުށީ ރައްޔިތުން އެންމެ ދެކެން ބޭނުންވި ޕްލޭ ސްކޫލުގެ ޚިދުމަތް ފެށުމަށް ގޮންޖެހުން މެދުވެރިވެފައިވާކަމަށް މޭޔަރ ޢާޠިފް ވިދާޅުވެފައިވެއެވެ.

އެގޮތުން, އާންމު ފަރާތްތަކުން ކުރާ އެއްވެސް ވިޔަފާރިއެއް ލޯކަލް އޮތޯރިޓީ ކުންފުންޏަކަށް ނުހިންގޭ ގޮތަށް ޤާނޫނަށް ގެނައި ބަދަލުގައި ހިމަނާފައިވާއިރު, 10 މިލިއަނުން ދަށުގެ ރައުސުލްމާލުގެ އެއްވެސް މަސައްކަތެއް ލޯކަލް އޮރޯރިޓީ ކުންފުންޏަކުން ނުކުރެވޭގޮތައް ވަނީ ބަދަލުކޮށްފައެވެ.

އެހެންނަމަވެސް މި މައްސަލަ އާއި ގުޅިގެން މޭޔަރ ޢާޠިފް ވިދާޅުވީ ސިޓީ ކައުންސިލުން މަޝްވަރާކޮށް އެކި ގޮތްގޮތުން ދިރާސާކޮށް މިހާރު އަމިއްލަ ފަރާތަކުން ހިންގުމަށް ޕްލޭ ސްކޫލް ދޫކޮށްފައިވާކަމަށާއި, ސިޓީ ކައުންސިލަށް ބީލަންތައް ލިބިފައިވާމަކަށާއި, މިހާރު އެ މަސައްކަތް ބަޔަކާ ހަވާލުކޮށްފައިވާކަމަށެވެ.

މޭޔަރ ޢާޠިފް އިތުރަށް ވިދާޅުވެފައިވަނީ, ކުޅުދުއްފުށި ސިޓީ ކައުންސިލުން, އެ ސިޓީގައި ޓުއަރިމް ކުރިއެރުވުމަށް ޚާއްސަ އިސްކަމެއްދީގެން ކުރިއަށްގެންދާ މަޝްރޫޢޫތަކުގެ ތެރެއިން ވޯޓަރ ސްޕޯޓްސް އަދި ޑައިވިންގ ސްކޫލް ތަރައްޤީކުރުމަށް ބިން ދޫކުރުމަށް ނުކުޅެދިފައިވާއިރު, ހަނިމާދޫ އިންޓަނޭޝަނަލް އެއާޕޯޓުގެ ޚިދުމަތް ފެށުމުގެ ކުރިން ކުޅުދުއްފުށި ސިޓީގައި ޓުއަރިޒަމް ތަރައްޤީކުރުމަށް ސިޓީ ކައުންސިލުން ކުރެވެން ހުރި ކަންތައްތައް ލާމަރުކަޒީ ޤާނޫނަށް ގެނައި ގޯސް ބަދަލާއެކު ހުއްޓިފައިވާކަމަށެވެ.

ރައްޔިތުންނަށް ފައިދާ ވާނެ މިފަދަ ބައިވަރު އެތައް މަޝްރޫޢުތަކެއް ސަރުކާރުން ގެނައި ބަދަލާއެކު ހުއްޓިފައިވާއިރު, މޭޔަރ ޢާޠިފް ވިދާޅުވީ, ސަރުކާރުން އަދިވެސް ކުރިއަށް އޮތް ތާނގައި ލާމަރުކަޒީ ނިޒާމަށް ގޯސް ބަދަލުތައް ގެންނާނެކަމަށެވެ. އަދި މި ބަދަލުގެ ސަބަބުން މޭޔަރ, މި ސަރުކާރު އެންމެ ބޮޑަށް ފާހަކުރައްވާފައިވަނީ ލާމަރުކަޒީ ޤަބޫލު ނުކުރާ ސަރުކާރެއްގެ ގޮތުގައެވެ.